Jeremiya 48 - Siswati 1996 Bible

Livi laSimakadze ngeMowabi

¹ Macondzana neMowabi: Naku lokushiwo nguSimakadze longuSomandla, Nkulunkulu wema-Israyeli, utsi: “Maye kuyo iNebo, ngobe itawubhidlitwa. IKhiriyathayimu iyawuhlazeka itfunjwe, inqaba iyawuhlazeka ihhihlitelwe phansi.

² IMowabi ayisayiwuphindza idvunyiswe; eHeshboni emadvodza ayawuyakhela emasu ekuyiwisa atsi: ‘Buyani sitewusicedza lesive, singaphindzi sibe sive.’ Nawe futsi wena Madmeni, uyawubindziswa, uyawuvalwa umlomo, uyawube ucoshwa yinkemba.

³ Lalelani kukhala lokuvela eHoronayimu, kukhala kwemonakalo lomkhulu nekwembhubhiso.

⁴ IMowabi iyawubhidlitwa, tinswane tiyawukhala kabuhlungu.

⁵ Bayakwenyuka ngendlela leya eLuhithi bahambe bakhihlita sililo lesibuhlungu; emgwacweni lobheke entansi eHoronayimu kuvakala kukhala kamunyu ngenca yalembhubhiso.

⁶ Balekani niphephise imphilo yenu, banini njengesihlahla lesisehlane.

⁷ Njengobe netsembele etentweni tenu nasebunjingeni benu, nani niyawutsatfwa niyiswe ekutfunjweni, naKhemoshi, sithico senu, uyawuyiswa ekudzingisweni kanye nebaphristi bakhe netindvuna takhe.

⁸ Umbhubhisi uyawusukela onkhe emadolobha, kute nalinye lidolobha leliyawuphunyula. Sigodzi siyawuhhihlitwa nelitsafa libhujiswe, ngobe Simakadze sewukhulumile.

⁹ Fakani luswayi kaMowabi, ngobe uyawuba yincitsakalo, emadolobha akhona ayawusala akhala libhungane, sekute muntfu longahlala kuwo.

¹⁰ “Akacalekiswe umuntfu loyeketsisako ekwenteni umsebenti waSimakadze! Akacalekiswe umuntfu lokhweshisa inkemba yakhe ekucitseni ingati!

¹¹ “Mowabi abesaphumulile kusukela kwasebusheni bakhe, njengeliwayini lelisele emashiceni, lingakatfululwa kuloludziwo lafakwa kulolwa; akakayi ekudzingisweni. Ngako usanambitseka njengobe abenjalo, neliphunga lakhe alikagucuki.”

¹² Simakadze utsi: “Kodvwa ayeta emalanga, lapho ngiyawutfumela emadvodza latfululanako etindziweni, naye ayakumcitsa, ayawutfulula tindziwo takhe abhidlite letimbita takhe phansi.

¹³ Ngako Mowabi uyawuba nemahloni ngaKhemoshi, sithico sakhe, njengobe nendlu yaka-Israyeli yaba nemahloni nase betsembela eBetheli.

¹⁴ “Ningasho kanjani kutsi: ‘Sitingwazi tsine, emadvodza labokadzebona bemphi’?

¹⁵ Mowabi uyawubhujiswa, nemadolobha akhe ayawuvinjetelwa, emajaha akhona elikhetselo lamahle ayakwehliselwa ekuhlatjweni abulawe, kusho iNkhosi, lelibito layo kunguSimakadze longuSomandla.

¹⁶ Kuwa kwaMowabi sekusedvute, sigameko sakhe sesitawufika masinyane.

¹⁷ Mdvudvuteni nine nonkhe labahlala edvute naye, nonkhe nine lenati ludvumo lwakhe, tsanini: ‘Yephuke njani lendvuku lenemandla kangaka; yephuke kanjani lendvuku yebukhosi!’

¹⁸ “Yehlani ekubabatekeni kwenu nihlale emhlabatsini logagadzekile, awu, nine takhamiti taseDiboni, ngobe lowo lobhubhisa Mowabi utanisukela nani, atewubhidlita emadolobha enu labiyelwe.

¹⁹ Manini emigwacweni nibukele, nine lenihlala e-Aroyeri. Butani kulamadvodza lasubatsako nakulabafati lababalekako nitsi: ‘Kwenteke njani?’

²⁰ IMowabi seyitseleke ngelihlazo, ngobe seyihhihlitiwe. Lilani nikhale kakhulu! Memetelani ngase-Anoni kutsi iMowabi seyibhujisiwe.

²¹ Sijeziso sehlele emadolobha lasetsafeni: iHoloni, neJahasi, neMefathi,

²² neDiboni, neNebo, neBhethi Diblathayimu,

²³ neKhiriyathayimu, neBhethi Gamuli, neBhethi Meyoni,

²⁴ neKheriyothi, neBhosra, nawo onkhe emadolobha akaMowabi lasedvute nakhashane.

²⁵ Luphondvo lwaMowabi lujubekile, luganyuliwe, nemkhono wakhe uganyuliwe,” kusho Simakadze.

IMowabi iyawutfotjiswa

²⁶ “Mdzakiseni, ngobe wedzelele Simakadze. Mowabi akabhucute emahlanteni akhe, akabe yintfo yekuhlekisa.

²⁷ Israyeli abengasiyo yini intfo yakho yekuhlekisa? Abebanjwe emkhatsini wemasela yini kwekutsi ungaze unikine inhloko uhlekise ngaye njalo nje, nawuphatsa libito lakhe?

²⁸ Shiyani emadolobha enu niyewuhlala emkhatsini wemadvwala, nine lenihlala kaMowabi. Lingisani lituba, lona lakha sidleke salo ekungeneni kwemgedze.

²⁹ Sivile ngekutigabatisa kwaMowabi, kutigcabha kwakhe lokukhulu, nangelicholo lakhe, ligcabho lakhe, nekutiphakamisa kanye nekutikhukhumeta kwenhlitiyo yakhe.

³⁰ Ngiyakwati kuchosha kwakhe, kodvwa kulite, nekutishaya sifuba kwakhe akumsiti ngalutfo, konkhe lakwentako kulite,” kusho Simakadze.

³¹ Ngako-ke ngiyamkhalela Mowabi, ngililela bonkhe bakaMowabi. Ngiyawakhalela emadvodza aseKhiri Heresi.

³² Nginikhalela kwendlula kuyikhalela kwami iJazeri, awu, nine tivini taseSibima. Emagala enu endlaleka aze efika elwandle, enaba aze efika elwandle lwakaJazeri. Umbhubhisi sewutselekele titselo tenu, nemagelebisi enu lavutsiwe.

³³ Kutsakasa nenjabulo sekusukile emahlatsini etitselo nasemasimini akaMowabi. Ngikumisile kugeleta kweliwayini ematjeni ekuhlutela, kute nalosawagcobagcoba ngekumemeta kwenjabulo. Nome-ke kukhona lokumemeta, kodvwa akusiko kwenjabulo.

³⁴ “Umsindvo wekukhala kwabo uyenyuka usuka eHeshboni uye e-Eleyale naseJahasi, kusukela eSowari kuze kuyewufika eHoronayimu nase-Eglathi Shelishiya, ngobe ngisho nemanti aseNimrimu asomile.

³⁵ Ngiyawubacedza kaMowabi labo labashisa iminikelo etindzaweni letiphakeme, batfuncise nemphepho etithicweni tabo,” kusho Simakadze.

³⁶ “Ngako inhlitiyo yami ikhala njengemntjingozi, ikhalela iMowabi, intjilota njengemntjingozi ngenca yemadvodza aseKhiri Heresi. Umcebo labewutfola awusekho.

³⁷ Tonkhe tinhloko tawo titimphandla, nato tonkhe tilevu tihhuliwe, tonkhe tandla tijutjiwe, nato tonkhe tinkhalo tembeswe emasaka.

³⁸ Kulo lonkhe luphahla lwakaMowabi nasetinkhundleni tesive kute lokunye ngaphandle kwesililo, ngobe sengiyephulile iMowabi njengeludziwo lolungafunwa ngumuntfu,” kusho Simakadze.

³⁹ “Maye kufabaka kwayo! Maye, bayalila bo! Hhawu, kushwebheta kwaMowabi sekuyindlisamahloni kuyo; Mowabi sewugucuke waba yintfo yekuhlekisa, waba yintfo nje yekwesabisa kubo bonkhe labakhelene naye.”

Kute loyawuphunyula kaMowabi

⁴⁰ Naku lokushiwo nguSimakadze, utsi: “Bukani lusweti luntjweza lwehla, lwendlala emaphiko alo etikweMowabi.

⁴¹ Emadolobha atawutfunjwa, kudliwe netinqaba tawo. Ngalelo langa tinhlitiyo tetihlabani takaMowabi tiyawufanana nenhlitiyo yemfati nasaphetfwe ngumhelo.

⁴² Mowabi uyawubhujiswa angabe asaba sive, ngobe wedzelela Simakadze.

⁴³ Sesabiso, nemgodzi, nelugibe kunihlalele, awu, nine bantfu bakaMowabi,” kusho Simakadze.

⁴⁴ “Wonkhe lobalekela sesabiso uyawuhholokoshela emgodzini. Wonkhe lokhuphukako emgodzini uyawubhajwa elugibeni; ngobe ngiyawehlisela etikwaMowabi umnyaka wakhe wesijeziso,” kusho Simakadze.

⁴⁵ “Esitfuntini saseHeshboni lababalekako bayema nje bangasitakali, ngobe kubhedvuke umlilo eHeshboni, lilangabi lelikhulu ligqamuke ekhatsi eSihoni, lashisa emabunti akaMowabi, netinkhakhayi talabatigabatisako babange umsindvo.

⁴⁶ Maye kuwe, wena Mowabi! Bantfu bakaKhemoshi babhujisiwe; emadvodzana akakho adzingisiwe, nemadvodzakati akho ayiswa ekutfunjweni.

⁴⁷ “Noko ngiyawubuyisela tibusiso takaMowabi ngemalanga letako,” kusho Simakadze. Kuphelela lapha-ke kwehlulelwa kwaMowabi.