Isaya 29 - Siswati 1996 Bible

Sehlakalo saseJerusalema

¹ Maye kuwe, Ariyeli, Ariyeli, lidolobha lapho kwafike kwangenisa Davide khona! Yengetani umnyaka ngemnyaka, vumelani umjikeleto wemadzili enu uchubeke.

² Noko ngiyakuvimbetela i-Ariyeli, iyawukhala ilile kimi, iyawuba njengelilati lemlilo.

³ Ngiyawumisa emabutfo ami akutungelete. Ngiyawukutungeleta ngemibhoshongo, ngimise tindvonga tekukuvimbetela.

⁴ Uyawukhuluma sewulele phansi sengikwehlisile; inkhulumo yakho kuyawuba kuvungama nje kwaselutfulini. Liphimbo lakho liyawuvakala njengelesipoko emhlabatsini; livi lakho liyawuvumbuka livela elutfulini.

⁵ Kodvwa titsa takho letinyenti titawuba njengelutfuli lwemhlabatsi, leticumbi tebantfu labanelunya tiyawuba njengemakhoba lapheshulwa ngumoya. Ngekushesha, ngekuphatima kweliso

⁶ Simakadze longuSomandla uyakuta ngekudvuma nangekutamatama kwemhlaba, nangemsindvo lomkhulu, nangesikhukhula semoya nesihhushuhhushu, nangemalangabi emlilo lodlako.

⁷ Ngako lemilalandle yato tonkhe tive lelwa ne-Ariyeli naleyihlaselako kanye netinqaba tayo, iyivimbetele, iyawuba njengeliphupho, nanjengembono ebusuku.

⁸ Njengemuntfu losabulewe yindlala nakabhudza adla, kodvwa utsi navuka ekuseni akhandze indlala imphetse, nanjengemuntfu nakomile abhudze anatsa, kodvwa atsi navuka ekuseni atikhandze afile koma, kuyawuba njalo-ke nangalemilalandle yato tonkhe tive letilwa neNtsaba yaseSiyoni.

Secwayiso ngekwedzelela

⁹ Yetfukani nimangale, banini timphumphutse nibe ngulabangenamehlo, dzakwani, kodvwa hhayi ngenca yeliwayini, yendzani, kodvwa ningayendziswa tjwala.

¹⁰ Simakadze wehlisele etikwenu butfongo lobukhulu: Uwavalile emehlo enu, baphrofethi, utimbonyile tinhloko tenu, baboniswa.

¹¹ Kini wonkhe nje lombono awusilo lutfo, ngaphandle kwemagama nje lavalelwe encwadzini legocotwako. Naninika lomunye, lokwatiko kufundza, lencwadzi legocotwako, nitsi: “Fundza naku, tsine,” uyawuphendvula atsi: “Ngingeke ngikhone, ivaliwe yananyatsiselwa.”

¹² Nome-ke naninganika lomunye longakwati kufundza lencwadzi legocotwako, nitsi: “Fundza naku, tsine,” angaphendvula atsi: “Angikwati kufundza.”

¹³ Simakadze utsi: “Labantfu basondzela kimi ngemilomo yabo, bangihlonipha ngetindzebe temilomo yabo kuphela; kodvwa tinhlitiyo tabo tikhashane kabi nami. Kungikhonta kwabo kukwenta nje leyo mitsetfo lefundziswa bantfu.

¹⁴ Ngako-ke ngisetawuphindze ngibamangalise labantfu ngetigigaba etikwetigigaba. Inhlakanipho yetihlakaniphi tabo itawuphela, kukhalipha kwemcondvo kwalabanengcondvo lekhaliphile kutawuphela.”

Litsemba ngelikusasa

¹⁵ Maye kulabo labaya ematfunjini emhlaba, bayewufihla emasu abo, bawafihlele Simakadze, labentela imisebenti yabo ebumnyameni, bacabange batsi: “Ngubani nje losibonako? Ngubani loyawukwati?”

¹⁶ Niguculela tintfo, liphansi libheke etulu, nente shangatsi ngumbumbi longuyena afanana nelibumba! Loko lokwentiwe, kungasho yini kulomenti wako kutsi: “Akazange asangente mine”? Ludziwo lungasho yini kumbumbi walo kutsi: “Akati lutfo loyo”?

¹⁷ ILebanoni ingete yaguculwa yini ngesikhashana lesincane nje ibe yinsimi levundzile, nensimi levundzile ibonakale seyinjengelihlatsi?

¹⁸ Ngalelo langa tihhulu tiyakuva emavi alencwadzi legocotwako; ekhatsi ebumnyameni kahlongasibi emehlo etimphumphutse ayawubona.

¹⁹ Labatfobekile bayawubuye bajabule ngaSimakadze; labeswele bayawujabula ngaLongcwele waka-Israyeli.

²⁰ Labanelunya bayawunyamalala, baphukuti bayawuphela, bonkhe labaneliso lengulube bayawuncanyulwa,

²¹ labo labenta umuntfu adliwe licala ngeligama linye nje, bambekele lugibe lowo lotsetsa emacala enkhundleni, ngebufakazi bemanga baphambukise umtsetfocotfo, badlelele longenacala.

²² Ngako-ke naku lokushiwo nguSimakadze lowahlenga Abrahama, macondzana nendlu yakaJakobe Simakadze utsi: “Jakobe akasayikuba nemahloni; nebuso babo abusayikuphaphatseka.

²³ Nababona emkhatsini wabo bantfwababo, umsebenti wetandla tami, bayawuligcina lingcwele Libito lami; bayawubuhlonipha bungcwele baLongcwele wakaJakobe, bamangale ngaNkulunkulu wema-Israyeli.

²⁴ Labo labanhlanhlatselako emoyeni bayawuba nelwati, labo labakhononako bayakwetsabela kufundziswa.”