Jobe 12 - Siswati 1996 Bible

Jobe

¹ Jobe waphendvula watsi:

² “Vele, kuyabonakala kutsi nine nibantfu, kuhlakanipha kuyakufa nani!

³ Kodvwa nami nginengcondvo njengani, kute lenincono ngako kunami. Ngubani nje longatati tonkhe letintfo?

⁴ Sengiyinhlekisa ngisho nakubangani bami, lite nome Nkulunkulu angiphendvula nangikhala kuye, ngaba yintfo yekuhlekwa nje, lite nome ngilungile futsi ngingenacala.

⁵ Bantfu labahleti kahle abamnaki lohluphekile, yena lowo lobisha ekuhluphekeni.

⁶ Emakhaya etigebengu akaphazanyiswa lutfo, nalabo labacunula Nkulunkulu baphephile, yebo, labo labaphetse nkulunkulu wabo ngetandla tabo.

⁷ “Kodvwa hamba ubute etilwaneni, titakufundzisa, nome ubute tinyoni telizulu, titakutjela.

⁸ Khuluma kuwo umhlaba, utakufundzisa; buta nasetinhlantini taselwandle, titakwatisa.

⁹ Ngukuphi emkhatsini wako konkhe loku lokungati kutsi konkhe loku kwentiwa nguSimakadze?

¹⁰ Kuphila kwato tonkhe tidalwa kusesandleni sakhe, kanjalo nemiphefumulo yabo bonkhe bantfu bemhlaba.

¹¹ Indlebe ayikuva yini lokukhulunywako, njengobe nelulwimi lukunambitsa kudla?

¹² Kuhlakanipha akutfolakali yini kulabadzala? Imphilo lendze ayikuletsi yini kucondza?

¹³ “Kuhlakanipha nemandla kwaNkulunkulu, kweluleka nekucondza kwakhe.

¹⁴ Loko lokubhidlitwe nguye, kute longaphindze akwakhe kabusha, umuntfu lamfake ejele angeke akhululwe ngumuntfu.

¹⁵ Nakabamba imvula kuba nesomiso, utsi angawayekela lamanti, ente umonakalo.

¹⁶ Emandla nekuncoba kwaNkulunkulu, umkhohliswa nemkhohlisi, bobabili bakhe.

¹⁷ Wenta babusi batiphatsise kwetilima, ente behluleli babe tilima.

¹⁸ Ukhumula emakhosi emajiva awo ebukhosi, awegabise tindophi tekubopha tigcili netiboshwa.

¹⁹ Wenta baphristi bahambe bate tembatfo, aketule bantfu bebasetikhundleni sikhatsi lesidze.

²⁰ Ubindzisa beluleki labetsembekile, esuse inhlakanipho yebaholi.

²¹ Utfululela lihlazo kulabahloniphekile, abalahlise phansi tikhali labanemandla ekulwa.

²² Wembula tintfo letijulile tebumnyama, aletse ematfunti lamnyama kakhulu ekukhanyeni.

²³ Wenta tive tibe tinkhulu, aphindze atibhubhise, wandzisa tive, aphindze atisakate.

²⁴ Babusi betive temhlaba ubemuka kuhlakanipha, abayekele bazulazule ehlane bangayiboni indlela,

²⁵ badvukute ebumnyameni nekukhanya kungekho, abente badzayitele njengetidzakwa.”