Jeremiya 15 - Siswati 1996 Bible

Imbhubhiso yesive sakaJuda

¹ Simakadze wakhuluma kimi, watsi: “Ngisho nome boMosi naSamuweli bebangema embikwami, inhlitiyo yami beyingeke iye kulesive. Bacoshe! Abesuke lapha embikwami!

² Nabakubuta, batsi: ‘Sitawuyaphi?’ batjele utsi: ‘Naku lokushiwo nguSimakadze, utsi: “ ‘Labo labamiselwe kufa, ekufeni; labo labamiselwe inkemba, enkembeni, labo labamiselwe indlala, endlaleni, labo labamiselwe kutfunjwa, ekutfunjweni.’ ”

³ Simakadze utsi: “Ngiyawutfumela tinhlobo letine tebabhubhisi labatakulwa nabo: inkemba yekubulala, netinja tekuhudvulela khashane, netinyoni tasemoyeni, netilwane tesiganga tekushwabudzela nekubhubhisa.

⁴ Ngiyakubenta benyanyeke kuyo yonkhe imibuso yemhlaba ngenca yaloko lokwentiwa eJerusalema nguManase, umsa waHezekiya, inkhosi yakaJuda.

⁵ “Awu Jerusalema, ngubani lotakuhawukela? Ngubani lotakulilela? Ngubani loyakuma akubute kutsi unjani?”

⁶ Simakadze utsi: “Ungilahlile mine. Ulibele kuchubeka nekuhlubuka. Ngako ngitawubeka tandla tami etikwakho, ngikubhubhise, ngingeke ngisaba nesihe kuwe.

⁷ Ngiyakubahlunga ngemfologo yekuhlenga ngasemasangweni emadolobha elive. Ngitawuletsa sifo nembhubhiso esiveni sami, ngobe abakatiguculi tindlela tabo.

⁸ Ngiyakwenta bafelokati babo babe banyenti kwendlula sihlabatsi saselwandle. Emini ngiyawuletsa umbhubhisi loyawucondzana nabonina bemajaha, ngekushesha ngibehlisele buhlungu nekutfutfumela.

⁹ Unina webantfwana labasikhombisa uyawucaleka, aphefumule kwekugcina. Lilanga liyawumshonela emini, uyawutseleka ngelihlazo, adliwe ngemahloni. Ngiyawubulala insali yesive sami ngenkemba embikwetitsa tayo,” kusho Simakadze.

Jeremiya utikhalela kuSimakadze

¹⁰ Maye, make lowangitala, wangiletsa emhlabeni, indvodza, umhlaba wonkhe lowetama kumelana nayo! Angikebolekisi kantsi futsi angikeboleki, noko wonkhe umuntfu uyangicalekisa.

¹¹ Simakadze watsi: “Impela ngiyawukukhululela injongo lenhle, impela ngiyawukwenta titsa takho titincengele kuwe, ngetikhatsi tenhlekelele nangetikhatsi tenjabhiso.

¹² “Umuntfu angayephula yini insimbi, insimbi lephuma enyakatfo, nome litfusi?”

Bunjinga bema-Israyeli buyawutsatfwa titsa tawo

¹³ “Bunjinga bakho nengcebo yakho ngitayinikela ibe yimphango lengabiti lutfo ngenca yato tonkhe tono takho kulo lonkhe live lakho.

¹⁴ Ngiyawukugcilata ngetitsa takho, eveni longalati, ngobe lulaka lwami luyawulumeka umlilo loyawuvutsa umelane nani.”

Jeremiya uchubeka nekutikhalela kuSimakadze

¹⁵ Awu Simakadze, uyacondza, ngikhumbule unginakekele. Ngiphindziselele kubahluphi bami. Uyakwati kubeketela, ungangilahleli khashane, yati kutsi ngisolwa kangakanani ngenca yakho.

¹⁶ Emavi akho atsi nakefika kimi, ngawadla, aba yinjabulo yami nentfokoto yenhlitiyo yami, ngobe ngibitwa ngeLibito lakho, awu, Simakadze Nkulunkulu longuSomandla.

¹⁷ Angizange sengihlale emkhambatsini webatsandzi bemadzili, angizange sengitijabulise kanye nabo. Ngahlala ngedvwana, ngobe sandla sakho sasisetikwami, wawungigcwalise ngentfukutselo enhlityweni.

¹⁸ Kwentiwa yini kutsi iminjunju yami ingapheli, nelinceba lami libe libibitseka, futsi lingelapheki? Vele, kimi utawuba njengemfula lolite yini nanjengemtfombo lote emanti?

¹⁹ Ngako-ke naku lokushiwo nguSimakadze, utsi: “Nawuphendvuka, ngiyawukubutsa, khona utekungikhonta; nawukhuluma emavi lafanelekile, hhayi emavi langenamsebenti, uyawuba lincusa lami. Labantfu abagucukele kuwe, kodvwa wena ungagucukeli kubo.

²⁰ Ngiyawukwenta ube lubondza kulesive, yebo, lubondza lwelitfusi lolucinile: bayakulwa nawe kodvwa bangeke bakwehlule, ngobe nginawe kutsi ngikwephule ngibuye ngikusindzise,” kusho Simakadze.

²¹ “Ngiyawukusindzisa etandleni talababi, ngikuhlenge ekubanjweni ngulabanelulaka.”