Jobe 16 - Siswati 1996 Bible

Jobe

¹ Jobe waphendvula, watsi:

² “Setinyenti kakhulu tintfo letinjalo lengitivile. Nine nonkhe nje nibadvudvuti lababi.

³ Kantsi akasanawuphela yini lamavi enu langumoya? Nine nihlushwa yini kangako, kutsi seningalibala kuphikisana nje ngelite?

⁴ Nami kodvwa empeleni bengingakhuluma kanjalo, kube nine beningimi nami ngingini. Nami bengingakhuluma ngimelane nani ngemavi lamanyenti, ngininikinele inhloko.

⁵ Kodvwa umlomo wami bewunganikhutsata. Indvudvuto lebeyingaphinyiselwa tindzebe temlomo wami beyingaba kuphumula emiphefumulweni yenu.

⁶ “Noko nome ngikhuluma, iminjunju yemahlaba lakimi ayikagobi, kantsi nome bengingatibamba, ngiticinise, ayikapheli.

⁷ Awu! Empeleni, Nkulunkulu, sewungigugisile. Empeleni ubhubhise umndeni wami wonkhe.

⁸ Ungibambile, loko sekube ngubona bufakazi. Nalokuba ngumkhehlekhehle kwami kuya ngekuya kuyandza kumelana nami.

⁹ Ngentfukutselo yakhe Nkulunkulu uyanginwabulula, wehlukanisa sankhala nesiphanga, angibuke ngeliso lelibi.

¹⁰ Bantfu sebasitakele ngami, nguleyo ndvodza itisholo lekutsandzako ngami, banginhlakaya sihlatsi ngekungicoloshela, sebangakhele luzungu bahlangana ngami.

¹¹ Nkulunkulu sewungilahlele kubantfu lababi, wangijikijela etidladleni talabangakalungi.

¹² Konkhe bekungihambela kahle, kodvwa Nkulunkulu ungibambe ngabhongwane, wangihlantisa konkhe ngekungihlifita, wangenta inkoyoyo yakhe,

¹³ labanemba ngebutjoki bangikake ngala nangala. Ungijijimeta etinsweni angasenasihawu nami. Inyongo yami icitsekela phansi emhlabatsini.

¹⁴ Ungihlaba emaphindze, angijijimete njengengwazi lehlanyiswa yinzondo.

¹⁵ “Ngiyatililela, ngembetse tingubo temasaka. Ngihleti lapha elutfulini, ngiyabhuquta njengalosehlulekile.

¹⁶ Sengikhale ngaze ngabheja ngaba bovu ebusweni. Emehlo ami asavuvuke aze aba naletimnyama tingobho.

¹⁷ Kodvwa noko tandla tami timsulwa ekulweni, nemkhuleko wami uhlobile.

¹⁸ “Awu, mhlaba, awusiyigcibedzela ingati yami. Shangatsi kukhala kwami kungete kwathuliswa.

¹⁹ Kodvwa nanyalo ukhona fakazi wami ezulwini, ummeli wami ukulelisetulu live.

²⁰ Umncuseli wami ungumngani wami, ngesikhatsi emehlo ami aphophota tinyembeti kuNkulunkulu,

²¹ uncengela umuntfu kuNkulunkulu, njengemuntfu ancengela umngani wakhe.

²² “Sekusele iminyakana nje lembalwa kutsi yendlule, bese nami ngingenela indlela lekuhanjwa ngayo ungaphindzi ubuye ngayo futsi.”