Isaya 57 - Siswati 1996 Bible

Kukhonta titfombe kwema-Israyeli kuyasolwa

¹ Lolungile uyabhubha, kubete nalotihluphako ngako enhlitiyweni yakhe. Bantfu labatinikelako bayesuswa, kubete nalokucondzako loko kutsi labalungile bayesuswa, kuze batewuphephiswa kulokubi.

² Labo labahamba ngebucotfo bangena ekuthuleni; batfola kuphumula, nabangena ekufeni.

³ “Kodvwa nine, wotani la, nine madvodzana esangoma lesisikati, nine ntalo yetiphingi neyetingwababane!

⁴ Ngubani lona lenimphukutako? Ngubani lona lenikhombana ngaye ngetinhloko, nisinekelane ematinyo ngaye? Anisiyo yini intalelwane yebahlubuki? Anisiwo yini umliba webacali bemanga?

⁵ Nishiselwa tinkhanuko etihlahleni tema-okhi nangaphansi kwato tonkhe tihlahla letendlala emagala ato. Ninikela ngebantfwabenu emifudlaneni nangaphansi kwemifantfu yemadvwala.

⁶ Emkhatsini wematje labusheleleti asemifudlaneni ukhetsa tithico takho, tona titabelo takho. Yebo, utfululele kuto iminikelo yetinatfo, wanikela nangeminikelo yalokutinhlavu. Ngifanele ngeneliseke yini ngato tonkhe letintfo?

⁷ Wendlale umbhedze wakho etulu etintsabeni letiphakeme, wase wenyukela khona kuyawushisa imihlatjelo.

⁸ Emvakwetivalo nasemvakwetinsika temnyango wakho, ubeke titfombe tetithico takho. Ungikhohliwe mine, wagwabula umbhedze wakho, wagibela kuwo, wawandzisa kakhulu, wavumelana nalabo lotsandza imibhedze yabo, wabukana nebungcunu babo.

⁹ Waya kuMoloki nemafutsa emncumo, wandzisa emakha akho. Watfumela emancusa akho khashane, wehlela edlizeni cobo lwalo!

¹⁰ Ukhatsatwe ngito tonkhe letindlela takho, kodvwa awuzange usho kutsi: ‘Akusiti lutfo.’ Watfola kuvusetelwa kwemandla akho, ngiko nje ungazange ucaleke.

¹¹ “Ngubani lona lebewumvevela kangaka, umesaba, uze ungetsembeki kimi, ungasangikhumbuli, futsi ungasangicabangi ngisho nasenhlitiyweni yakho? Akwentiwa kutsi sengithule sikhatsi lesidze yini lokutsi ungasangesabi?

¹² Ngitakudalula kulunga kwakho kanye nemisebenti yakho, futsi ingeke ikusite ngalutfo.

¹³ Nawukhala ucela kusitwa, leticumbi takho tetithico atikusindzise! Umoya uyawutiphephula tonkhe, umoyana lomncane nje uyawutikhukhula. Kodvwa lowo lowenta mine ngibe siphephelo sakhe, uyawudla lifa lelive, adle lifa lentsaba yami lengcwele.”

Setsembiso saNkulunkulu selusito nekuphilisa

¹⁴ Kuyawutsiwa: “Yakhani, yakhani, lungisani umgwaco. Susani emavimbela endleleni yebantfu bami.”

¹⁵ Ngobe nguloko lokushiwo nguLophakeme Losetulu, lolibito lakhe linguLongcwele, utsi: “Ngihlala etulu endzaweni lengcwele, kodvwa nakuye lodzabukile nalotfobekile emoyeni, kutewuvuselela umoya walabatfobekile nekuvuselela tinhlitiyo talabephukile emoyeni.

¹⁶ Ngingeke ngihlale ngisola njalonjalo, futsi ngingeke ngihlale ngitfukutsele, ngobe phela umoya wemuntfu ungaze ucaleke embikwami, umphefumulo wemuntfu lengamdala.

¹⁷ Bengitfukutseliswe ngulesono sakhe sekuba bukhali, ngase ngiyamjezisa, ngabufihla buso bami ngenca yekutfukutsela, noko wachubeka nekuhlubuka kwenhlitiyo yakhe, ahamba ngendlela yakhe.

¹⁸ Sengitibonile tindlela takhe, kodvwa ngitamphilisa, ngimhole, ngibuyisele indvudvuto kuye,

¹⁹ ngidale tibongelelo etindzebeni temlomo walabalilako baka-Israyeli. Kuthula, kuthula, kulabo labakhashane nalabasedvute,” kusho Simakadze, “ngitawubaphilisa.”

²⁰ Kodvwa lababi banjengelwandle loluyalutelako, lwandle lolute kuphumula, lolumagagasi alo akhephuta ludzaka nelubishi.

²¹ “Kute kuthula kulababi,” kusho Nkulunkulu wami.