Isaya 43 - Siswati 1996 Bible

Nkulunkulu wetsembisa kukhulula sive sakhe

¹ Kodvwa nyalo, naku lokushiwo nguSimakadze, lowo lowakudala, wena Jakobe, lowo lowakubumba, wena Israyeli, utsi: “Ungesabi, ngobe ngikuhlengile, Ngikubite ngelibito lakho, wena uwami.

² Nawudzabula ekhatsi emantini, mine ngitawuba nawe; nanawudzabula ekhatsi emifuleni, ingeke ikukhukhule. Nawuhamba udzabula ekhatsi emlilweni, ngeke ushe, emalangabi ngeke akulumekele.

³ Ngobe mine nginguSimakadze Nkulunkulu wakho, Longcwele waka-Israyeli, uMsindzisi wakho, ngitawuhlawula ngelive laseGibhithe, ngishintjiselane iKushe neSheba ngawe.

⁴ Njengobe wena uligugu kimi, uhloniphekile emehlweni ami, nanjengobe ngikutsandza nje, ngitawunikela bantfu ngenca yakho, netive ngitishintjise ngekuphila kwakho.

⁵ Ungesabi, ngobe nginawe; bantfwabakho ngitabaletsa kusuka emphumalanga, ngikubutse wena kusukela enshonalanga.

⁶ Ngiyawukhuluma nenyakatfo ngitsi: ‘Bakhulule,’ neningizimu ngikhulume kuyo ngitsi: ‘Ungabagodli.’ Buyisani emadvodzana ami kusukela khashane, nemadvodzakati ami kusukela emikhawulweni yemhlaba,

⁷ bonkhe lababitwa ngelibito lami, labo lengabadalela ludvumo lwami, yebo, labo lengababumba ngabenta.”

Israyeli ungufakazi waSimakadze

⁸ Letsani labo labanemehlo kodvwa babe batimphumphutse, labo labanetindlebe kodvwa babe batihhulu.

⁹ Tonkhe tive tibutsana ndzawonye, nebantfu bonkhe bayahlangana. Ngusiphi emkhatsini wetithico tabo lesake sakukhuluma kucala loku kungakenteki, samemetela kitsi tintfo takadzeni? Abaletse bofakazi babo, batewusikhombisa kahle kutsi bebasho kona, khona labanye batewuva batsi: “Kuliciniso.”

¹⁰ Simakadze utsi: “Nine ma-Israyeli, nibofakazi bami kanye nenceku yami lengiyikhetsile, kuze nitewukwati nikholwe kimi, nicondze nekutsi mine Nginguye. Ngaphambi kwami kute nkulunkulu lowake wabunjwa, futsi kute loyawubuye abe khona emvakwami.

¹¹ Mine, nginguye Simakadze, ngaphandle kwami kute umsindzisi.

¹² Ngembulile, ngasindzisa, ngamemetela, ngimi, akusiso sithico sebetive lesisemkhatsini wenu. Nine nibofakazi bami kutsi mine nginguNkulunkulu,” kusho Simakadze.

¹³ “Yebo, kusukela endvulo solomane Nginguye. Kute longakhulula esandleni sami. Nangenta lutfo, ngubani longakujikisa loko?”

Kubaleka eBhabhulona

¹⁴ Naku lokushiwo nguSimakadze, uMhlengi wenu, Longcwele waka-Israyeli, utsi: “Ngenca yenu ngitawutfumela eBhabhulona, ngibabuyise njengemambuka bonkhe baseBhabhulona, ngibabuyise ngemikhumbi lababetigabatisa ngayo.

¹⁵ NginguSimakadze, Longcwele wenu, uMdali wema-Israyeli, iNkhosi yenu.”

¹⁶ Naku lokushiwo nguSimakadze, lowo lowavula indlela ekhatsi elwandle, wenta umkhondvo ekhatsi emantini lanemandla,

¹⁷ lowadvonsa tincola temphi kanye nemahhashi, emabutfo nemachawe onkhe kanyekanye kwalala khona lapho, akuyiwuphindze futsi kuvuke, kwacinywa, kwaphuphutfwa njengentsambo yesibane.

¹⁸ Watsi: “Tikhohlweni tintfo takadzeni; ningahlali etintfweni lesetengca.

¹⁹ Bukani la, ngenta intfo lensha! Manje seyiyavumbuka, aniyiboni yini? Ngenta indlela ehlane, nemifula eveni leligagadzekile.

²⁰ Tilwane tesiganga tiyangihlonipha, yebo, timphungutja kanye netahhukulu, ngobe ngiveta emanti ehlane nemifula eveni leligagadzekile, ngentele kunatsisa sive sami lesikhetsiwe,

²¹ sive lengatibumbela sona, kuze sitewumemetela ludvumo lwami.”

Sono sema-Israyeli

²² “Noko awukangibiti, wena Jakobe, awukatihluphi ngami, wena Israyeli.

²³ Awukatiletsi kimi timvu temnikelo wakho wekushiswa, futsi awukangihloniphi nangemihlatjelo yakho. Angikakwetfwesi umtfwalo ngeminikelo yalokutinhlavu, nome-ke ngikuhluphe ngekufuna imphepho kuwe.

²⁴ Awukangitsengeli nayinye imphepho letsaphukako, wangete wangenelisa nangemanoni emihlatjelo yakho. Kodvwa wena ungetfwese umtfwalo ngetono takho, wangikhatsata ngetikhubekiso takho.

²⁵ “Mine, ngimi, losusa tiphambuko takho ngenca yami, tono takho angiphindzi ngitikhumbule.

²⁶ Asibuyekete loko lese kwentekile, ase sikhulumisane ngalendzaba; beka indzaba yakho yekuba msulwa kwakho.

²⁷ Uyihlomkhulu wekucala wenta sono; nalabo lababengumlomo wakho bangivukela.

²⁸ Ngako-ke nami ngitatihlazisa tikhulu telithempeli lenu, ngivele ngitfumele Jakobe ekubhujisweni, na-Israyeli kutsi edzelelwe.”