Isaya 38 - Siswati 1996 Bible

Kugula kwenkhosi Hezekiya nekuphiliswa kwakhe

¹ Kulawo malanga Hezekiya wagula wabangwa netibi. Umphrofethi Isaya, umsa wa-Amose, waya kuye, wafike watsi: “Naku lokushiwo nguSimakadze, utsi: Sale ulungisa kahle tonkhe tintfo tasemndenini wakakho, ngobe sewutakufa, ngeke usindze.”

² Hezekiya wagucuka wabheka ngaselubondzeni, wathandaza kuSimakadze, watsi:

³ “Awu, Simakadze, khumbula kutsi bengihamba ngekwetsembeka lokunjani embikwakho, nekutsi bengitinikele kangakanani embikwakho ngayo yonkhe inhlitiyo yami, ngenta lokuhle emehlweni akho.” Hezekiya wakhala kabuhlungu.

⁴ Livi laSimakadze lefika ku-Isaya, latsi:

⁵ “Hamba uyewutjela Hezekiya, utsi: ‘Naku lokushiwo nguSimakadze, Nkulunkulu weyihlomkhulu, Davide, utsi: Ngiwuvile umthandazo wakho, ngatibona netinyembeti takho. Ngitakwengetela iminyaka leli-15 ebudzeni bemphilo yakho.

⁶ Ngitawukhulula wena kanye nalelidolobha esandleni senkhosi yase-Asiriya. Ngitalivikela lelidolobha.

⁷ “ ‘Nasi sibonakaliso saSimakadze kuwe, sekutsi Simakadze utakwenta loko lakwetsembisile:

⁸ Ngitakwenta sitfunti lesentiwe lilanga siye emuva tinyatselo letilishumi lese sitewuke etitebhisini tekukala sikhatsi ta-Ahazi.’ ” Ngako-ke kukhanya kwelilanga kwafinyela ngetinyatselo letilishumi lebesekutewukile.

⁹ Umbhalo waHezekiya, inkhosi yakaJuda, emvakwekugula nekusindza kwakhe:

¹⁰ Ngatsi mine: “Kantsi kutawutsi nase ngikhulile nginemandla, ngiyakwendlula emasangweni ekufa, ngidlelelwe incenye yeminyaka lesasele yemphilo yami?”

¹¹ Ngatsi mine: “Angisayiwuphindze ngimbone Simakadze, ngibone Simakadze eveni lalabaphilako. Angisayikuphindze ngibabuke bantfu, nome-ke ngiphindze ngihlale kanye nalabo labahleti kulomhlaba.

¹² Njengelithende lemelusi, indlu yami ihhihlitelwe phansi yesuswa kimi. Njengemeluki imphilo yami uyisongile, ungincamulile emculwini webudze bemphilo, busuku nemini wetamana nekungicedza.

¹³ Ngilindzile ngekubeketela kwaze kwadzabuka kusa; kodvwa yena njengelibhubesi uwabhobabhobe onkhe ematsambo ami. Busuku nemini wetamana nekungicedza.

¹⁴ Ngantjilota ngikhalisa kwenkhonjane, ngabubula ngakhalisa kwelituba, emehlo ami aba luvitsi, nangitsi ngibuka etulu emazulwini, ngihluphekile. Awu Simakadze, wota ungelekelele.”

¹⁵ Kodvwa ngingatsini nje? Sewungitjelile, futsi yena cobo lwakhe ukwentile loko. Ngitawuhamba ngekubonyabonyeka yonkhe iminyaka yami, ngenca yalobuhlungu bemphefumulo wami.

¹⁶ Simakadze, bantfu baphila ngetintfo letinje, nami-ke umoya wami utfola imphilo ngato. Ubuyisele kuphila kwami kimi, wangenta ngaphila.

¹⁷ Empeleni wentele kusita mine lokutsi ngive tinhlungu letinje. Elutsandvweni lwakho wangisindzisa emgodzini wembhubhiso, utsatse tonkhe tono tami watilahla emvakwakho.

¹⁸ Ngobe lidliza lingeke likudvumise, nekufa ngeke kutigambute tibongo takho; labo labashona phansi emgodzini bangeke babeke litsemba labo ekwetsembekeni kwakho.

¹⁹ Ngulabaphilako, labaphilako bodvwa, labakudvumisako wena, njengaloku ngenta nje nami lamuhla. Bobabe batjela bantfwababo ngekwetsembeka kwakho.

²⁰ Simakadze utangisindzisa; siyawuhlabela ngetingubhu letinetintsambo onkhe emalanga emphilo yetfu sisethempelini laSimakadze.

²¹ Isaya abeshito watsi: “Futfumetani sitfobo semakhiwa, bese nisifaka kulelitfumba, utabe sewuyaphila.”

²² Hezekiya abebute watsi: “Sitawuba yini sibonakaliso sekutsi ngitawukhuphukela ethempelini laSimakadze?”