Jobe 21 - Siswati 1996 Bible

¹ Jobe waphendvula, watsi:

² “Lalelisisani lamavi ami, nimane ningidvudvute ngaloko.

³ Ngibeketeleleni nangikhuluma, ngitsi ngingakhuluma, bese niyachubeka nekuphukuta.

⁴ “Kusola kwami kucondzene nemuntfu yini? Kwentiwa yini kutsi ngingakhoni kubeketela?

⁵ Bukani mine nimangale, nibambe wangentasi.

⁶ Nangicabanga ngaloko, ngifikelwa kwesaba, kutfutfumela kubambe umtimba wami.

⁷ Kwentiwa yini kutsi lababi baphile sikhatsi lesidze, bakhule baze baguge, baphindze babe nemandla lamakhulu?

⁸ Babona bantfwababo baphumelela, babone ngisho nebatukulu babo.

⁹ Emakhaya abo avikelekile, akanako kwesaba. Indvuku yaNkulunkulu ayikho etikwabo.

¹⁰ Tinkhomati tabo atilatelwa, ngobe tinkunzi tabo tiyatalisa.

¹¹ Bakhipha bantfwana babo njengemhlambi. Bantfwana babo bayajabula bagidze.

¹² Bahlabelela ngekuhambisana nemafahlawane, nemahabhu, batijabulise ngekudlala imintjingozi.

¹³ Timphilo tabo baticitsa ngekunaka umcebo, behlela endzaweni yalabafile ngekuthula.

¹⁴ Noko bakhuluma kuNkulunkulu, batsi: ‘Ase uyekele tsine! Site sifiso sekwati tindlela takho.

¹⁵ Ngubani yena loSomandla kutsi singakhonta yena? Yini nje lesingayitfola ngekuthandaza kuye?’

¹⁶ Kodvwa umnotfo wabo awukho etandleni tabo, ngako ngiyatecwaya teluleko talababi.

¹⁷ “Kukangakhi nje sibane salababi sicinywa? Ngukangakhi kona lababi behlelwa sehlakalo? Nkulunkulu uke abajezise ngentfukutselo yini?

¹⁸ Kukangakhi bafanana netinhlanga emoyeni, babe njengemakhoba lapheshulwa sivunguvungu?

¹⁹ Kutsiwa: ‘Nkulunkulu ujezisa bantfwana ngenca yetono letentiwa nguyise.’ Cha! Nkulunkulu akajezise toni cobo lwato, kuze titewukwati kahle.

²⁰ Lomubi akatibonele ngemehlo akhe kubhujiswa kwakhe, atinatsele yena lulaka lwaSomandla.

²¹ Ngobe unandzabani nemndeni lawushiya ngemuva, nakufika kuphela kwetinsuku tekuphila kwakhe?

²² “Ukhona yini umuntfu longafundzisa Nkulunkulu lwati? Ngobe yena wehlulela ngisho nalabangetulu kwabo bonkhe.

²³ Lomunye ufa asacine kahle kakhulu, aphephe waze watinta ngalokuphelele, kantsi futsi ukhululekile,

²⁴ umtimba wakhe uphatseke kahle, nematsambo akhe agcwele umnkantja.

²⁵ Lomunye ufa anelusizi emphefumulweni, angazange sekativele nome ngabe yini lemnandzi.

²⁶ Bobabili balala kanyekanye elutfulini, netimphetfu tibahlasela ngalokufananako bobabili.

²⁷ “Ngati kahle kutsi nicabangani, ngisho nemacebo lebeningahle ningone ngawo.

²⁸ Nitsi: ‘Iphi-ke manje lendlu yalomuntfu lomkhulu, aphi emathende lapho lababi bebahlala khona?’

²⁹ Nake nababuta yini labatihambi? Anizange niyinake yini imibiko lababuya nayo,

³⁰ yekutsi lomubi uyacolelwa ngelilanga lenhlekelele nekutsi uyakhululeka ngelilanga lelulaka?

³¹ Ngubani longasola simo sakhe embikwakhe? Ngubani lomkhokhelako ngaloko lakwentile?

³² Uyetfwalwa ayiswe edlizeni, lithuna lakhe lihlala ligadziwe.

³³ Lenhlabatsi yesigodzi iyanongotela kuye, bonkhe bantfu balandzela yena, sicumbi lesikhulu sihamba embikwakhe.

³⁴ “Ngako-ke ningangidvudvuta kanjani ngalenkhulumo yenu lengumbhedvo? Kute nakunye kwetimphendvulo tenu lokusasele ngaphandle kwemacebo odvwa nje.”