Isaya 40 - Siswati 1996 Bible

Emagama ekuvuselela litsemba

¹ “Badvudvuteni, dvudvutani bantfu bami,” kusho Nkulunkulu wenu.

² “Khulumani kahle kubaseJerusalema, nimemetele kubo kutsi umshikashika wabo wemsebenti sewuphelelisiwe, nekutsi licala lesono sabo selihlawulelwe, nekutsi sebatfole ngalokuphindziwe esandleni saSimakadze ngaletono tabo.”

³ Livi lalomemetako litsi: “Lungisani indlela yaSimakadze ehlane; yentani ucondze ekhatsi ehlane umgwaco lomkhulu waNkulunkulu wetfu.

⁴ Tonkhe tigodzi tiyawugcwaliswa; tonkhe tintsaba nemagcuma kuyakwehliswa. Umhlaba lomagebhugebhu uyawulinganiswa, ematsafa latigodzigodzi entiwe abeke.

⁵ Inkhatimulo yaSimakadze iyakwembulwa, nalo lonkhe luntfu luyakuyibona; ngobe umlomo waSimakadze sewukhulumile.”

⁶ Livi litsi: “Memeta.” Mine ngitsi: “Ngimemete kutsini?” “Bonkhe bantfu banjengetjani, nako konkhe kudvuma kwabo kunjengembali yesiganga.

⁷ Tjani buyabuna netimbali tiyahhohloka, ngobe umoya waSimakadze uhhusha etikwako. Ngempela bantfu batjani.

⁸ Tjani buyabuna, netimbali tiyahhohloka, kodvwa livi laNkulunkulu wetfu limile kuze kube nguphakadze.”

⁹ Wena loletsa tindzaba letimnandzi eSiyoni, khuphukela entsabeni lephakeme. Wena loletse tindzaba letimnandzi eJerusalema, phakamisa livi lakho, umemete, liphakamise, ungesabi. Tsanini kuwo emadolobha akaJuda: “Nangu Nkulunkulu wenu!”

¹⁰ Bukani, Simakadze longuSomandla ute ngemandla, nangemkhono wakhe uyabusa. Bukani, umvuzo wakhe unaye, nenkhokhelo yakhe ihamba naye.

¹¹ Welusa umhlambi wakhe njengemelusi: Ugona emazinyane akhe ngemikhono yakhe, awasondzete edvutane nenhlitiyo yakhe; utihola kahle leto letinemazinyane.

¹² Ngubani lolinganise emanti ngentsendze yesandla sakhe, nome lowatsi ngebubanti besandla sakhe wemisa imikhawulo yemazulu? Ngubani lolinganisa lutfuli lwemhlaba ngembita, nome lowake wakala tintsaba ngesikali, wakala nemagcuma ngesilinganiso?

¹³ Ngubani loke wacondza Moya waSimakadze, nome wamfundzisa angumeluleki wakhe?

¹⁴ Ngubani lowake wabutwa nguSimakadze kutsi akamkhanyisele lokutsite? Ngubani lowake wamlayela indlela lengiyo? Ngubani yena lona lowamfundzisa lwati nome wamlayela indlela yekucondza?

¹⁵ Buka, tive tifanana nelitfonsi embiteni, titsatfwa njengelutfuli esikalweni; ukala tichingi kube shangatsi tilutfuli lolucolisakele.

¹⁶ Lihlatsi laseLebanoni alikaweneli umlilo wemalati, netifuyo talo atikaweneli umnikelo wekushiswa.

¹⁷ Tonkhe tive tinjengelite emehlweni akhe, kuye titsatseka njengentfo lengenamsebenti, futsi tingaphansi kwelite.

¹⁸ Ungamfanisa nabani-ke Nkulunkulu? Ungamlinganisa nasiphi-ke sitfombe?

¹⁹ Sithico-ke sona, intfo lebunjwa yingcweti, umfuli nje usembesa ngegolide, asentele netinketane tesiliva.

²⁰ Umuntfu lomphofu lowehluleka kunikela ngeminikelo lenjena, ukhetsa lukhuni lolungaboli kalula. Utifunela ingcweti yembumbi lohlakaniphile itemmisela sithico lesingeke siwe.

²¹ Anati yini? Anikeva yini? Anizange senitjelwe yini kona kwasekucaleni? Anizange nicondzisise yini kusukela umhlaba wasekelwa?

²² Nkulunkulu uhleti esihlalweni sebukhosi etikwembulunga lengumhlaba, nebantfu bakhona bafanana netintsetse. Wendlala emazulu njengempheme, awendlale njengeliseyili entele bantfu kutsi batewuhlala kuwo.

²³ Utsatsa tikhulu atente lite, ehlise babusi bakulomhlaba babe lite.

²⁴ Batsi basengakahlanyelwa, basengakatjalwa nekutjalwa, basengakasimi ngisho nasemhlabatsini, bese uyabaphuphutsa, babune, kutsi umoya losiwunguwungwane ubaphephule, ubalahle khashane njengemakhoba.

²⁵ “Ningangilinganisa nabani nje mine? Nome-ke ngubani lofanana nami?” kusho Yena Longcwele.

²⁶ Phakamiselani emehlo enu ezulwini: Ngubani lowadala konkhe loku? Nguye lokhipha emabutfo etinkhanyeti ngayinye ngayinye, atibite tonkhe tinkhanyeti nguleyo naleyo ngelibito layo. Ngenca yemandla akhe lamakhulu nangebukhulu bemandla akhe, kute nome yinye lesilelako.

²⁷ Ukhononelani, wena Jakobe? Wena Israyeli, usolelani ngekutsi: “Indlela yami ifihlakele kuSimakadze; lilungelo lami alikanakeki kuNkulunkulu wami”?

²⁸ Awati yini? Awukeva yini? Simakadze unguNkulunkulu waphakadze, uMdali wemikhawulo yemhlaba. Angeke adzinwe, futsi ngeke akhatsale, nekucondza kwakhe kute longakuphenyisisa.

²⁹ Ubapha emandla labo labakhatsele, awandzise emandla alababutsakatsaka.

³⁰ Nalabasha bayaphela emandla, badzinwe, nemajaha ayakhubatela awe,

³¹ kodvwa labo labetsembele kuSimakadze batfola emandla lamasha. Bayawukhuphuka ngemaphiko njengetinsweti, bayawugijima bangadzinwa, bayawuhamba bangaphelelwa ngemandla.