Isaya 41 - Siswati 1996 Bible

Setsembiso saNkulunkulu ku-Israyeli

¹ “Thulani embikwami, nine tichingi! Tive ativuselele emandla ato! Atiphumele ebaleni tikhulume, asihlangane kanyekanye endzaweni yekwehlulela.

² Ngubani lochukulute lomunye kutsi esuke emphumalanga, wambitela ekulungeni kutsi ahlangabetane nekuncoba kuso sonkhe sinyatselo? Tive utinikela kuye, atfobise emakhosi embikwakhe. Ngenkemba yakhe uyabagucula babe lutfuli, nangebutjoki bakhe uyabaphephula njengemakhoba.

³ Ubalandzela ngemuva angavinjwa lutfo, abacoshe ngendlela langazange asanyatsele kuyo.

⁴ Ngubani lowente loku wadzimate wakuphumelelisa, wabita titukulwane kusukela ekucaleni? Mine, Simakadze, lengangikhona ekucaleni nalengiyawube ngikhona nasekugcineni, solo nginguye.”

⁵ Tichingi tikubonile tesaba, imikhawulo yemhlaba iyatfutfumela, bantfu bayasondzela, baphumela ebaleni.

⁶ Ngulowo usita lomunye, akhulume kumnakabo atsi: “Cina!”

⁷ Ingcweti kutekubata ikhutsata umbumbi wetegolide, nalowo lobetsela ngesandvo ushiyela kulowo locandvulako. Kulowo loshiselako utsi: “Kuhle.” Ubetsela sithico khona singetikuwa.

⁸ “Kodvwa wena, Israyeli, nceku yami, Jakobe, wena lengikukhetsile, wena situkulwane sa-Abrahama umngani wami,

⁹ ngakutsatsa emaphetselweni emhlaba, ngakubita emagunjini awo lakhashane. Ngakubita ngatsi: ‘Wena uyinceku yami,’ ngikukhetsile, ngangete ngakwala.

¹⁰ Ngako-ke ungesabi, ngobe mine nginawe; ungajabhi, ngobe mine nginguNkulunkulu wakho. Ngitakucinisa ngikusite, ngiyakukubamba ngesandla sami sekudla lesilungile.

¹¹ “Bonkhe labakubhavumulelako, impela, bayakudliwa ngemahloni, bahlazeke; labo labemelene nawe bayawuba lite, babhubhe baphele.

¹² Nome sewutiphenyisisa titsa takho, ungeke utitfole. Labo labaphekehla imphi nawe bayawuba lite lelite.

¹³ Ngobe mine nginguSimakadze, Nkulunkulu wakho, lobamba sandla sakho sangesekudla, atsi kuwe: ‘Ungesabi, ngitakusita.’

¹⁴ Ungesabi, wena mphetfu, Jakobe, awu, mntfwanyana, Israyeli, ngobe mine matfupha ngitakusita,” kusho Simakadze, uMhlengi wakho, Longcwele waka-Israyeli.

¹⁵ “Buka la, ngitakwenta ube sihhudlo sekubhula kolo, lesisha nalesikhaliphako lesinematinyo lamanyenti. Uyawushaya tintsaba utifohlote, wehlise emagcuma abe ngemakhoba.

¹⁶ Uyakuwela, umoya uwakhetse, sivunguvungu siyakuwaphephula. Kodvwa wena uyawujabula ngaSimakadze, utibonge ngaLongcwele waka-Israyeli.

¹⁷ “Labamphofu nalabeswele batfungatsa emanti, kodvwa kute; tilwimi tabo tomile ngenca yekweswela emanti. Kodvwa mine Simakadze ngitabevela, mine, Nkulunkulu waka-Israyeli, ngingeke ngibashiye.

¹⁸ Ngiyawukwenta imifula igelete etindzaweni letiphakeme letilugwadvule, netiyalu ekhatsi etihosheni. Ngiyawugucula lihlane libe titiba temanti, nemhlaba logagadzekile ube netiyalu temanti.

¹⁹ Ehlane ngiyawubeka umsedari, nemgamba, nemabovana, nemncumo. Ngiyawumilisa tipheshula eveni leligagadzekile imferi nemsayipuresi kanyekanye,

²⁰ kuze bantfu batewubona bati futsi, bacabange bese bayacondza kutsi sandla saSimakadze lesente loku, nekutsi Longcwele waka-Israyeli ukudalile loku.”

Insayeya yaSimakadze kubonkulunkulu bemanga

²¹ Simakadze utsi: “Bekani indzaba yenu.” INkhosi yakaJakobe itsi: “Khulumani kutsi niphika nitsini.”

²² Ngenisani tithico tenu titesitjela kutsi kutakwentekani. Tisitjele kutsi tintfo takucala kwakuyini, kuze natsi siteticabanga sati siphetfo sato.

²³ Nome-ke nisitjele ngetintfo letitakwenteka, nisitjele kutsi likusasa liphetseni, kuze sitekwati kutsi nibonkulunkulu. Ase nente lutfo, loluhle nome lolubi, kuze sitewujabha sesabe.

²⁴ Kodvwa nibancane kabi kunelite, nemisebenti yenu ilite nje. Lowo lokhetsa nine unengekile.

²⁵ “Ngivuse longasenyakatfo, futsi uyeta lomunye lophuma ngasemphumalanga lobita Libito lami. Unyatsela etikwebabusi kube shangatsi baludzaka nje, kube shangatsi yena ungumbumbi nakanyatsela libumba.

²⁶ Ngubani lowase wakhuluma ngaloku kusukela ekucaleni, kuze sitewukwati, nome-ke kwasendvulo, kuze natsi sitekusho sitsi: ‘Abecinisile’? Kute lowase wasitjela ngaloku, kute nalowakusho kungakenteki, kute lowake weva emavi enu.

²⁷ Ngaba wekucala kutjela iSiyoni, ngatsi: ‘Bukani, naba!’ IJerusalema ngayipha sitfunywa setindzaba letimnandzi.

²⁸ Ngiyabuka, kodvwa kute namunye, kute namunye emkhatsini wabo longeluleka, kute longaphendvula nangibabuta.

²⁹ Bukani la, bonkhe balite! Tento tabo tilite; titfombe tabo tingumoya nesiphitsiphitsi.”