Jobe 22 - Siswati 1996 Bible

Kukhulumisana kwesitsatfu Elifazi

¹ Elifazi, umThemani, waphendvula, watsi:

² “Umuntfu angaba ngilo yini lusito kuNkulunkulu? Umuntfu lohlakaniphile yena angaba lusito yini kuye?

³ Njabulo yini lebeyingatfolwa nguSomandla kube bewulungile? Abetawubuyelwa yini kube tindlela takho betimsulwa?

⁴ Kungenca yekwesaba kwakho Nkulunkulu yini lokutsi akutsetsise, akubeke emacala?

⁵ Bubi bakho abubukhulu yini? Tono takho tinaso yini siphetfo?

⁶ Wafuna sibambiso kubomnakenu ngendlovu yangena ngaphandle kwesizatfu, wahlubula labamphofu tembatfo tabo, wabashiya bangcunu.

⁷ Labadzangele awuzange ubanatsise emanti, nalabalambile wabema kudla,

⁸ noko wawungumuntfu lonemandla nalonelive, ungumuntfu lohloniphekile lohlala kulo.

⁹ Wahambisa bafelokati yabayaba, wapitjita emandla alabatintsandzane.

¹⁰ Ngiko nje tonkhe tingibe tikutungeletile, netingoti tikwetfusa kangaka,

¹¹ ngiko nje kumnyama kuze utsi ungetiwubona, netikhukhula temfula tikusibekela.

¹² “Nkulunkulu akahlali yini ekuphakameni kwelizulu? Ase ubuke kutsi tinkhanyeti tiphakeme kangakanani!

¹³ Noko wena utsi: ‘Nkulunkulu watini? Wehlulela akulobumnyama lobunjena yini?

¹⁴ Emafu lamnyama ayamsibekela, kuze angasiboni asahamba antontomela etulu emazulwini.’

¹⁵ Usetawuhamba yini ngalendlela lendzala leyayihamba bantfu lababi?

¹⁶ Bakhukhuleka, sikhatsi sabo sisengakefiki, netisekelo tabo takhukhuleka.

¹⁷ Bakhuluma kuNkulunkulu batsi: ‘Ase usiyekele! Somandla angasentani tsine?’

¹⁸ Noko bekunguye labegcwalise tindlu tabo ngetintfo letinhle, ngako ngima bucalu neteluleko talababi.

¹⁹ “Labalungile bajabula, nabakubona kubhujiswa kwabo, labangenacala babaphukuta batsi:

²⁰ ‘Impela titsa tetfu tibhujisiwe, nemlilo umita bunjinga bato.’

²¹ “Titfobe kuNkulunkulu, ube nekuthula naye, kuphumelela kuyakuta kuwe ngaleyo ndlela.

²² Yemukela imfundziso lephuma emlonyeni wakhe, emavi akhe uwabeke enhlitiyweni yakho.

²³ Nawubuyela kuSomandla, utawusitakala: Nawususa bubi, ububeke khashane nendlu yakho,

²⁴ utsatse nalamatje laligugu uwalahle elutfulini, igolide yakho yase-Ofiri uyilahle emadvwaleni asetigodzini,

²⁵ Somandla-ke uyakuba yigolide yakho, isiliva yakho yelikhetselo lelisembili.

²⁶ Impela, Somandla uyakuba kujabula kwakho, wenyusele buso bakho kuNkulunkulu.

²⁷ Uyawuthandaza kuye, naye akuve, bese ugcwalisa tetsembiso takho.

²⁸ Konkhe loncuma kutsi ukwente kuyawukwenteka, nekukhanya kukhanye etindleleni takho.

²⁹ Kodvwa Nkulunkulu uyabehlisa labo labatigcabhako, amsindzise umuntfu lotitfobako.

³⁰ Umuntfu lonelicala uyakumkhulula, amkhulule ngawe, nangabe tandla takho timhlophe.”