Jobe 17 - Siswati 1996 Bible

¹ “Umoya wami wephukile, emalanga ami ajutjiwe aba mafisha, sengimelwe lithuna.

² Ngempela bahhalatisi bangikakile, emehlo ami afanele ahlalele kubuka lokungichoshela kwabo.

³ “Awu, Nkulunkulu! Ngihlawulele! Kodvwa ngubani nje lomunye longangimela?

⁴ Utivalile tingcondvo tabo, abasangiva nekungiva, ngako ngeke usabaphumelelisa.

⁵ Umuntfu ujabulisa bangani bakhe ngekudla, babe bantfwabakhe bagolela timphungane emlonyeni.

⁶ “Nkulunkulu sewungente inhlekisa kubo bonkhe, ngaba ngumuntfu lokhafulelwa ebusweni.

⁷ Emehlo ami asaze alutfuli ngenca yebuhlungu, bungimi bonkhe bami sebusitfunti nje.

⁸ Bantfu labacotfo sebamangele ngalendzaba yami, labangenacala bavukela laba labangamesabi Nkulunkulu.

⁹ Noko, labangcwele batawubambelela etindleleni tabo, nalabo labatandla tabo tingenacala lalutfo batawuchubeka babe nemandla lamasha.

¹⁰ “Kodvwa ase nibuye lapha nonkhe, ase netame futsi! Ngingeke ngitfole ngisho namunye lohlakaniphile emkhatsini wenu.

¹¹ Emalanga ami asendlulile, tinhloso tami setephukile, kanjalo tifiso tenhlitiyo yami tehlulekile.

¹² Lamadvodza lawa agucula busuku bube yimini, kutsi ekhatsi nebusuku batsi bona: ‘Sekuyasa.’

¹³ Kube-ke likhaya lami lebekulitsemba lami lekugcina bekulithuna, kube-ke bengendlele licansi lami ebumnyameni,

¹⁴ kube bengingatsi kulokubola: ‘Wena ungubabe,’ nasetimphetfwini ngitsi: ‘Wena ungumake,’ nome: ‘Ungudzadzewetfu,’

¹⁵ ngabe likuphi litsemba lami? Ngubani nje longalibona litsemba lami?

¹⁶ Litakwehla yini liye emasangweni ekufa? Sitakwehlela elutfulini kanyekanye yini?”