Isaya 55 - Siswati 1996 Bible

Nkulunkulu wephana ngemusa

¹ “Wotani, nonkhe nine lenomile, wotani emantini; nani nine lenite imali, sondzelani, nitsenge nidle! Wotani, nitsenge liwayini nelubisi ngaphandle kwemali nangaphandle kwetindleko.

² Niyicitselani imali kuloko lokungesiso sinkhwa? Niyisebentelani intfo lengenelisi? Lalelani, lalelani kimi, nidle loko lokulungile, nemphefumulo wenu uyawujabula ngekudla lokumnandzi kakhulu.

³ Bekani indlebe, nite kimi; vanini, kuze imiphefumulo yenu itewuphila. Ngitakwenta sivumelwane saphakadze nani, nginiphe tibusiso lengatetsembisa Davide.

⁴ Buka la, ngimbeke waba ngufakazi etiveni, yebo, umholi nendvuna yetive.

⁵ Impela, nawe uyawubita tive longatati, netive letingakwati tiyawusheshisa tite kuwe, ngenca yaSimakadze Nkulunkulu wakho, Longcwele waka-Israyeli, ngobe yena ukuphe bukhosi.”

⁶ Funani Simakadze asenekutfolakala; mbiteni asesedvute.

⁷ Lomubi akayiyekele indlela yakhe lembi, nalokhohlakele ayekele imicabango yakhe lemibi. Akaphendvuke abuyele kuSimakadze, uyawuba nemusa kuye, akabuyele kuNkulunkulu wetfu, ngobe uyawumtsetselela ngenkhululeko.

⁸ “Ngobe imicabango yami ayisiyo imicabango yenu, netindlela tenu akusito tindlela tami,” kusho Simakadze.

⁹ “Njengobe emazulu aphakeme kunemhlaba, kanjalo netindlela tami tiphakeme kunetenu, nemicabango yami iphakeme kuneyenu.

¹⁰ Njengobe imvula nesitfwatfwa kwehla kuchamuka ezulwini, kungaphindzi kubuyele kulo kungakawuniseli umhlaba, kuwente uhlume uphindze utsele titselo, khona kutewutsela inhlanyelo yemhlanyeli nesinkhwa salowo lodlako,

¹¹ linjalo-ke nelivi lami leliphuma emlonyeni wami: Lingeke libuye kimi yabayaba, kodvwa liyawukwenta loko lengikuhlosile, liwufeze umgomo walo lengilikhiphele wona.

¹² Nine niyawuphuma ngenjabulo nichubekele embili ngekuthula, tintsaba nemagcuma kuyawuhlokoma kuhlabele ingoma imbikwenu, kutsi tonkhe tihlahla tesiganga tishaye tandla tato.

¹³ Esikhundleni setihlahla temanyeva kuyawukhula tihlahla tesipheshula, esikhundleni senchachabutane kukhule mabovana. Loku kuyawuba sikhumbuto sekudvumisa Simakadze, kube sibonakaliso saphakadze, lesingeke sibhujiswe.”