Isaya 25 - Siswati 1996 Bible

Liculo lekudvumisa

¹ Awu, Simakadze, wena unguNkulunkulu wami, ngiyakukuphakamisa, ngilidvumise Libito lakho, ngobe ngekwetsembeka kwakho lokuphelele wente tintfo letimangalisako, tintfo letahlelwa endvulo.

² Lidolobha ulente laba yindvundvuma yemfuhlululu, yebo, lidolobha lelibiyelwe laba tindzala; siphephelo sebetive sangabe sisaba ngilo lidolobha, lingeke liphindze lakhiwe kabusha.

³ Ngako-ke tive letinemandla tiyawukudvumisa, emadolobha etive letinelunya ayawukuhlonipha.

⁴ Bewusiphephelo salabamphofu, siphephelo salabeswele elusizini lwabo, siphephelo sekuvikela etivunguvungwini, nemtfunti ekushiseni kwelilanga. Ngobe kuphefumula kwalabanelunya kufanana nesivunguvungu lesitimukula elubondzeni;

⁵ kunjengekushisa kwelihlane. Wena ubindzisa lutfutfuva lwebetive; njengekushisa nakuphotiswa litfunti lelifu, ibindziswa kanjalo-ke ingoma yalabanelunya.

⁶ Kulentsaba Simakadze longuSomandla utakwentela bantfu bonkhe lidzili lalokukhuluphele, lelimnandzi, yebo, lidzili leliwayini lelidzala lakadzeni, inyama lenhle kakhulu, netinhlobo letimnandzi teliwayini.

⁷ Kulentsaba uyawususa simbonyo lesisibekele tonkhe tive, nalendvwangu lembonye tonkhe tive,

⁸ amite kufa phakadze naphakadze. Somandla longuSimakadze uyawukwesula tinyembeti kubo bonkhe buso; uyawususa lihlazo lesive sakhe emhlabeni wonkhe. Simakadze sewukhulumile.

⁹ Ngalelo langa bayakutsi: “Ngempela, lona nguNkulunkulu wetfu, besetsembela kuye, naye wasisindzisa. Lona nguSimakadze lebesetsembele kuye; asijabule sitfokote ngensindziso yakhe.”

¹⁰ Emandla aSimakadze ayakuyengama lentsaba, kodvwa Mowabi utawunyatselwa phansi ngetinyawo, njengetibi natigcotjwagcotjwa emcubeni.

¹¹ Bayawukweneka tandla tabo ekhatsi kuwo njengemuntfu lohlambako nakeneka tandla takhe. Nkulunkulu uyakulidzilita ligcabo labo, abubukele phansi bucwepheshe betandla tabo.

¹² Uyakudzilitela phansi tibondza takaMowabi letiphakeme naletitinqaba, atihhihlitele phansi; uyakutihhihlitela phansi elutfulini.