Isaya 32 - Siswati 1996 Bible

Inkhosi lenebucotfo

¹ Buka la, inkhosi iyawubusa ngekulunga, nebabusi bayawubusa ngekwemtsetfocotfo.

² Ngulowo nalowo wabo uyawufanana nesiphephelo emoyeni, abe ngumkhoselisi kuso sivunguvungu, abe njengemifula yemanti ehlane, afanane nelitfunti lelidvwala lelikhulu eveni lelomele emanti.

³ Emehlo alabo lababonako angeke asavaleka, netindlebe talabo labevako setiyawulalela.

⁴ Ingcondvo yalabanematata iyawukwati ibuye icondze, nelulwimi lolungingitako luyawusheshisa kukhuluma kahle nangalokuvakalako.

⁵ Silima singeke siphindze sibitwe ngekutsi ngumhlonishwa, yebo, nasidlani angeke ahlonishwe kakhulu.

⁶ Ngobe silima sikhuluma bulima, ingcondvo yaso ishikaneka ngalokubi, siphila ngekungamesabi Nkulunkulu, sisakate emanga ngaSimakadze; lolambile simshiya angenalutfo, kutsi nalowomile singamniki emanti.

⁷ Emasu asidlani mabi, wakha emacebo ebubi ekubhubhisa labamphofu ngemanga, ngisho nome sikhalo saloweswele sicotfo.

⁸ Kodvwa umuntfu locotfo wakha emasu lacotfo; imisebenti yakhe lehloniphekile imente eme.

Kwehlulelwa nekubuyiselwa

⁹ Nine bafati labakhibikile, sukumani nilalele kimi, nine madvodzakati lenitivela niphephile, lalelani naku lengitakusho!

¹⁰ Ngesikhatsi nje lesingetudlwana kwemnyaka nine lenitiva niphephile nitawutfutfumela; sivuno semagelebisi siyawuba sibi, kutawubate nesivuno setitselo.

¹¹ Tfutfumelani, nine bafati labakhibikile; yesabani, nine madvodzakati lenitivela niphephile! Khumulani kwekwembatsa kwenu. Vunulani emasaka etinkhalo tenu.

¹² Yetfwalani tandla enhloko, ngenca yemasimi lamahle, nangenca yetitselo tenu letinhle temivini,

¹³ nangenca yelive lesive sami, live lelene emanyeva netinchachabutane, yebo, lilelani tonkhe tindlu tekutijabulisa kanye nalelidolobha lekutijabulisa.

¹⁴ Inqaba iyawusala yodvwa, lidolobha lemsindvo lisale likhala libhungane, indlu leyinqaba kanye nembhoshongo kuyawuba lihlane lelingenalutfo phakadze naphakadze, kube kujabula kwetimbongolo nelidlelo lemihlambi,

¹⁵ aze Moya wasezulwini atfululelwe etikwetfu, bese kutsi lihlane libe yinsimi levundzile, nensimi levundzile ifanane nelihlatsi.

¹⁶ Umtsetfocotfo uyawuhlala ehlane, kulunga kuhlale ensimini levundzile.

¹⁷ Sitselo sekulunga siyawuba kuthula nenhlalakahle, umphumela wekulunga uyawuba kuphumula nekulondvoloteka phakadze naphakadze.

¹⁸ Sive sami siyawuhlala etindzaweni tekuthula, emakhaya laphephile, etindzaweni tekuphumula letite lokuphatamisako.

¹⁹ Nome sangcotfo singalivitsita lihlatsi, nelidolobha silibhidlite liphele nya,

²⁰ maye, nine niyawubusiswa, nihlanyele inhlanyelo yenu eceleni kwayo yonkhe imifula, nikhulule tinkhabi tenu netimbongolo tenu, tidle ngekutsandza.