Jobe 23 - Siswati 1996 Bible

Jobe

¹ Jobe waphendvula, watsi:

² “Nalamuhla loku ngisakhala kakhulu, ngobe sandla saNkulunkulu simatima kimi, lite nome ngibubula.

³ Kube mane bengati kutsi ngingamtfola kuphi, kube mane benginemandla ekufika lapho ahlala khona!

⁴ Bengiyawubeka indzaba yami embikwakhe, umlomo wami utfulule onkhe emavi ekutivikela.

⁵ Bengiyawutfola kutsi utangiphendvula kanjani, ngicabangisise kutsi utawutsini.

⁶ Abetawumelana nami ngemandla akhe lamakhulu yini? Cha, abengeke angibeke licala.

⁷ Abeyawubona naye kutsi umelene nemuntfu lowetsembekile, nakanjani kumehluleli wami bengitawutfolakala ngite licala.

⁸ “Kodvwa nangiya emphumalanga, akekho lapho; nangiya enshonalanga, nalapho angimtfoli.

⁹ Nasebenta enyakatfo, angimboni; nasaya eningizimu, angimfanisi ngisho nekumfanisa.

¹⁰ Kodvwa yena uyayati indlela lengiyitsatsako; utawutsi angangivivinya, ngiphume sengiyigolide.

¹¹ Tinyawo tami tilandzela edvutane netinyatselo takhe. Ngihamba endleleni yakhe, ngingete ngaphambuka.

¹² Angikesuki emiyalweni yetindzebe takhe. Emavi emlomo wakhe ngiwente aba ligugu kwendlula kudla kwami kwemalanga onkhe.

¹³ “Kodvwa nasancumile yena yedvwa, ngubani longamelana naye? Wenta loko lakutsandzako.

¹⁴ Ufeza loko lasakuncumile ngami; usenaletinyenti tinhloso letinjalo lasetigcinile.

¹⁵ Kungako nje ngitfutfumela embikwakhe; nangicabanga ngako konkhe loku, ngiyamesaba.

¹⁶ Nkulunkulu wente inhlitiyo yami yadzinwa; Somandla ungitfutfumelisile.

¹⁷ Noko bumnyama abukangibindzisi; yebo, bumnyama lobuphatsekako lobungimbonye buso abukangibindzisi.”