Jobe 20 - Siswati 1996 Bible

Sofari

¹ Sofari, umNama, wase uyaphendvula watsi:

² “Ngihlushwa ngimicabango yami letsi angiphendvule nami, ngobe sengiphatamiseke kakhulu.

³ Ngiva emagama layinhlamba kimi, ngiko nje ingcondvo yami seyitsi angitiphendvulele.

⁴ “Empeleni nawe uyati kutsi bekunjani, kwakadzeni nje, kusukela nakubunjwa umuntfu emhlabeni,

⁵ kutsi kujabula kwalababi kwesikhashana nje, nekutfokota kwalabangenaNkulunkulu kuba kwesikhashana nje.

⁶ Nome kuphakama kwalomubi kuze kuphikelele emazulwini nje, nenhloko yakhe itsi ayitsintse emafu,

⁷ uyawubhubha kokuphela njengemangcoliso akhe; labo lababeke bambona bayawubutana, batsi: ‘Uphi?’

⁸ Njengeliphupho uyandiza angaphindzi atfolakale, anyamalaliswe njengembono wasebusuku.

⁹ Liso lelalike lambona alisayiwuphindze limbone futsi. Indzawo yakhe ingeke iphindze imbone.

¹⁰ Bantfwabakhe kufanele bahlawule kulabamphofu, tandla takhe kufanele tibuyisele umcebo wakhe.

¹¹ Emandla ebusha lagcwele ematsanjeni akhe ayawulala kanye naye elutfulini.

¹² “Naloku umonakalo unongotela emlonyeni wakhe, nome awufihla ngaphansi kwelulwimi lwakhe nje,

¹³ naloku angeke akumele nje kuwukhiphela ngephandle, alibele kuvalela lomonakalo emlonyeni wakhe,

¹⁴ kodvwa lokudla kwakhe kutaba munyu esiswini sakhe, kutawugucuka kube sihlungu setinyoka sekungekhatsi ematfunjini akhe.

¹⁵ Utabukhafula bonkhe lobunjinga labumita, Nkulunkulu utamhlantisa bonkhe lapha esiswini sakhe.

¹⁶ Utawumunya lesihlungu setinyoka; abulawe ngematinyo elibululu.

¹⁷ Angeke atfokote ngemifudlana nemifula legeleta luju nelulata.

¹⁸ Loko lakushikashikanelako uyawukubuyisa konkhe angakadli lutfo lwako. Akasenayidla intalo yako konkhe lokusebenta kwakhe lokungaka lakwentile.

¹⁹ Ngobe ubacindzetele labamphofu, wabashiya beswele, ubadle netindlu tabo langazange asatakhe.

²⁰ “Ngempela akayikuba nako kuphumula kwemphefumulo ekulangateleni kwakhe. Angeke akhone kutisindzisa kwayena ngalomcebo wakhe.

²¹ Sekute nalokuncane lokusele yena langakudla, bunjinga bakhe ngeke buphumelele bume.

²² Asesekutamaseni kwakhe lusizi luyawumhlasela, emandla lamakhulu elusizi ayawumehlela.

²³ Uyawutsi nase agcwalise umkhaba wakhe, Nkulunkulu ehlisele intfukutselo yakhe etikwakhe, ehlisele nemvula yemijijimeto yakhe etikwakhe.

²⁴ Nome abalekela silimato sensimbi, umcibisholo welitfusi uyakumhlaba.

²⁵ Uyakuwudvoncula emhlane wakhe, kudla kwawo kuphume esibindzini, kwesaba kuyawumehlela.

²⁶ Bumnyama lobuphatsekako bumlalele endleleni bufune umcebo wakhe. Umlilo longakavutselwa uyakumshwabudzela umcedze, ukudle konkhe lokusele ekhaya kakhe.

²⁷ Emazulu ayawulenekela lilanga licala lakhe, umhlaba nawo uyawumvukela indlwabane.

²⁸ Sikhukhula siyakwemukisa likhaya lakhe, emagagasi alitfumbe ngelilanga lelulaka lwaNkulunkulu.

²⁹ Sinjalo-ke siphetfo Nkulunkulu lasabele lababi, lifa lelingulona balibekelwa nguNkulunkulu.”