Isaya 64 - Siswati 1996 Bible

¹ Awu, shangatsi ungadzabula emazulu, wehlele phansi. Shangatsi tintsaba tingatfutfumela embikwakho!

² Shangatsi kungafanana nemlilo nawulumekela tinsaba, ushisise emanti aze abile! Yehla, utekwenta kutsi titsa takho tilati Libito lakho, wente netive titfutfumele embikwakho!

³ Ngobe watsi nawenta tintfo letesabekako lesasingazange sitilindzele, wehla, tintsaba tatfutfumela embikwakho.

⁴ Kusukela kadzenidzeni kute lowase weva, kute nendlebe leyase yeva, kute liso lelase labona lomunye Nkulunkulu ngaphandle kwakho, lomelela labo labalindzele yena.

⁵ Uyabasita labo labajabulela kwenta lokulungile, labatikhumbulako tindlela takho. Kodvwa tsine sachubeka sona, wena wasitfukutselela. Kepha siyawusindziswa kanjani?

⁶ Sonkhe sesifanana nebantfu labangcolile, nato tonkhe tento tetfu letinhle setifanana netidvwedvwe letingcolile. Sonkhe siyabuna njengelicembe, njengemoya tono tetfu tiyasiphephula.

⁷ Kute namunye lobita Libito lakho, nome lotimisela kubambelela kuwe, ngobe ubufihlile buso bakho kitsi, wasicedza ngenca yetono tetfu.

⁸ Noko, wena Simakadze, unguBabe wetfu. Tsine silibumba, wena ungumbumbi, sonkhe singumsebenti wetandla takho.

⁹ Awu Simakadze, ungatfukutseli kwekwengca, ungatikhumbuli tono tetfu phakadze naphakadze. Awu, siyakuncusa, sibuke, ngobe sonkhe sibantfu bakho.

¹⁰ Emadolobha akho langcwele asalihlane, ngisho neSiyoni imbala seyilihlane, iJerusalema iyincitsakalo.

¹¹ Lithempeli letfu lelingcwele nalelikhatimulako, lapho bobabemkhulu bebakukhonta khona, selishiswe ngemlilo, nako konkhe lebekuligugu kitsi sekuyimfuhlululu nje.

¹² Awu, Simakadze, emvakwako konkhe loku utawuchubeka yini utibambe? Wena utawuthula nje, usijezise ngalokungetulu kwemandla etfu?