Isaya 34 - Siswati 1996 Bible

Nkulunkulu utatijezisa titsa takhe

¹ Sondzelani, nine tive, nitewulalela; lalelisisani, nine tive! Umhlaba awuve, nako konkhe lokukuwo, umhlaba, nako konkhe lokuphuma kuwo!

² Simakadze utitfukutselele tonkhe tive; intfukutselo yakhe isetikwawo onkhe emabutfo ato. Uyakuwabhubhisa onkhe awacedze, awanikele kutsi agwazwe.

³ Lababulewe bawo bayawulahlwa ngephandle, tidvumbu tawo tiyawunuka luboti; tintsaba tiyawucwila engatini yawo.

⁴ Tonkhe tinkhanyeti tasemazulwini tiyawuncibilika, nesibhakabhaka sigocotwe njengencwadzi legocotwako; tonkhe letinkhanyeti tasesibhakabhakeni tiyakuwa njengemacembe lomile lahhohloka esihlahleni semvini, nanjengemakhiwa lasabunile nakahhohloka esihlahleni semkhiwa.

⁵ Inkemba yami seyinatse yenela emazulwini, bukani, yehla ngekwehlulela, yehlela kulaka-Edomu, sive lengitasibhubhisa ngisicedze.

⁶ Inkemba yaSimakadze icwiliswa engatini, inemanoni yonkhe indzawo, igcwele ingati yemazinyane etimvu, nengati yetimbuti, nemanoni lesuka etinsweni tetihhanca. Ngobe Simakadze unemhlatjelo eBhosra nekuhlaba lokukhulu kulaka-Edomu.

⁷ Tinkhabi tesiganga tiyakuwa nabo, tinkunzana kanye netinkunzi letinkhulu. Live labo liyawucwila engatini, nelutfuli luyawuba manti emanoni.

⁸ Ngobe Simakadze unelilanga lekuphindzisela, umnyaka wekubuyisela ngenca yendzaba yaseSiyoni.

⁹ Imifudlana yaka-Edomu iyawuba litiyela, lutfuli lwakhona lube sibabule lesivutsako, live labo libe litiyela lelivutsako.

¹⁰ Singeke sicinywe ebusuku nasemini, intfutfu yaso iyawubhunya phakadze naphakadze, kusukela etitukulwaneni kuye etitukulwaneni live liyawuhlala lilihlane, kute namunye loyawuphindza adzabule ekhatsi kulo.

¹¹ Sahhukulu sasehlane nesahhukulu lesikhalako kuyawuyitsatsa lendzawo ibe yako. Sahhukulu lesikhulu nelihhwabayi kuyawukwakhela tidleke tako khona lapho. Nkulunkulu uyakuselula etikwelive laka-Edomu silinganiso sesiphitsiphitsi, yebo, nekwekulinganisa lokuyincitsakalo.

¹² Babusi balo kuyawubate labayawukubita batsi bukhosi, bonkhe baholi balo bayawunyamalala.

¹³ Emanyeva ayakwehlula tigodlo talo, emanyeva netinchachabutane kunyatsele tinqaba talo. Kuyawuba yindzawo yekujangaza timphungutja, nelikhaya letahhukulu.

¹⁴ Tilwane tesiganga tiyawuhlangana netimphisi, netimbuti tesiganga timemetane todvwana, netilwane tasebusuku tiyawulala lapho, tititfolele khona indzawo yekuphumula.

¹⁵ Sahhukulu siyakwakha sidleke saso lapho, sitalele emacandza, siwachobosele khona lapho, sifukamele emazini aso, ngaphansi kwemtfunti wetimphiko taso; ngisho nabolohheya bayawuhlangana lapho, ngulowo ahambe nesingani sakhe.

¹⁶ Ase nibuke encwadzini legocotwako yaSimakadze nifundze. Kute nakunye kwaloku lokuyawusilela, kute lokuyakweswela singani sako. Ngobe ngumlomo wakhe lona lokhiphe lomyalo, naMoya wakhe uyawukubutsela ndzawonye.

¹⁷ Ukunika tabelo tako ngenkatho, sandla sakhe siyakwabela live njengekwesilinganiso, seliyawuba lako kokuphela, kuhlale khona situkulwane ngesitukulwane.