Jobe 13 - Siswati 1996 Bible

¹ “Emehlo ami akubonile konkhe loku, netindlebe tami tikuvile takucondza loku.

² Lenikwatiko nine nami ngiyakwati, anincono ngalutfo kunami.

³ Kodvwa mine ngifisa kukhuluma kuSomandla, nekuphikisana naNkulunkulu ngalendzaba yami.

⁴ Noko, nine ningibhoca ngemanga, nonkhe nifanana netinyanga, kantsi anikwati kwelapha!

⁵ Kube mane nonkhe niyabindza, loko bekungaba kuhlakanipha kini.

⁶ Ase nilalele naku lengitakukhuluma, nive kutsi ngitsini ngemlomo wami.

⁷ Ingabe lobubi nibukhulumela Nkulunkulu yini? Yona lenkhohliso niyikhuluma egameni lakhe yini?

⁸ Netama kumvikela yini? Ningayimelela yini indzaba yaNkulunkulu?

⁹ Kunganihambela kahle yini nakanganihlolisisa? Ningamkhohlisa yini njengobe nikhohlisa bantfu?

¹⁰ Nakanjani Nkulunkulu utanidalula, nangabe nikhetsana ngasese.

¹¹ Inkhatimulo yakhe ingeke yini inesabise? Lulaka lwakhe lungeke yini lwehlele etikwenu?

¹² Loku lenikukhulumako kungumbhedvo nje, netivikelo tenu titivikelo telibumba nje.

¹³ “Ase nibindze, kukhulume mine, ningiyekele ngehlelwe nome ngayini.

¹⁴ Ngitifakelani engotini ngekutsatsa imphilo yami ngiyiphatse ngesandla?

¹⁵ Nome angangibulala, noko ngitakwetsembela kuye. Nakanjani ngitatikhulumela embikwakhe ngetindlela tami.

¹⁶ Ngempela, loko kungahle kunginike siciniseko semphumelelo yami, ngobe kute umuntfu longamesabi Nkulunkulu longahle asondzele kuye.

¹⁷ Lalelisisani kahle emavi ami; tindlebe tenu atikutsatse loku lengikushoko.

¹⁸ Manje njengobe sengiyilungisile indzaba yami, ngiyati kutsi kute lengikonile.

¹⁹ Ngubani nje longangibeka licala? Nakunjalo, ngitawubindza ngife.

²⁰ “Awu, Nkulunkulu, ngicela ungiphe nati tintfo letimbili, khona-ke ngingeke ngibhace embikwakho:

²¹ Susa sandla sakho kimi, uyekele kungetfusa ngetesabiso takho.

²² Ngibite, mine ngitawube sengiyaphendvula, nome-ke angikhulume, wena bese uyaphendvula.

²³ Tingakhi tiphambuko netono lese ngitentile? Ngikhombise licala lami nesono sami.

²⁴ Ubufihlelani buso bakho, ungitsatse njengesitsa sakho?

²⁵ Ungalivisa yini buhlungu licembe leliphephukako? Ungacoshana yini nemakhoba lomile?

²⁶ Ungibeka emacala lamatima, ungetfwese emacala etono lengatenta ngisemusha.

²⁷ Tinyawo tami utinkinka ngetinketane, uticaphele tonkhe tinyatselo tami lengititsatsako, ngekubeka timphawu entsendzeni yetinyawo tami.

²⁸ “Ngako umuntfu uyadleka njengentfo lebolako, nanjengendvwangu ledliwa ngumvunya.”