Isaya 24 - Siswati 1996 Bible

Simakadze utawujezisa umhlaba

¹ Bukani la, Simakadze utawubhubhisa umhlaba, awente ube lihlane. Umhlaba utawenta ubhidlike, asakate bonkhe labahlala kuwo.

² Bonkhe bantfu bayawuhlupheka ngalokufananako: Umphristi njengebantfu, umcashi njengesisebenti, inkhosikati njengencekukati, umtsengisi njengemtsengi, umbolekisi njengemboleki, umkweledisi njengemkweledi.

³ Umhlaba utawubhidlitwa ube lite, uphangwe nekuphangwa. Simakadze ulikhulumile lelivi.

⁴ Umhlaba uyoma ubune, live lonkhe liyahhohhobala libune, labaphakeme bemhlaba nabo bayahhohhobala.

⁵ Umhlaba ungcoliswe bantfu bawo. Umtsetfo waNkulunkulu abawulalelanga, bephule imiyalo, bephula sivumelwane saphakadze.

⁶ Ngako-ke sicalekiso siyawushwabudzela umhlaba, bantfu bawo kufanele baletfwale licala labo. Ngako-ke labahlala emhlabeni bayashiswa, kusale babe mbalwa kakhulu.

⁷ Liwayini lelisha liyoma, nemvini uyabuna; bonkhe labatijabulisako bayabubula.

⁸ Kutsakasa kwemafahlawane sekubindzisiwe, nemsindvo walabatijabulisako sewuthulisiwe, lihabhu lekutjakadvula selibindzile.

⁹ Liwayini abasalinatsi ngengoma, tjwala sebuyababa kubanatsi babo.

¹⁰ Lidolobha lelibhidlitiwe, selisele lilihlane; onkhe emasango asavaliwe, akusangeni muntfu.

¹¹ Etitaladini bakhalela liwayini; konkhe kujabula sekugucuke kwaba lusizi, konkhe kutsakasa sekudzingisiwe emhlabeni.

¹² Lidolobha selisele litindzala, emasango alo abhidlitwe aba ticucu.

¹³ Kuyawuba njalo emhlabeni, nakuto tonkhe tive kube njengesihlahla semncumo nasivitsitiwe, nanjengaloko lokusele nakuvunwa emagelebisi.

¹⁴ Bantfu baphakamisa emaphimbo abo, bamemeta ngenjabulo; kusukela ngasenshonalanga badvumisa bukhosi baSimakadze.

¹⁵ Ngako-ke nine basemphumalanga, nikani Simakadze ludvumo, niphakamise Libito laSimakadze, longuNkulunkulu wema-Israyeli, nimphakamise etichingini taselwandle.

¹⁶ Siva kuhlabela kuchamuka emikhawulweni yemhlaba, kutsi: “Ludvumo kuLolungile!” Kodvwa mine ngatsi: “Ngiyahusheka! Ngiyahusheka! Maye kimi! Labenta luzungu bachubeka ngeluzungu! Luzungu lwekutsengisa labanye bantfu!”

¹⁷ Kwesabisa, nemgodzi kanye nelugibe kulindzele nine, yebo, nine bantfu bemhlaba.

¹⁸ Lowo lobalekela umsindvo wekwesabisa, uyakuhholokoshela emgodzini; lowo loyawukhuphuka kulomgodzi, uyawubanjwa lugibe. Tivalo temanti emazulwini tivuliwe, tisekelo temhlaba tiyanyikatiswa.

¹⁹ Umhlaba wephukile, umhlaba uchekeke ekhatsi, umhlaba unyakatiswa kakhulu.

²⁰ Umhlaba uyadzayitela njengesidzakwa, ujikita njengesidleke senyoni emoyeni. Umhlaba usindvwa kakhulu licala lawo lekuhlubuka, sewuze uyawa, futsi ungeke uphindze usukume.

²¹ Ngalelo langa Simakadze uyawujezisa tiphatsimandla tasemazulwini etulu, nemakhosi asemhlabeni phansi.

²² Bayawubutselwa ndzawonye njengetiboshwa letiboshelwe ekhulukuthu, bayawuvalelwa ejele, bajeziswe emvakwemalanga lamanyenti.

²³ Inyanga iyawufiphala, lilanga lidliwe ngemahloni; ngobe Simakadze longuSomandla uyawubusa eNtsabeni yaseSiyoni naseJerusalema, yebo, abuse ngeludvumo embikwebaholi bayo.