Isaya 17 - Siswati 1996 Bible

Kujeziswa kwemaSiriya nema-Israyeli

¹ Livi lesembulo lelimacondzana neDamaseko: “Buka la, iDamaseko ingeke isaba lidolobha, kodvwa seyitawuba yindvundvuma nje yetindzala.

² Emadolobha ase-Siriya atawushiywa abe ngemadlelo emihlambi yetimvu netimbuti, lapho iyawulala khona sekute nalotayesabisa.

³ Lidolobha leliyinqaba liyawunyamalala kulaka-Efrayimu, kuphele nebukhosi bendlunkhulu yaseDamaseko. Insali yaseSiriya iyawuba njengebukhosi baka-Israyeli,” kusho Simakadze longuSomandla.

⁴ “Ngalelo langa bukhosi bakaJakobe buyawunyamalala; nemitsebe lebhubuka emtimbeni wakhe iyawuhusheka iphele.

⁵ Kuyawuba njengemvuni nakageca tinhlanga letimile, avuna tibhuluja ngetandla takhe, kube njengemuntfu lobutsa lokuwa nakavunako eSigodzini semaRefa.

⁶ Noko letinye tibhuluja tiyawusala, njenganakuphundlwa sihlahla semncumo, bese kusala titselo temncumo letibili nome letitsatfu emagaleni lasetulu esicongweni sesihlahla, kusale lamane nome lasihlanu emagaleni latsele kakhulu,” kusho Simakadze longuNkulunkulu wema-Israyeli.

⁷ Ngalelo langa bantfu bayawubuka kuMdali wabo, bajikise emehlo abo bawabhekise kuye Longcwele waka-Israyeli.

⁸ Bangeke basabuka emalatini, lekungimisebenti yetandla tabo, futsi bangeke basatihlupha ngekunaka tinsika ta-Ashera nemalati emphepho labentiwa ngimino yabo.

⁹ Ngalelo langa emadolobha abo latinqaba, lababewashiyiswe ngema-Israyeli, ayawufanana netindzawo lesetishiyelwe tinchachabutane nemitfuma. Onkhe ayawubate bantfu.

¹⁰ Umkhohliwe Nkulunkulu uMsindzisi wakho; awukalikhumbuli lidvwala lelisiphephelo sakho. Ngako-ke nome ungahlanyelela tithico takho titfombo letinhle kakhulu, uhlanyele tivini letiphuma kulamanye emave,

¹¹ nome ngalelo langa lotihlanyela ngalo uvele utente tikhule, kutsi ekuseni nawutihlanyela utente tihlume, noko sivuno sato siyawufanana nelite ngelilanga lesifo neletinhlungu letingelapheki.

Kuncotjwa kwetive letititsa

¹² Awu, ngekuhlokoma kwetive letinyenti, tihlokoma njengekuhlokoma kwelwandle! Awu, kuhokoma kwemsindvo webetive, tihokoma njengekuhlokoma kwemanti lamanyenti!

¹³ Naloku tive tihokoma njengekuhokoma kwemabhudlo emanti, Nkulunkulu nakabatsetsisa, babaleka baye khashane, bapheshulwe emoyeni njengemakhoba, nakaphephuka etulu emagcumeni, nanjengelukhula loluzushuniwe, nalukhukhulwa sihhuhhula semoya.

¹⁴ Kutsi kungahlwa, bahlanyele budlova! Kutsi kusa, babe bangasekho! Lesi sabelo salabo labaphanga tsine, likoyi lalabo labasiphangako.