Jobe 11 - Siswati 1996 Bible

Sofari

¹ Sofari, umNama, waphendvula, watsi:

² “Onkhe lamavi kufanele angaphendvulwa yini? Lomuntfu lokhuluma kangaka angatsetselelwa yini?

³ Lenkhulumo yakho lelite ingabathulisa yini bantfu bangabe basakhuluma? Kufanele ungabe usekhutwa yini wena nawukhuluma emavi ekuphukuta?

⁴ Ukhuluma kuNkulunkulu utsi: ‘Timfundziso tami atinasici, futsi ngimsulwa kuwe.’

⁵ Maye, ngifisa shangatsi Nkulunkulu angakhuluma, avule umlomo wakhe akuphendvule.

⁶ Shangatsi angembula kuwe timfihlakalo tekuhlakanipha, ngobe kuhlakanipha kweliciniso kukabili. Yati loku: Kutsi Nkulunkulu akakujezisi ngangekona kwakho.

⁷ “Ungakucondza yini kujula kwetimfihlakalo taNkulunkulu? Ungafinyelela yini emikhawulweni yaSomandla?

⁸ Kuphakeme kunemazulu; yini nje longayenta? Kujule kwendlula indzawo yalabafile; yini nje longayati?

⁹ Silinganiso sako sidze kunemhlaba, futsi sibanti kwendlula lwandle.

¹⁰ “Nangefika lapha akuhhodlele ejele, akubitele ekugwetjweni, ngubani longamelana naye?

¹¹ Ngempela uyabati bantfu labangemacili, kantsi futsi nakabona lokubi, akakutsatseli yini tinyatselo?

¹² Indvodza lesilima iyawucala kuba ngulehlakaniphile, mhlazana imbongolo yesiganga itala umuntfu.

¹³ “Noko nawunikela inhlitiyo yakho ngalokuphelele kuye, welulele tandla takho, ukhuleke, utinikele kuye,

¹⁴ nawulahla sono lesisesandleni sakho, ungavumi nekutsi bubi buhlale ekhaya lakho,

¹⁵ uyawuhamba ngetigi, ungabi nemahloni, utakuma, usime, ungesabi lutfo.

¹⁶ Nakanjani, kuhlupheka kwakho utakukhohlwa, ukukhumbule njengemanti lake ageleta embikwakho,

¹⁷ kuphila kutawukhanya kwendlule imini, bese kutsi bumnyama bufanane nekukhanya kwasekuseni.

¹⁸ Uyawuhlala uphephile, ngobe kunelitsemba, uyawutsi nawucalata nasemaceleni akho, utfole kuphumula kwakho.

¹⁹ Uyawucambalala phansi kubete lokwesabisako; labanyenti bayawucela lusito kuwe.

²⁰ Kodvwa emehlo alababi ayawukwehluleka kubona, ingabikho ngisho nendlela yekubaleka. Litsemba labo seliyawuba kufa.”