Jobe 19 - Siswati 1996 Bible

Jobe

¹ Jobe wase uyaphendvula, watsi:

² “Nitangivisa buhlungu kuze kube ngunini, solo ningishushumbisa ngemavi labuhlungu?

³ Sengemahlandla lalishumi nyalo solomane ningitsela ngetinhlamba, nite nemahloni ekungetfuka.

⁴ Nangabe kuliciniso phela kutsi ngedukile, lelo phutsa liphutsa lami ngedvwana.

⁵ Nangabe ngempela ningatiphakamisa, nitente ncono kunami, nisebentise lesehlakalo lesingehlele kutsi nimelane nami,

⁶ yatini-ke kutsi nguNkulunkulu longonile, wangigigela ngelugibe lwakhe.

⁷ “Naloku ngikhala: ‘Ngimi lengoniwe!’ Kodvwa angiphendvulwa; naloku ngicela lusito, kute kwetsembeka.

⁸ Utivalile tindlela tami, entela kutsi ngingakhoni kwendlula, wembatsise tindlela tami ngebumnyama.

⁹ Ungembule kuhlonipheka kwami, wesusa umchele wami enhloko yami.

¹⁰ Ungidladlabula ngala nangala ngize ngingabikho, uzuphuna litsemba lami njengelukhula.

¹¹ Lulaka lwakhe luyangivutsela, ungibala kanye netitsa takhe.

¹² Emabutfo akhe ayashuca atengihlasela, akha tindvundvuma tekungivimbetela, akambe atungeleta likhaya lami.

¹³ “Ungehlukanise nebazalwane bami, bangigucukela, sengehlukene nalabo bengetayelene nabo.

¹⁴ Tihlobo tami tingishiyile, bangani bami bangikhohliwe.

¹⁵ Tivakasheli tasekhaya kami setiyangiphika kutsi tiyangati; nesisebenti lesisikati sasekhaya kami sesitsi ngisihambi, sebangitsatsa njengemhambuma.

¹⁶ Nome ngitsi ngibita sisebenti sami, asisasabeli, nome sengisicela mine, ngisincenga ngemlomo wami.

¹⁷ Umphefumulo wami sewuyanuka kumfati wami, kubomnaketfu sengiyenyanyeka.

¹⁸ Ngisho nekwebafanyana lokuncane sekuyangedzelela, nangitsi ngiyachamuka, bachwebana ngami bahleke.

¹⁹ Bonkhe bangani bami lebengitsi bevakala ekhaleni sebayacansuka ngami; labo labatsandzekako kimi sebangigucukele.

²⁰ Sengingumbambo tiyabalwa, ngisindze ngekulambisa.

²¹ “Mane sale ningihawukela, bangani bami, mane sale nihawukela mine, sandla saNkulunkulu singinhlakayile.

²² Ningishophelani, nani nilingise Nkulunkulu lolibele kucoshana nami? Anisenakweneliseka yini kani ngalokubola kwesikhumba semtimba wami?

²³ “Awu! Kube fane lamagama ami lengiwakhulumako abengabhalwa phansi, kube fane abengabhalwa encwadzini legocotwako,

²⁴ kube fane abengacoshwa ngelusungulo emtfofini, nome acoshwe edvwaleni laphakadze naphakadze.

²⁵ Kodvwa mine ngiyati kutsi uMhlengi wami uyaphila, nekutsi ekugcineni utakuma etikwalomhlaba.

²⁶ Ngisho nome umtimba wami sewubhujisiwe, kodvwa noko emtimbeni wami ngiyawumbona Nkulunkulu.

²⁷ Mine cobo lwami ngiyawumbona ngewami emehlo, mine lo, hhayi lomunye. Maye, inhlitiyo yami seyiyamlangatelela!

²⁸ “Naningatsi: ‘Siyawumkhandzelwa ngubani, njengaloku imphandze yayo yonkhe lenhlupheko ikuye?’

²⁹ Kufanele nani nesabe inkemba, ngobe lulaka lwakhe luyakwehlisa sijeziso ngayo inkemba, ngulapho niyawufundza nicondze khona kutsi kukhona kwehlulelwa.”