Isaya 35 - Siswati 1996 Bible

Indlela yebungcwele

¹ Lihlane nelive lelihamukile kuyawujabula, lugwadvule luyawujabula luchakaze timbali.

² Njengembali luyawuchakaza lube lusha; luyawutfokota kakhulu, lumemete ngenjabulo. Ludvumo lweLebanoni luyawunikwa lona, yebo, luyawunikwa ludvumo lweKhameli nelweSharoni; bantfu bayawubona bukhosi baSimakadze, nebukhatikhati baNkulunkulu wetfu.

³ Cinisani tandla letibutsakatsaka, nikhutsate emadvolo lacekako.

⁴ Khulumani kulabanetinhlitiyo letesabako nitsi: “Cinani, ningesabi, Nkulunkulu wenu uyeta, uyawufika nekuphindzisela nekujezisa kwakhe, utawufika atenisindzisa.”

⁵ Emehlo etimphumphutse ayawuvuleka, netindlebe tetihhulu tiyawuva.

⁶ Labachutako bayawusuka emagonso njengenyamatane, nelulwimi lwesimungulu luyawumemeta ngenjabulo. Emanti ayawugeleta ehlane, kube nemifudlana elugwadvule.

⁷ Sihlabatsi lesishisako siyawuba sitiba, umhlabatsi lowomile uphetfuke tiyalu. Nalapho kwake kwahlala timphungutja khona, kuyawumila tjani nemhlanga, kanye nemhlanga iphaphira.

⁸ Kuyawuba khona umgwaco lomkhulu lapho, uyawubitwa ngekutsi Yindlela Yebungcwele. Labangcolile ngeke bahambe ngawo, uyakuba walabo labahamba ngawo lomgwaco, tilima letikhohlakele ngeke tihambahambe ngawo.

⁹ Kuyawubate libhubesi lapho, kute ngisho nesilwane lesinelulaka, lesiyawutfolakala kuwo. Kodvwa ngulabahlengiwe bodvwa labayawuhamba kulowo mgwaco,

¹⁰ labahlengiwe baSimakadze bayawubuya. Bayawungena eSiyoni ngekuhlabela, nangekujabula kwaphakadze lokuyawuba ngumchele etinhloko tabo. Bayawuhamba ngekutfokota nangekujabula, lusizi nekububula kuyawubaleka.