Isaya 42 - Siswati 1996 Bible

Inceku yaSimakadze

¹ Simakadze utsi: “Nayi-ke inceku yami, lengiyicinisako, lokhetsiwe wami lengijabulako ngaye; ngiyawubeka Moya wami kuye, yena uyawuletsa umtsetfocotfo wami etiveni.

² Angeke amemete, futsi ngeke akhale, nome aphakamise livi lakhe etitaladini.

³ Umhlanga lofecekile ngeke awephule; intsambo yesibane lebhunyako ngeke ayicime. Ngekwetsembeka kwakhe uyawuletsa umtsetfocotfo,

⁴ ngeke angabate nome ajabhiswe, aze emise umtsetfocotfo wami emhlabeni. Tichingi tiyawubeka litsemba lato kulomtsetfo wakhe.”

⁵ Naku lokushiwo nguNkulunkulu longuSimakadze, yena lowo lowadala emazulu, waweneka, wendlala nemhlaba nako konkhe lokumila kuwo, lonika kuphefumula kubantfu labakuwo, nekuphila kulabo labahamba etikwawo, utsi:

⁶ “Mine, Simakadze, ngikubite ngekulunga, ngiyawubamba sandla sakho. Ngitawugcina ngikwente kutsi ube sivumelwane sami nesive sami, ube kukhanya kubetive,

⁷ uvule emehlo langaboni, ukhulule tiboshwa ejele, ubatfukulule emgodzini lolijele labo labahlala ebumnyameni.

⁸ “NginguSimakadze; lelo libito lami! Inkhatimulo yami ngingeke ngiyinike lomunye, nome-ke ludvumo lwami etithicweni.

⁹ Buka la, tintfo takucala setentakele, sengimemetela tintfo letinsha; tisengakacali kubonakala ebaleni, senginatisa tona.”

Ingoma yekudvumisa Simakadze

¹⁰ Hlabelani ingoma lensha kuSimakadze, netibongo takhe kusukela emikhawulweni yemhlaba, nine lenintjweza ngemikhumbi elwandle, nako konkhe lokukulo, nine tichingi, nani nonkhe lenihlala kuto.

¹¹ Lihlane nemadolobha alo akuphakamise emaphimbo ako; tabelo, lapho kuhlala khona bakaKhedari, atijabule. Bantfu baseSela abahlabele ngekujabula, abamemete baseticongweni tetintsaba.

¹² Abanike Simakadze ludvumo, bamemetele ludvumo lwakhe etichingini.

¹³ Simakadze utawushuca njengendvodza lenemandla, njengelisotja uyawuchukuluta inshisekelo yakhe; uyawumemeta ahlabe inyandzaleyo, titsa takhe atehlule.

Nkulunkulu wetsembisa kusita sive sakhe

¹⁴ Simakadze utsi: “Sesikhatsi lesidze ngibindzile, bengibindzile, ngitibambile. Kodvwa nyalo, njengemfati nakabeleka, ngiyakhala, ngiyacucumuka.

¹⁵ Ngitawucitsa tintsaba nemagcuma, ngomise konkhe lokumila kuto, ngitawugucula imifula ibe tichingi, ngomise emachibi.

¹⁶ Labatimphumphutse ngitabahola ngetindlela labangazange batati, ngibahole ngetindlela letingakavami. Bumnyama ngitabenta bube kukhanya embikwabo, ngente tindzawo letimagebhugebhu tibe ngematsafa. Leti tintfo lengitawutenta; ngingeke ngitiyekele.

¹⁷ Kodvwa labo labetsembele etithicweni, labakhuluma etitfombeni batsi: ‘Nine nibonkulunkulu betfu,’ bayawuncandzekiswa bajabhile bahlazeke kakhulu.”

Baka-Israyeli bangemahlongandlebe

¹⁸ “Vanini, nine tihhulu; bukani, nine timphumphutse, nibone!

¹⁹ Ngubani loyimphumphutse ngaphandle kwenceku yami? Ngubani losihhulu njengesitfunywa lengisitfumako? Ngubani loyimphumphutse njengalotinikele kimi, loyimphumphutse njengenceku yaSimakadze?

²⁰ Ubone tintfo letinyenti, kodvwa awukanaki, tindlebe takho tivulekile, kodvwa awuva lutfo.”

²¹ Kwamjabulisa Simakadze ngenca yekulunga kwakhe kutsi ente umtsetfo wakhe ube mkhulu, futsi ube neludvumo.

²² Kodvwa lesi sive lesiphangiwe sabuye sahlutjulwa, bonkhe babambeke emigodzini nome bafihlakele emajele. Sebayimphango, kute nalongabephula; bentiwe baba yimphango, kwabate nalotsi: “Bancandzeni.”

²³ Ngubani emkhatsini wenu lotawulalela loku akunakisise kulesikhatsi lesitako?

²⁴ Ngubani lowanikela Jakobe kutsi abe yimphango, wanikela Israyeli kubaphangi? Kwakungesiye yini Simakadze lesone kuye? Ngobe abazange bahambe ngetindlela takhe, abazange bawulalele umtsetfo wakhe.

²⁵ Ngako watfululela etikwabo intfukutselo yakhe levutsako, nebudlwangudlwangu bemphi. Yabasibekela ngemalangabi, noko abazange bacondze; yabadla, kodvwa abakufakanga enhlitiyweni.