Isaya 22 - Siswati 1996 Bible

Livi lesembulo ngeJerusalema

¹ Leli livi lesembulo lelimacondzana neSigodzi Sembono lelitsi: Kwentiwa yini kutsi bonkhe bantfu bakho bakhwele baye etulu etingcongwaneni tetindlu?

² Awu dolobha leligcwele siyaluyalu! Awu dolobha lemsindvo nekujabula! Bantfu bakho labafile abakabulawa yinkemba, futsi abafelanga emphini.

³ Bonkhe baholi bakho babaleke kanyekanye; batfunjwe bangakalwi nekulwa ngebutjoki. Nonkhe nine lenibanjiwe naboshwa kanyekanye, nivele nabaleka, nome sitsa besisekhashane.

⁴ Ngako-ke ngatsi: “Sukani lapha kimi, ase ngikhale kabuhlungu. Ningacali netame kungidvudvuta ngekubhujiswa kwesive sakitsi.”

⁵ INkhosi Simakadze lenguSomandla ibeke lilanga lesiyaluyalu, lekugcotjwagcotjwa nelekudzidzeka eSigodzini Sembono, lilanga lekuhhihlitwa kwetibondza, lilanga lekutikhalela etintsabeni.

⁶ Elamu utsatsa umgodla wemicibisholo, utseleka nebagibeli bakhe betincola kanye nemahhashi; emadvodza aseKhiri agwabula emahawu.

⁷ Tihosha tenu telikhetselo tigcwele tincola temphi, nebagibeli bemahhashi babekwe emasangweni elidolobha;

⁸ Juda sewemukwe tonkhe tivikelo takhe. Ngaleso sikhatsi nahlola tikhali taseNdlini Yelihlatsi.

⁹ Nabona kutsi Lidolobha laDavide linetindzawo letinyenti letibhidlikile; navimbela emanti ema eSitibeni Lesingentansi.

¹⁰ Nabala tindlu taseJerusalema, nabhidlita tindlu letinye nentela kucinisa lubondza.

¹¹ Nakha lidamu emkhatsini wetindvonga letimbili, lidamu lekugcina emanti eSitiba Lesidzala, kodvwa anizange nibuke kuLowo lowakwenta nome nimnake Lowo lowakuhlela endvulo.

¹² INkhosi Simakadze lenguSomandla yanibita ngalelo langa kutsi nitewukhala nilile, kutsi nitewuhhula tinwele tenu, nembatse emasaka.

¹³ Kodvwa bukani, kuyajatjulwa kubuswe, kuhlatjwa tinkhomo netimvu, yebo, kudliwa inyama, kunatfwe liwayini! Nitsi: “Asidle, sinatse, ngobe kusasa sitakufa!”

¹⁴ Simakadze longuSomandla ukwembulile loku kimi, ngakuva: “Niyawuze nife solomane lesono singakahlawulelwa”, isho njalo iNkhosi Simakadze lenguSomandla.

Secwayiso kuShebna

¹⁵ Naku-ke lokushiwo yiNkhosi Simakadze lenguSomandla, itsi: “Hamba, uye endvuneni, kuShebna lophetse sigodlo, ufike utsi:

¹⁶ Wentani lapha, kona ngubani lokunike lemvume yekumba lithuna lakho lapha, nekukapuluta lithuna lakho lapha etulu ngekucota indzawo yakho yekuphumula lapha edvwaleni?

¹⁷ “Caphela-ke, Simakadze sewutakuntfonya akujikijele khashane, awu, wena ndvodza lenemandla.

¹⁸ Utakugicita kamatima njengebhola, akujikijele eveni lelikhulu. Ngulapho-ke uyawufela khona, lapho tincola takho letinhle tiyawusala khona, wena hlazo lendlu yenkhosi yakho!

¹⁹ Ngiyawukwehlisa esikhundleni sakho, ususwe esikhundleni sakho,” kusho Simakadze.

²⁰ “Ngalelo langa ngiyawubita inceku yami, Eliyakimu, umsa waHilkiya.

²¹ Ngiyakumembatsisa ngemjiva wakho, ngimbophe ngelibhande lakho; emandla nemagunya akho ngiwanike yena. Uyawuba nguyise walabo labahlala eJerusalema nakubendlu yakaJuda.

²² Ngiyawubeka sikhiya sendlu yakaDavide emahlombe akhe; lakuvulako kute loyawukuvala, nalakuvalako kute loyawukuvula.

²³ Ngiyakumbetsela njengesipikili esikhundleni sakhe, yena uyawuba njengesihlalo seludvumo emndenini weyise.

²⁴ Kuleso sipikili kuyawuphanyekwa sonkhe sisindvo semndeni weyise, titukulwane takhe nemiliba yakhe, ngisho tonkhe titja letincane takhona, kusukela etindishini kuye emajekeni.”

²⁵ Simakadze longuSomandla uyakhuluma utsi: “Ngalelo langa lesipikili besiyawushayelwa sishone sisime, siyawuphuma siwe, bese kutsi lomtfwalo bewuphanyekwe kuso udzilikele phansi emhlabatsini.” Simakadze ukhulumile.