Isaya 15 - Siswati 1996 Bible

Nkulunkulu utalibhubhisa live lakaMowabi

¹ Leli livi lesembulo lelimacondzana neMowabi: Ngebusuku lekwabhujiswa ngabo i-Ari, live lonkhe lakaMowabi laphela laba tindzala. Ngebusuku lekwabhujiswa ngabo iKhiri, live lonkhe lakaMowabi lasala selitindzala.

² IDiboni seyenyukele ethempelini, endzaweni lephakeme yekukhontela, kuyawukhala. Sive sakaMowabi sikhalela iNebo neMedeba. Tonkhe tinhloko tihhuliwe, tonkhe tilevu tihhuliwe.

³ Etitaladini bembetse emasaka, bakhala etikwetindlu, bakhale nasetinkhundleni, etihlatsini tabo kugeleta tinyembeti.

⁴ Bantfu baseHeshboni nebase-Eleyale bayakhala, emaphimbo esililo sabo evakala khashane, ngisho naseJahasi. Ngako-ke nemabutfo emphi akaMowabi lahlomile ayakhala, tinhlitiyo tawo tiyatfutfumela.

⁵ Inhlitiyo yami ikhalela Mowabi, bantfu bakhe babaleka kuye bacondza eSowari, labanye bacondza e-Eglathi Shelishiya. Benyuka bahamba bakhala baya eLuhithi, bahamba ngemgwaco baya eHoronayimu, bakhaliswa kubhujiswa kwabo.

⁶ Emanti aseNimrimu omile, netjani bubunile; lokumilako sekuphele konkhe, sekute lokuluhlata lokusasele.

⁷ Ngako leyo ngcebo yabo bese bayitfolile bayibutsisa ndzawonye, bayetfwala, bahamba nayo; bayawushona ngale kwemfudlana wemabhabhabhulomu.

⁸ Kulila kwabo kuhaza ngesheya kwemnyele wakaMowabi. Kukhala kwabo kuvakala e-Eglayimu, kulila kwabo kuvakale eBheri Elimu.

⁹ Emanti aseDiboni agcwele ingati, kodvwa iDiboni ngisetayengetela; yebo, libhubesi kulabo lababaleka kaMowabi, nakulabo labangimisalela kulelo live!