Jeremiya 49 - Siswati 1996 Bible

Livi laSimakadze nge-Amoni

¹ Macondzana nema-Amoni: Naku lokushiwo nguSimakadze, utsi: “Israyeli akanamadvodzana yini? Ute yini tindlalifa? Kepha kwentiwa yini kutsi Moloki atsatse Gadi amente wakhe? Kwentiwa yini kutsi bantfu bakhe bahlale emadolobheni akhe?”

² Simakadze utsi: “Kodvwa ayeta emalanga, lapho ngiyakwenta kutsi kuhlatjwe umkhosi, ngimelane neRabha yema-Amoni; iyawuba yindvundvuma yemadzibikelo, netabelo tayo letiyitungeletile tiyawulunyekwa ngemlilo. Israyeli-ke uyawubadvungulula labo labamkhipha ngendlovuyangena,” kusho Simakadze.

³ “Khala, wena Heshboni, ngobe i-Ayi ibhujisiwe! Khalani nimemete, nine lenihlala eRabha! Yembatsani emasaka nilile, gijimani lapha nalapha ekhatsi emitsangaleni, ngobe Moloki utawuyiswa ekudzingisweni, yena kanye nebaphristi bakhe netiphatsimandla takhe.

⁴ Nitishayelani tifuba ngenca yetigodzi tenu, nitigabatise ngetigodzi tenu letitselako? Awu, ndvodzakati lengaketsembeki, wetsembela ebunjingeni bakho utsi: ‘Ngubani lotangihlasela?’

⁵ Ngitakwehlisela sesabiso etikwakho sichamuke kubo bonkhe lababomakhelwane bakho, nonkhe niyawudvungululwa nicoshwe, kute loyawubutsa lababalekile,” kusho Simakadze, Simakadze longuSomandla.

⁶ “Noko emvakwaloko ngiyawutibuyisela tibusiso tase-Amoni,” kusho Simakadze.

Livi laSimakadze nge-Edomu

⁷ Macondzana ne-Edomu: Naku lokushiwo nguSimakadze longuSomandla, utsi: “Sekwabate yini kuhlakanipha eThemani? Setaphela yini teluleko kulabahlakaniphile? Kuhlakanipha kwabo sekwabola yini?

⁸ Jikani nibaleke, bhacani emigedzeni leshonako, nine lenihlala eDedani, ngobe ngiyakwehlisela inhlekelele ka-Esawu, ngesikhatsi nangimjezisa.

⁹ Kube bavuni bemagelebisi bebangefika lapha kini, bebangete banishiyela yini lambadlwana? Kube emasela abengefika ebusuku, abengete akweba yini loko lakutsandzako kuphela?

¹⁰ Kodvwa Esawu yena ngitamhlubula abe ngcunu, ngitatigwabula tindzawo lapho abhace khona, kuze angetutifihla ndzawo. Bantfwabakhe, netihlobo nabomakhelwane bakhe bayawubhubha, angeke aphindze abe khona.

¹¹ Shiya tintsandzane takho, ngitativikela timphilo tato, nebafelokati bakho nabo bangetsembela kimi.”

¹² Naku lokushiwo nguSimakadze, utsi: “Nangabe labo labangakafaneli kunatsa kulendzebe, kumelwe bayinatse, kudzingeke ngani-ke kutsi wena ungajeziswa? Ungeke uhlale ungajeziswa, kufanele nawe uyinatse.

¹³ Ngitifunga mine, kutsi iBhosra iyawubhidlitwa ibe yintfo yekwesabisa, intfo yelihlazo, neyekucalekisa, nawo onkhe emadolobha ayo ayawuba ngemadzibikelo aphakadze,” kusho Simakadze.

¹⁴ Ngive umlayeto lovela kuSimakadze. Kwatfunyelwa emancusa etiveni atewutsi: “Hlanganani niteyihlasela! Sukumelani imphi!”

¹⁵ “Nyalo-ke, sengitawukwenta ube ngulomncane emkhatsini wetive, wedzeleleke emkhatsini webantfu.

¹⁶ Lokwesabeka kwakho nekukhukhumala kwenhlitiyo yakho kukuyengile, wena lohlala ekhatsi emifantfwini yemadvwala, wena lohlala eticongweni teligcuma. Nome wakha sidleke sakho lapha etulu njengelusweti, kodvwa ngiyawukwehlisela phansi,” kusho Simakadze.

¹⁷ “I-Edomu itawuba sesabiso; bonkhe labendlula ngendlela bayawumangala bahleke bulima ngenca yawo onkhe emanceba ayo.

¹⁸ Njengobe neSodoma neGomora yagumbucelwa kanye nemadolobha labeyitungeletile, kanjalo nakuyo i-Edomu kuyawubate lohlala kuyo, kute muntfu loyakwakha kuyo,” kusho Simakadze.

¹⁹ “Njengelibhubesi nalichamuka emahlatsini aseJordane liya eveni lelinemadlelo laluhlata, ngiyawubatuma base-Edomu, ngibacoshe eveni labo. Ngubani lokhetsiwe, lengiyawumbekela loku? Ngubani lonjengami? Kona nje ngubani longangicela insayeya? Ngumuphi umelusi longamelana nami?

²⁰ Ngako-ke, vanini losekulungiswe nguSimakadze engcondvweni yakhe nge-Edomu, loko lasatimisele kukwenta kulabo labahlala eThemani: Ematfole emhlambi ayawuhudvulwa, uyakuwabhubhisa awacedze emadlelo abo ngenca yabo.

²¹ Ngemsindvo wekuwa kwabo umhlaba uyawutfutfumela; kukhala kwabo kuyawuvakala kuklaza naseLwandle Lolubovu.

²² Njengelusweti lwendlele timphiko talo uyawujubalata antjweze ehlele etikweBhosra. Ngalelo langa tinhlitiyo tetingwazi taka-Edomu tiyawuba njengenhlitiyo yemfati, nakaphetfwe ngumhelo.”

Livi laSimakadze ngeDamaseko

²³ Macondzana neDamaseko: “IHamathi ne-Aphadi kujabhile, ngobe kuve tindzaba letimbi. Kuphelelwe tinhlitiyo, kugubhutele njengemagagasi elwandle.

²⁴ IDamaseko seyibutsakatsaka, seyigucukele kubaleka, nekutfutfumela kuyibambile, kudzabuka kwenhlitiyo neminjunju kuyibambile, iminjunju lenjengeyemfati, nakaphetfwe ngumhelo.

²⁵ Lelidolobha lelineludvumo lolungaka alikayekelwa ngani, lelidolobha lami lapho ngitijabulisa khona?

²⁶ Ngempela, emajaha akhona ayakuwela etitaladini talo; onkhe emabutfo alo ayawuvalwa umlomo, abhujiswe ngalelo langa,” kusho Simakadze.

²⁷ “Ngiyawulumeka umlilo etibondzeni taseDamaseko; umlilo uyawudla tinqaba taBheni Hadahi.”

Livi laSimakadze ngeKhedari nangeHasori

²⁸ Macondzana neKhedari nemibuso yaseHasori, leyahlaselwa nguNebukhadnezari, inkhosi yaseBhabhulona: Naku lokushiwo nguSimakadze, utsi: “Sukumani nihlasele iKhedari, nibhubhise bantfu basemphumalanga.

²⁹ Emathende abo kanye nemihlambi yabo kuyawutsatfwa, nemadlangala abo ayakwetfwalwa atfunjwe nato tonkhe timphahla tabo nemakamela abo. Bantfu bayawumemeta kubo, batsi: ‘Tesabekiso yonkhe indzawo.’

³⁰ “Phangisani nibaleke! Bhacani emigedzeni leshonako, nine lenihlala eHasori,” kusho Simakadze. “Nebukhadnezari, inkhosi yaseBhabhulona, seyinakhele lisu; sewubophe luzungu ngani,” kusho Simakadze.

³¹ “Sukumani nihlasele lesive lesikhibikile, lesihleti ngesibindzi, sive lesingenamasango lacinile, ngisho nemicabo. Bantfu baso bahlala ngabodvwa,” kusho Simakadze.

³² “Emakamela abo atsi atawuba yimphango, nemihlambi yabo lemikhulu itawuba yimphango. Ngiyawubasakatela emoyeni labo labasemaveni lakhashane, ngiyawubehlisela tigemegeme letivela ndzawo tonkhe,” kusho Simakadze.

³³ “IHasori kuyawuba yindzawo lehlushwa timphungutja, indzawo leyawusala ikhala libhungane kuze kube nguphakadze. Kute muntfu loseyawubuye ahlale kuyo, yebo, kute loyawukwakha kuyo.”

Livi laSimakadze nge-Elamu

³⁴ Leli livi laSimakadze lelafika kuJeremiya, umphrofethi, macondzana ne-Elamu, ekucaleni nje kwekubusa kwaSedekiya, inkhosi yakaJuda:

³⁵ Naku lokushiwo nguSimakadze longuSomandla, utsi: “Buka la, butjoki ba-Elamu ngitabephula, yebo, sisekelo semandla abo.

³⁶ Ngiyawutfumela imimoya lemine e-Elamu, imimoya lesuka emagumbini lamane emazulu. Ngiyawubasakatela emimoyeni lemine, kuyawubate sive, lapho kungayikuba khona base-Elamu labacoshiwe.

³⁷ Ngiyakwenta i-Elamu kutsi iphele emandla embikwetitsa tayo, emehlweni alabo labatfungatsa timphilo tayo. Ngiyakwehlisela sigemegeme etikwabo, yebo, ngisho nekutfukutsela kwami lokwesabekako,” kusho Simakadze. “Ngiyawubacosha ngenkemba, ngidzimate ngibabhubhise ngibacedze.

³⁸ Ngiyawumisa sihlalo sami sebukhosi e-Elamu, ngibhubhise inkhosi yayo netiphatsimandla tayo,” kusho Simakadze.

³⁹ “Noko, ngiyawuphindze ngitibuyisele tibusiso tase-Elamu, ngemalanga letako,” kusho Simakadze.