Jobe 24 - Siswati 1996 Bible

¹ “Somandla akatimisi ngani tikhatsi tekwehlulela? Kwentiwa yini kutsi labo labamatiko bangabi nalo lwati ngetikhatsi takhe?

² Bantfu bayatikhweshisa tikhonkhwane teminyele, belusele khona imihlambi yabo yekwebiwa.

³ Bacosha imbongolo yentsandzane, batsatse nenkhabi yemfelokati ibe sibambiso.

⁴ Bakhweshisa labeswele endleleni, baphocelele bonkhe labamphofu belive kutsi babhace.

⁵ Njengetimbongolo tesiganga ehlane, labamphofu bayazulazula bafunane nekudla ehlane, kute lenye indzawo lapho bangatfolela bantfwababo khona kudla.

⁶ Babutsa kudla kwetifuyo emahlangeni, bakhwimite etivinini talababi.

⁷ Ngenca yekweswela kwekwembatsa, balala bangcunu busuku bonkhe; kute labangakwembatsa nakumakhata.

⁸ Banetfwa babe manti timvula temagcuma, banamatsele emadvwaleni, ngobe beswele indlu.

⁹ Umntfwana longenayise uyahlutfulwa ebeleni, luswane lwalomphofu lutsatselwe kubhadala sikwelede.

¹⁰ Ngenca yekweswela kwekwembatsa, bahamba ngcunu, betfwala tinyandza, kodvwa bajinge babulawe yindlala.

¹¹ Bafihlita titselo temincumo etibebesini, bahlikihle ngematje ekuhluta liwayini; noko bajinge babulawe koma.

¹² Kuquma kwalabafako kuvakala edolobheni, nemiphefumulo yalabalimele ikhalela kusitwa. Kodvwa Nkulunkulu kute lambeka licala ngaloko lokubi lokwentiwe.

¹³ “Bakhona labo labamelene nekukhanya, labangatati tindlela tako, nalabangahlali etindleleni tako.

¹⁴ Kutsi kungahlwa, umbulali avuke, abulale labamphofu nalabeswele; ebusuku uhamba eba, agcekeza tindlu njengelisela.

¹⁵ Liso lesiphingi licaphela bumnyama, sicabange sitsi: ‘Kute lotangibona,’ sihlala ngekufihla buso baso.

¹⁶ Nase kumnyama emadvodza agcekeza angene etindlini, kodvwa emini ativalela endlini, akevani nekukhanya.

¹⁷ Ngobe kubo bonkhe bumnyama lobukhulu ngusekuseni ngeluvivi, batente bangani netesabiso tebumnyama.”

Sofari

¹⁸ “Bantfu labanjalo bangemagwebu lantanta emantini, sabelo sabo sicalekisiwe eveni, khona kutabate loya etivinini.

¹⁹ Njengobe kushisa nesomiso kuhlwitsa sitfwatfwa lesincibilikile, kanjalo nelithuna liyabahlwitsa labo labonako.

²⁰ Sibeletfo siyabakhohlwa, badliwe timphetfu; lababi abasakhunjulwa, kodvwa babhidlika njengesihlahla lesibolile.

²¹ Bagagadlela inyumba lengenamntfwana, nakumfelokati abakhombisi musa.

²² Kodvwa Nkulunkulu ngemandla akhe uyabahohobisa labo labanemandla, nome bangahlala batinte, noko abanasiciniseko ngekuphila kwabo.

²³ Angabenta bativele kuphumula lokuphephile, kodvwa emehlo akhe abuka tindlela tabo.

²⁴ Kwesikhashana nje bayaphakanyiswa banotse, emvakwaloko sebayanyamalala, bayatfotjiswa, batsatfwe njengabo bonkhe, basikwe njengesikhwebu eluhlangeni.

²⁵ “Nangabe akunjalo, ngubani longasho kutsi nginemanga, anciphise emavi ami awente lite?”