Isaya 19 - Siswati 1996 Bible

Livi lesembulo ngeGibhithe

¹ Livi lesembulo lelimacondzana nelive laseGibhithe: Buka la, Simakadze ugibela lifu leligijima kakhulu, ubange kulaseGibhithe. Tithico taseGibhithe tiyawutfutfumela embikwakhe, netinhlitiyo tebantfu baseGibhithe tiyancibilika ngekhatsi kwabo.

² “Ngitawuchukuluta umGibhithe avukele umGibhithe, umnakabo uyakulwa nemnakabo, makhelwane acabane namakhelwane, lidolobha lihlasele lidolobha, umbuso uvukele umbuso.

³ EmaGibhithe ayawuphelelwa ngemandla; emasu awo ngiyawuwacedza atsi nya. Ayawuya etithicweni ayewuphengula, aze ayewufuna labaphansi, netangoma, nalababhulako.

⁴ BaseGibhithe ngitabanikela etandleni tenkhosi lenemandla nalenelulaka. Bayawubuswa yinkhosi leyesabekako,” kusho iNkhosi Simakadze lenguSomandla.

⁵ Emanti emfula iNayili ayakusha ome, nekujula kwemfula kuyawukoma; yebo, kuyawusala kusebaleni.

⁶ Imisele yemanti iyawunuka luvundze, yebo, imifula yonkhe yaseGibhithe iyawubotja yome. Umhlanga nelikhwane kuyawubuna,

⁷ yebo, nayo yonkhe intfo lehlumako eceleni kwemfula lomkhulu iNayili, ekungeneleni kwawo elwandle. Tonkhe tivandze letihlanyelwe ngasemfuleni iNayili tiyawuhamuka tome, tingaphindzi tibonwe.

⁸ Badwebi betinhlanti bayawukhala, balile, bonkhe labajika emahhuka abo emfuleni iNayili, labo labajika emanetha abo emantini, yebo, bayawujabha baphelelwe ngemandla.

⁹ Labo bafati labankwefa imitiya yelineni bayawujabha, bephotseli labeluka ilineni lemhlophe bayawuphelelwa litsemba.

¹⁰ EmaGibhithe latfungako ayawuphela emandla, nabo bonkhe labahola ngelilanga bayawudzabuka etinhlitiyweni.

¹¹ Tiphatsimandla taseSowani atisilo lutfo, kuphela nje, titibhungayeti; beluleki labahlakaniphile bakaFaro beluleka ngeteluleko letingenangcondvo. Ungasho kanjani kuFaro utsi: “Ngingulomunye walabahlakaniphile, intalo yemakhosi akadzeni”?

¹² Aphi nyalo emadvodza akho lahlakaniphile? Akakukhombise, akwatise loko, Nkulunkulu longuSomandla lasahlose kukwenta ngeGibhithe.

¹³ Tiphatsimandla taseSowani setitibhungayeti, baholi baseMemfisi sebakhohlisiwe; imisumphe yebantfu bakhona seyedukise lonkhe live laseGibhithe.

¹⁴ Simakadze sewutfululele kubo umoya wekudzidzeka; benta iGibhithe iyendze kuko konkhe leyikwentako, iyendze njengesidzakwa emahlanteni aso.

¹⁵ Kute lokungabe kusentiwa yiGibhithe, inhloko nome umsila, ligala lelisundvu nome umhlanga.

¹⁶ Ngalelo langa baseGibhithe bayawuba njengebafati. Bayawutfutfumela ngenca yekwesaba ingalo yaSimakadze longuSomandla leyawube iphakanyiselwe kumelana nabo.

¹⁷ Live lakaJuda liyawutsela kwesaba kubantfu baseGibhithe; bonkhe labayakuva nje kuphatfwa lelibito laJuda, bayakwetfuka, ngenca yaloko Simakadze longuSomandla losahlose kukwenta kubo.

¹⁸ Ngalelo langa emadolobha lasihlanu aseGibhithe ayawukhuluma siHebheru, lulwimi lwaseKhenani, ente sifungo kuSimakadze longuSomandla. Lelinye lawo kuyawutsiwa liDolobha Lembhubhiso.

¹⁹ Ngalelo langa kuyawuba nelilati laSimakadze ekhatsi eveni laseGibhithe, nensika lesikhumbuto saSimakadze eminyeleni yaseGibhithe.

²⁰ Kuyawuba tibonakaliso letikhumbuta ngaSimakadze longuSomandla eveni laseGibhithe. Nase bakhala kuSimakadze ngenca yebacindzeteli babo, uyawubatfumelela umsindzisi nemvikeli, yena loyawufike abephule.

²¹ Ngako Simakadze uyakwenta kutsi emaGibhithe amati; ngalelo langa bayawumhlonipha Simakadze. Bayawumkhonta ngemihlatjelo nangeminikelo yalokutinhlavu, bayakwenta tetsembiso kuSimakadze, futsi bayawutigcina.

²² Simakadze uyawushaya iGibhithe ngesifo lesibulalanako; uyawubashaya ngaso, aphindze abaphilise. Bayawuphendvukela kuSimakadze, naye uyawukuva kuncusa kwabo, bese uyabaphilisa.

²³ Ngalelo langa kuyawuba nemgwaco losuka eGibhithe uye e-Asiriya. Base-Asiriya bayakuya eGibhithe, nebaseGibhithe bayakuya e-Asiriya. Bantfu baseGibhithe nebase-Asiriya bayakukhonta ndzawonye.

²⁴ Ngalelo langa Israyeli uyawuba ngewesitsatfu kanye neGibhithe ne-Asiriya, kube sibusiso emhlabeni.

²⁵ Simakadze longuSomandla uyawubabusisa, atsi: “Ayibusiswe iGibhithe, sive sami, ne-Asiriya lengumsebenti wetandla tami, na-Israyeli lolifa lami.”