Isaya 7 - Siswati 1996 Bible

Sibonakaliso sa-Imanyuweli

¹ Kwatsi ngesikhatsi Ahazi, umsa waJothamu, umsa wa-Uziya, ayinkhosi yakaJuda, boResini, inkhosi yaseSiriya, naPhekha, umsa waRemaliya, inkhosi yaka-Israyeli, bashuca bayawulwa neJerusalema, kodvwa noko abazange bayehlule.

² Indlu yakaDavide yatjelwa kwatsiwa: “ISiriya itihlanganise nelaka-Efrayimu.” Ngako tinhlitiyo tabo-Ahazi kanye netebantfu bakhe tesaba tatfutfumela njengetihlahla telihlatsi, natinyakatiswa ngumoya.

³ Simakadze wakhuluma ku-Isaya, watsi: “Phuma wena nemsa wakho Sheyari Jashubi niyewuhlangabeta Ahazi ngasemseleni wesitiba lesisenhla, emgwacweni loya eNsimini yeMgezi Wetingubo.

⁴ Ubosho kuye utsi: ‘Caphela, uthule, ume sibindzi, ungaphelelwa ngemandla ngenca yaletiphintana letibili taletikhuni letishuncako, nangekuvutsa kwelulaka lwaResini nemaSiriya akhe nelwemsa waRemaliya.

⁵ Siriya, na-Efrayimu, nemsa waRemaliya bakwakhela luzungu, batsi:

⁶ “Asikhuphuke siyewuvimbetela lakaJuda silidzabule ekhatsi, sitehlukanisele lona, bese sibeka umsa waThabheyali kutsi abe yinkhosi etikwalo.”

⁷ Kodvwa naku lokushiwo yiNkhosi Simakadze, itsi: “ ‘Kungeke kwenteke, futsi kungeke kuphumelele.

⁸ Ngobe inhloko yaseSiriya yiDamaseko, nenhloko yeDamaseko nguResini kuphela. Kusengakapheli iminyaka lengema-65, baka-Efrayimu bayawube sebahlakateke kakhulu, sebangasesiso sive.

⁹ Inhloko yaka-Efrayimu yiSamariya, nenhloko yeSamariya ngumsa waRemaliya kuphela. Naningakemi nacina ekukholweni kwenu, ningeke nisema nicinile.’ ”

¹⁰ Simakadze wabuye wakhuluma ku-Ahazi, watsi:

¹¹ “Ticelele sibonakaliso kuSimakadze Nkulunkulu wakho, nome sibe ngulesisekujuleni nome-ke lesiphakeme njengelizulu.”

¹² Kodvwa Ahazi watsi: “Ngingeke ngisicele. Ngingeke ngivivinye Simakadze.”

¹³ Isaya wase utsi: “Lalela lapha, wenandlu yakaDavide! Kuyini kini lokube solomane nihluphana netinhlitiyo tebantfu? Nyalo senifuna nekuhlupha Nkulunkulu wami yini kantsi?

¹⁴ Ngako-ke, Nkulunkulu, yena cobo lwakhe, utawuninika sibonakaliso: Intfombi iyawukhulelwa itale indvodzana, yetsiwe libito kutsiwe ngu-Imanyuweli.

¹⁵ Iyakudla tikhihli temasi netinyosi idzimate ikwati kwala lokubi ikhetse lokuhle.

¹⁶ Kodvwa kuyawutsi lomfana asengakakwati kwala lokubi akhetse lokuhle, lelo live lalamakhosi lamabili lowesabako, liyawube selingasenalutfo.

¹⁷ Simakadze uyawuletsa kuwe nasetikwesive sakini, nasetikwendlu yeyihlo, sikhatsi lesingazange sesibe khona kusukela baka-Efrayimu bahlephuka kubakaJuda; uyawuletsa inkhosi yase-Asiriya.”

¹⁸ Ngalelo langa Simakadze uyawushaya inkwela abite timphungane letingasemifuleni yaseGibhithe kanye netinyosi taseveni lase-Asiriya.

¹⁹ Tiyawubuya tonkhe titewubutsana etihosheni letehlelako kanye nasemifantfwini yemadvwala, nasetikwato tonkhe tihlahla temanyeva nasetimbotjeni tonkhe temanti.

²⁰ Ngalelo langa Simakadze uyawusebentisa insingo lecashwe ngesheya kweMfula, inkhosi yase-Asiriya, kutsi itewuhhula ngayo tinhloko tenu, kanye netiboya letisemilenteni yenu, isuse netilevu tenu.

²¹ Ngalelo langa indvodza iyawufuya litfokati linye netimbuti letimbili.

²² Ngenca yekutsi tiyawube tehlisa kakhulu, iyawuba netikhihli temasi letinyenti tekutondla. Bonkhe labayawube basele kulelo live bayawudla tikhihli temasi kanye netinyosi.

²³ Ngalelo langa kuto tonkhe tindzawo lapho kwakunenkhulungwane yemivini leyayingabita tinhlavu letiyinkhulungwane tesiliva, sekuyakwena kube netitfwetfwe nemanyeva.

²⁴ Emadvodza ayakuya lapho aphetse butjoki bawo nemicibisholo yawo, ngobe lelo live liyawube selene ngetitfwetfwe nangemanyeva.

²⁵ Mayelana nato tonkhe tintsatjana letake talinywa ngemakhuba etandla, ningeke nisaya kuto, ngenca yekwesaba titfwetfwe nemanyeva; setiyawuba tindzawo lapho kudla khona imihlambi yetinkhomo, kugcobagcobe khona netimvu.