Jobe 10 - Siswati 1996 Bible

¹ “Seyiyangicansula yona lemphilo yami. Ngako-ke ngitawusola ngenkhululeko, ngikhulume ngiphumisele bumunyu bemphefumulo wami.

² Ngitawutsi kuNkulunkulu: Ungangilahli, kodvwa ngitjele kutsi cala lini longibeka lona.

³ Kuyakujabulisa yini wena lokungicindzetela, nekwedzelela umsebenti wetandla takho, ulibale kumamatsekiswa ngemacebo lentiwa ngulababi?

⁴ Kantsi wena ubuka ngemehlo enyama yini? Kantsi nawe ubuka njengobe kubona umuntfu wemhlaba yini?

⁵ Emalanga akho anjengewemuntfu wemhlaba yini? Yona leminyaka yakho injengeyemuntfu wemhlaba yini,

⁶ kutsi ungalibala kutakululana nemaphutsa ami nje, nekutfungatsana netono tami?

⁷ Nawe wati kahle nje kutsi anginacala, nekutsi kute nalongahle angisindzise esandleni sakho.

⁸ “Tandla takho tangeluka, tangibumba. Senguwe njalo lotangibhubhisa futsi?

⁹ Khumbula kutsi nguwe lowangibumba njengelibumba, senguwe njalo lotangibuyisela elutfulini futsi?

¹⁰ Akusiwe yini lowangitfulula njengelubisi, wangiphehla njengelibhotela?

¹¹ Akusiwe yini lowangembatsisa ngesikhumba nangetinyama, wangeluka ndzawonye ngematsambo nangemisipha?

¹² Wanginika kuphila, wangentela umusa, nangekungilondvolota kwakho welusa umoya wami.

¹³ “Kodvwa loku wakufihla enhlitiyweni yakho, futsi ngiyati kutsi loku kwakusenhlitiyweni yakho kutsi:

¹⁴ Kube ngake ngona, ngabe wawungibukile, futsi bewungeke ungiyekele ungangijezisi.

¹⁵ Nako kimi nangabe ngingulomubi! Nome ngabe anginacala, bengingeke ngiyetfwale inhloko yami, ngobe ngigcwele emahloni, kuhlupheka kwami kuyangicwilisa.

¹⁶ Nangitsi ngiphakamisa inhloko yami, wena ungihoshobela ungifunise kwelibhubesi, uphindze futsi ungihluphe ngetigemegeme temandla akho lesabekako.

¹⁷ Uyabandzisa bofakazi labemelana nami, wandzise nentfukutselo yakho kimi, utfumele emabutfo ngemabutfo lemelana nami.

¹⁸ “Wawungikhiphelani kwasesiswini? Kube ngamane ngafa ngisengakabonwa nangulinye liso.

¹⁹ Kube ngafane ngangete ngaba khona, nome ngavele ngayiswa emadlizeni.

²⁰ Lamalanga ami lambalwa asengakapheli yini? Ase umane ungishiye ngedvwa, kumbe ngingamane sengitfole litfutjana lekujabula,

²¹ ngisengakayi eveni lengingasoze ngabuya kulo, lekulive lelusizi nelebumnyama lobuphatsekako,

²² yebo, live lebumnyama lobukhulukati, live lelitfunti lelikhulu nenhlakanhlaka, lapho kukhanya kwakhona kufanana nebumnyama.”