Jobe 26 - Siswati 1996 Bible

Imphendvulo yesitsatfu yaJobe kuBildadi

¹ Jobe waphendvula, watsi:

² “Maye, wena ulusito kulobutsakatsaka! Maye, wena uwusindzisile lomkhono bewute emandla!

³ Maye, wena umyale wamcondzisa lomuntfu longakahlakaniphi! Maye, ukukhombisile kucondza kwakho!

⁴ Usitwe ngubani wena kutsi ukhulume lamavi? Wabani lomoya lokhulume ngemlomo wakho?

⁵ “Labafile baselusizini lolukhulu kabi, labo labangaphansi kwemanti nako konkhe lokukuwo.

⁶ Kufa kungcunu embikwaNkulunkulu; imbhubhiso ayikafihleki kuye.

⁷ Wendlala inyakatfo emkhatsini longenalutfo, alengise umhlaba eteni.

⁸ Ugocota emanti emafini akhe, noko lawo manti akavuti kulamafu.

⁹ Inyanga ledvulungene uyayisitsa, endlale lifu lakhe etikwayo.

¹⁰ Udvweba umnyele wemkhatsi etikwemanti, kutsi kube ngumnyele wekukhanya nebumnyama.

¹¹ Tinsika tasezulwini tiyatfutfumela, timangaliswe kutsetsa kwakhe.

¹² Ngemandla akhe wathulisa lwandle, ngekuhlakanipha kwakhe wagawula Rahabi waba ticucu.

¹³ Ngekuphefumula kwakhe emazulu akhanya, angabi nalutfo; sandla sakhe sayigwaza inyoka lentjuzako.

¹⁴ Lawa ngemacentselo nje emisebenti yakhe. Maye, lokukhulunywa ngaye sikuva kalufifi! Ngubani nje longakucondza kudvuma kwemandla akhe?”