Jobe 14 - Siswati 1996 Bible

¹ “Umuntfu lotelwe ngumfati unemalangana nje lambalwa ekuphila, nawo agcwele lusizi.

² Ubhahela njengembali, bese uyabuna, akakhonsi, usheshe anyamalale njengesitfunti.

³ Ungawabeka yini emehlo akho entfweni lenjengami? Kona ungangiletsa yini embikwakho utengehlulela?

⁴ Ngubani longakhipha lokuhlantekile kulokungakahlanteki? Kute!

⁵ Emalanga ekuphila kwemuntfu asancunywa, nelinani letinyanga tekuphila kwakhe walimisa; kwajutjwa ngisho nemikhawulo yakhe langeke ayengce.

⁶ Ngako ungamnaki, mshiye yedvwana, abale ema-awa onkhe emalanga njengesisebenti lesicashiwe.

⁷ “Nangabe sihlahla sesijutjiwe, likhona litsemba lekutsi singahle siphindze sihlume futsi, kantsi nalawo mahlumela aso angeke abune.

⁸ Timphandze taso tingaguga emhlabatsini nesiphunti saso sife lapha phansi,

⁹ noko ngekuva umswakama wemanti siyahluma, kumile emahlumela njengesihlahla.

¹⁰ Kodvwa umuntfu uyafa angcwatjwe, kube kuphela kwakhe, kutsi kungaphuma umphefumulo kube kuphela kwakhe.

¹¹ Njengobe emanti anyamalala elwandle, nanjengobe nesihlambo semfula siyahamuka some,

¹² umuntfu ulala kanjalo-ke angabe asavuka, kuyawuze kwendlule emazulu; yebo, umuntfu angeke aphaphame, futsi ngeke avuke ekufeni kwakhe.

¹³ “Ngifisa shangatsi ungangifihla ethuneni, ungibhacise khona kuze kwendlule intfukutselo yakho! Nawungamane nje ungincumele sikhatsi, ungikhumbule!

¹⁴ Nangabe umuntfu afa, uyawuphindze aphile yini? Kuwo onkhe emalanga ekusebenta kwami kamatima ngiyakuma kuze kufike kuvuseleleka kwami.

¹⁵ Uyawungibita, mine ngikuphendvule. Uyawufisa kubona leso sidalwa lesentiwa tandla takho.

¹⁶ Uyawutibala tonkhe tinyatselo tami lengititsatsako, kodvwa awuyikungibamba umbalo ngenca yetono tami.

¹⁷ Tiphambuko tami uyawutivalela esikhwameni; sono sami uyawusisibekela.

¹⁸ “Kodvwa njengentsaba lekhukhulekako ibhidlike, nanjengelidvwala lelisuswa endzaweni yalo,

¹⁹ nanjengobe emanti agugisa litje, nesihhuhhula semvula sikhukhula umhlaba, kanjalo nelitsemba lemuntfu wena ulibulala, life nya.

²⁰ Umuntfu umehlula kube kanye, esweleke, ugucula buso bakhe, bese uyamcosha.

²¹ Nangabe emadvodzana akhe advunyiswa, loko yena akakwati; nangabe ahlaziswa, loko yena akakuboni.

²² Uva buhlungu bemtimba wakhe, atikhalele yena yedvwa.”