Isaya 48 - Siswati 1996 Bible

Siphrofetho ngetintfo letinsha

¹ “Lalelani lapha, ninendlu yakaJakobe, nine lenibitwa ngelibito la-Israyeli, futsi niyintalelwane yakaJuda, nine lenenta tifungo egameni laSimakadze, nikhonte Nkulunkulu wema-Israyeli, kodvwa kungabi ngeliciniso nangekulunga,

² nine lenitibita ngekutsi nitakhamiti tasedolobheni lelingcwele, netsembele kuNkulunkulu wema-Israyeli, Simakadze longuSomandla libito lakhe, lalelani naku:

³ Ngakhuluma ngetintfo takucala tingakefiki, ngakhuluma ngato kadzeni, umlomo wami watimemetela, ngatenta tatiwa; ngase ngiyatenta masinyane, tavele tenteka.

⁴ Ngobe nganginati kutsi ninenkhani kangakanani. Imisipha yetintsamo tenu kutinsimbi, nemabunti enu kungewelitfusi.

⁵ Nginitjele tonkhe-ke letintfo kadzenidzeni, kucala tingakenteki ngatimemetela kini, kuze ningetikusho kutsi: ‘Tithico tami takwenta loku; titfombe tami tetigodvo nabonkulunkulu lababunjwe ngensimbi bakulayeta.’

⁶ Nitivile tonkhe-ke letintfo, tibukeni tonkhe. Ningete nativuma yini? “Kusukela nyalo sengitabonitjela tintfo letinsha, tintfo letifihlakele kini, leningatati,

⁷ tintfo letidalwe nyalo, hhayi kadzeni, anizange senive ngato phambilini. Ngako-ke ningeke nisho kutsi: ‘Yebo, mine ngangivele ngati ngato.’

⁸ Anikeva, futsi anikacondzi, kusukela endvulo tindlebe tenu tatisolomane tivalekile. Empeleni bengati kahle hle kutsi naniyengana kanjani, nanibitwa ngekutsi nibahlubuki kusukela ekutalweni.

⁹ Ngenca yeLibito lami ngiyalwephutisa lulaka lwami, ngenca yeludvumo lwami ngiyalubamba, ngingalwehliseli kini, kuze ngingetikunicedza.

¹⁰ Bukani la, nginicolisisile, noko hhayi njengesiliva; nginivivinyile ngemlilo wetinhlupheko.

¹¹ Ngenca yami, nangekwami ngiyakwenta loku. Ngingeke ngivume kutsi Libito lami lihlazeke. Ngingeke nginike lomunye inkhatimulo yami.”

Kukhululwa kwema-Israyeli

¹² “Lalela kimi, wena Jakobe, wena Israyeli lengakubita: Nginguye. Ngiwekucala, futsi ngiwekugcina.

¹³ Tandla tami tatibeka tisekelo temhlaba. Sandla sami sangesekudla sawendlala emazulu; nangikubita, kuyavela konkhe kanyekanye.

¹⁴ “Butsanani nonkhe, nitewulalela: Ngusiphi saletithico lesake satisho letintfo tingakenteki? Sihlobo lesikhetsiwe saSimakadze siyakuyifeza injongo yakhe simelane neBhabhulona. Ingalo yaso iyawumelana nebaseBhabhulona.

¹⁵ Mine, yebo mine ngekwami, sengishito, yebo sengimbitile, ngitamletsa, futsi utawuphumelela kulomsebenti wakhe.

¹⁶ “Sondzelani edvutane nami, nilalele naku: “Kusukela esimemetelweni sekucala angizange ngikhulume emasitseleni, ngalesikhatsi nakwenteka, mine ngisuke sengikhona.” Manje-ke, iNkhosi Simakadze ingitfumile kanye naMoya wayo.

¹⁷ Naku lokushiwo nguSimakadze, uMhlengi wenu, Longcwele waka-Israyeli, utsi: “NginguSimakadze Nkulunkulu wenu, longuyena anifundzisa kutsi ngukuphi lokuncono kunako konkhe kini, lonilayela indlela lekufanele nihambe ngayo.

¹⁸ Kube mane naniyilalela imiyalo yami, kuthula nenhlalakahle yenu ngabe kunjengemifula, kulunga kwenu kube njengemagagasi elwandle.

¹⁹ Titukulwane tenu ngabe tingangetihlabatsi. Bantfwabenu ngabe bangangetinhlavu letingenakubalwa, emabito abo abengayiwuncanyulwa lutfo, abengayiwubhujiswa embikwami.”

²⁰ Sukani lapha eBhabhulona. Wabalekeleni emaBhabhulona. Kumemeteleni loku ngenjabulo lenkhulu, nikubabate, kutfumeleni emikhawulweni yemhlaba, nitsi: “Simakadze umhlengile Jakobe, inceku yakhe.”

²¹ Abazange sebome ngesikhatsi abahola ehlane; wabavulela emanti agobhota edvwaleni, wacheketa lidvwala, kwampompota emanti.

²² Simakadze utsi: “Kute kuthula kulababi.”