Jobe 1 - Siswati 1996 Bible

Tibusiso taJobe

¹ Eveni lase-Usi kwakunendvodza, libito layo kunguJobe. Lendvodza yayimsulwa, ilungile, futsi imesaba Nkulunkulu, ikubalekela konkhe lokubi.

² Jobe abenemadvodzana lasikhombisa nemadvodzakati lamatsatfu,

³ abefuye timvu letatiti-7 000, nemakamela lati-3 000, netinkhabi letiboshelwako letiyinkhulungwane, netimbongolo letinsikati letatingema-500 kanye netisebenti letinyenti kakhulu. Lendvodza yayidvume ngebunjinga lobukhulu, yendlula onkhe emadvodza asemphumalanga.

⁴ Emadvodzana akhe abevamise kwenta emadzili ngemagema emakhaya awo: abeyaye ameme bodzadzewabo labatsatfu kutsi bete batewudla banatse nawo.

⁵ Bekutsi kungendlula lesikhatsi semadzili, bese Jobe utfumela kubantfwabakhe abahlambulule. Abevuka ekuseni ngetingweti abentele bonkhe umnikelo wekushiswa ngekwelinani labo, acabanga atsi: “Mhlawumbe bantfwabami bonile bacalekisa Nkulunkulu etinhlitiyweni tabo.” Lona bekungumkhuba waJobe, labewenta njalo nje.

Kuvivinywa kwaJobe kwekucala

⁶ Kwatsi ngalelinye lilanga emadvodzana aNkulunkulu atsatsa tindzawo tawo embikwaSimakadze, naSathane watfolakala asemkhatsini wawo.

⁷ Simakadze wabuta Sathane, watsi: “Uphumaphi?” Sathane waphendvula Simakadze, watsi: “Ngiphuma kuyawuhlamahlama emhlabeni lapho bengihambahamba khona ngehla ngenyuka.”

⁸ Simakadze wabuta Sathane, watsi: “Uyibonile yini inceku yami Jobe? Kute namunye umuntfu longamtfola emhlabeni lofanana naye; umsulwa, ucotfo ngenhlitiyo, ungumuntfu lowesaba Nkulunkulu nalokubalekelako lokubi.”

⁹ Sathane waphendvula, watsi: “Usho kutsi Jobe abengakukhonta yini, kube abengatfoli lutfo kuwe?

¹⁰ Awukambiyeli ngelutsango yini Jobe kanye nemndeni wakhe nako konkhe lanako? Uwubusisile umsebenti wakhe wetandla, waze wamupha ngisho nemihlambi yetifuyo lesetigcwele kulo lonkhe lelive.

¹¹ Kodvwa ase welulele sandla sakho kuko konkhe lanako, ubone kutsi angeke yini akwetfuke.”

¹² Simakadze wakhuluma kuSathane, watsi: “Kulungile, konkhe lanako kusetandleni takho, kodvwa ungasibeki sandla sakho emtimbeni wakhe.” Ngako Sathane wahamba, wesuka kuSimakadze.

Kubhujiswa kwebantfwana baJobe nekuphela kwengcebo yakhe

¹³ Ngalelinye lilanga atsi emadvodzana nemadvodzakati aJobe adla lidzili anatsa neliwayini endlini yemnakabo lomkhulu,

¹⁴ kwefika sigijimi kuJobe, satsi: “Sitsite sisalima ngetinkhabi ensimini, timbongolo tidla lapha eceleni kwato,

¹⁵ kwefika emaSabi asihlasela, atitfumba. Tinceku takho atibulele tonkhe ngenkemba; ngimi kuphela losindzile, ngase ngiyabaleka ngita lapha kuwe kutekwatisa ngaloko!”

¹⁶ Satsi sisakhuluma lesigijimi, kwefika lesinye, satsi: “Umlilo waNkulunkulu wehle esibhakabhakeni washisa tonkhe timvu takho kanye nato tonkhe tinceku takho; ngimi kuphela losindzile, ngase ngiyabaleka ngita lapha kuwe kutekwatisa ngaloko!”

¹⁷ Satsi sisakhuluma leso sigijimi, kwefika lesinye, satsi: “EmaKhaledi ente ticheme letintsatfu awatfumba onkhe emakamela akho ahamba nawo. Abulele tonkhe tinceku takho ngenkemba; ngimi kuphela losindzile, ngase ngiyabaleka ngita lapha kuwe kutekwatisa ngaloko!”

¹⁸ Naleso satsi sisakhuluma, kwefika lesinye, satsi: “Emadvodzana nemadvodzakati akho abedla lidzili anatsa liwayini endlini yemnakabo lomkhulu,

¹⁹ kwefika umoya lomkhulu uchamuka ngasehlane, wabhidlita lendlu, onkhe emakona ayo lamane. Ivele yawela etikwabo, bafa bonkhe; ngimi kuphela losindzile, ngase ngiyabaleka ngita lapha kuwe kutekwatisa ngaloko!”

²⁰ Watsi kube akuve loko Jobe, wasukuma waklebhula timphahla takhe, wahhula inhloko yakhe. Wesuka lapho watilahla phansi emhlabatsini wakhotsama,

²¹ watsi: “Ngaphuma esiswini samake ngingcunu, kanjalo futsi ngiyawubuyela ngingcunu. Simakadze uphile, Simakadze utsatsile. Alidvunyiswe libito laSimakadze.”

²² Kuko konkhe loku Jobe akazange one ngekutsi asole Nkulunkulu.