Isaya 28 - Siswati 1996 Bible

Kwecwayiswa kwembuso wasenyakatfo

¹ Maye kulowo mchele letitigabatisa ngawo tidzakwa taka-Efrayimu, nakuleyo mbali lebunako, bukhatikhati bebuhle bakhe lobumiswe enhloko yesigodzi lesivundzile; maye kulelo dolobha, ligcabho lalabo lasebalaliswa phansi liwayini!

² Buka la, Simakadze unaye lonemandla nalocinile. Njengesangcotfo nesivunguvungu lesibhubhisako, nanjengemvula lekhukhulako, nesihhuhhula semanti, uyakulisacata phansi emhlabatsini ngemandla lamakhulu.

³ Lowo mchele letitigabatisa ngawo tidzakwa taka-Efrayimu, uyawugcotjwagcotjwa phansi ngetinyawo.

⁴ Leyo mbali lebunako, bukhatikhati bebuhle bakhe lobumiswe enhloko yesigodzi lesivundzile, iyawuba njengelikhiwa lelivutfwe kungakavunwa, lekutsi lowo nje lolibone kucala alikhe ngesandla sakhe, alifake emlonyeni, alimite masinyane.

⁵ Ngalelo langa Simakadze longuSomandla uyawuba ngumchele webukhosi, umchele lomuhle wensali yesive sakhe.

⁶ Uyawuba ngumoya wemtsetfocotfo kulowo lohlalela kwehlulela, abe sisusa semandla kulabo labajikisa imphi esangweni.

Isaya nebaphrofethi bakaJuda labatidzakwa

⁷ Nabo labo bayayendza ngenca yeliwayini, babhadzatele ngenca yetjwala, baphristi nebaphrofethi bayayendza ngenca yetjwala, basangene ingcondvo ngenca yeliwayini, badzayiteliswa tjwala, bayayendza nababona imibono, bayakhubatela nabakhipha tincumo.

⁸ Onkhe ematafula agcwele emahlante, kute ngisho lesincane sikhadlana lesingakangcoli.

⁹ “Ngubani yena lona lowetama kumfundzisa, uwuchazela bani wona lombiko wakhe? Kubantfwana labesusiwe yini elubisini lwabo, labo labavele balunyulwa nje emabeleni abonina?

¹⁰ Uyahhema utsi: Savu lasavu, savu lasavu, khavu lakhavu, khavu lakhavu, ziyere shamu, ziyere shamu.”

¹¹ Kulungile-ke, ngetindzebe temlomo wekuchamuka nangetilimi letingatiwa Nkulunkulu uyawukhuluma kulesive,

¹² lakhuluma kuso watsi: “Lena yindzawo yekuphumula, labakhatsele abaphumule kuyo,” nekutsi: “Lena yindzawo yekucambalala,” kodvwa bangeke balalele.

¹³ Ngako-ke livi laSimakadze kubo liyawuba kutsi: “Savu lasavu, savu lasavu, khavu lakhavu, khavu lakhavu, ziyere shamu, ziyere shamu,” kuze batewuhamba baze bawe ngetiphundvu, balimale babanjwe, bese bayatfunjwa.

Litje laseSiyoni lekusimisa indlu

¹⁴ Ngako-ke vanini livi laSimakadze, nine tedzeleli lenibusa lesive eJerusalema.

¹⁵ Niyatigabatisa nitsi: “Sesente sivumelwane nekufa, sente sivumelwane nelithuna. Ngesikhatsi sivunguvungu lesishisako siphephula sendlula kitsi, singeke sisitsintse tsine, ngobe sente emanga aba siphephelo setfu, sente emacebo aba yindzawo yetfu yekubhaca.”

¹⁶ Ngako-ke naku lokushiwo nguSimakadze longuSomandla, utsi: “Buka la, ngibeka litje eSiyoni, litje lelihloliwe, litje leliligugu lekusimisa indlu, lelisisekelo lesetsembekile sendlu; lowo lowetsembele kimi ngeke ajabhe.

¹⁷ Ngitakwenta kwehlulela ngekwemtsetfocotfo kube ngumugca wekulinganisa, nekulunga kube ngumugca wekucondzisa, sangcotfo siyawuhlwitsa lesiphephelo senu lesingemanga, nesikhukhula semanti siyakwemukisa lendzawo yenu yekubhaca.

¹⁸ Sivumelwane senu lenisente nekufa siyakwentiwa sibe lite; sivumelwane senu lenisente nelithuna singeke sime. Kuyawutsi sivunguvungu sekushisa nasiphephula sendlula kini, sinishaye sinilahle phansi.

¹⁹ Njalo nje nasifika nome nini, siyakwendlula nani sinitfumbe kusa ngekusa, busuku nemini.” Kuvakala kwalomlayeto kuyawuletsa kwesaba nekutfutfumela kuphela nje.

²⁰ Umbhedze mfishane kakhulu kutsi ungenaba kuwo, netingubo tingumntjuntju kakhulu kutsi umuntfu angatishumphetela ngato.

²¹ Simakadze utawuvuka, njengobe wake wenta eNtsabeni yasePherasimu, lulaka lwakhe luyakumvuselela njengaseSigodzini saseGibeyoni, kutsi ente umsebenti wakhe, yebo, umsebenti wakhe lomangalisako kutsi aphelelisele umsebenti wakhe, yebo, umsebenti wakhe longaketayeleki.

²² Nyalo-ke yekelani lokuphukuta kwenu, nakungenjalo, tinketane tenu titakuba matima, iNkhosi Simakadze lenguSomandla ingitjelile ngembhubhiso leseyimiselwe live lonkhe.

Inhlakanipho yaNkulunkulu

²³ Lalelani, nive livi lami; linakekeleni, nive kutsi ngitsini.

²⁴ Umlimi nakalima atawuhlanyela, uyaye alibale kulima yini? Vele, ulibala kugucula yini ahhalige umhlaba wakhe?

²⁵ Nase awulime kahle umhlabatsi wakhe wawuhlanganisa waba kahle, uyaye angabe asayihlanyela yini inhlanyelo yakhe yetinandzisi, asakate nekhumini yakhe? Akahlanyeli kolo yini endzaweni yakhe, nebhali ensimini yayo, nemabele ensimini yawo?

²⁶ Nkulunkulu wakhe uyamtjela amfundzise indlela lelungile.

²⁷ Ikhumini ayibhulwa ngesihliphi, kanjalo nekhumini lemnyama ayibhulwa ngekuhambisa inkalishi etikwayo; kodvwa ikhumini ibhulwa ngesibhulo, kutsi ikhumini lemnyama ibhulwe ngendvuku.

²⁸ Lokutinhlavu kufanele kusilwe kutekwentiwa sinkhwa; ngako-ke akulitjalwa kukubhula siphelane. Nome achuba emasondvo enkalishi yakhe yekubhula etikwako, emahhashi akhe akakusili.

²⁹ Konkhe loku kuphuma kuSimakadze longuSomandla, lomangalisako ekwelulekeni kwakhe, nalobabatekako ngenhlakanipho yakhe.