Isaya 11 - Siswati 1996 Bible

Umbuso wekuthula

¹ Kuyawuhluma lihlumela esiphuntini sakaJese; ligala lelimila etimphandzeni takhe liyawutsela titselo.

² Moya waSimakadze uyawubasetikwakhe, Moya wekuhlakanipha newekucondza, Moya wekweluleka newemandla, Moya welwati newekwesaba Simakadze,

³ uyawutijabulisa ekwesabeni Simakadze. Angeke ehlulele ngalakubona ngemehlo akhe, nome ente sincumo ngalakuve ngetindlebe takhe;

⁴ kodvwa labeswele uyawubehlulela ngekwemtsetfocotfo, labamphofu belive abehlulele ngekungakhetsi. Uyawushaya umhlaba ngendvuku yemlomo wakhe; ngekuphefumula kwemlomo wakhe uyawubulala lababi.

⁵ Kulunga kuyawuba libhande lakhe, kwetsembeka kube ngumbhenso welukhalo lwakhe.

⁶ Imphisi iyawuhlalisana nelizinyane lemvu, ingwe iyawulala ndzawonye nembuti; linkhonyane, nelibhubesi lelincane, nenkhomo lekhuluphele kuyawuhlala ndzawonye; konkhe kuyakweluswa ngumntfwana lomncane.

⁷ Inkhomati iyakudla dlelo linye nelibhele, emankhonyane ako acambalale ndzawonye, libhubesi lidle tjani njengenkhabi.

⁸ Luswane luyawudlala ngasemgodzini wemfeti, kutsi nemntfwana lomncane afake sandla sakhe emgodzini welibululu.

⁹ Kungeke kulimate futsi kungeke kubulale nome ngangukuphi entsabeni yami lengcwele, ngobe umhlaba uyawugcwala kwati Simakadze, njengobe nemanti agcwalisa lwandle.

Sive lesidzingisiwe siyawuphindze sibuye

¹⁰ Ngalelo langa iMphandze yaJese iyakuma ibe siboniso kubetive, tive tiyawuhlangana kuyo, indzawo yayo yekuphumula ibe neludvumo.

¹¹ Ngalelo langa Simakadze uyakwelula sandla sakhe kwesibili atibutsele imisalela yesive sakhe leyawube isasele e-Asiriya, naseGibhithe Lengentansi, neGibhithe Lengenhla, naseKushe, nase-Elamu, naseBhabhulona, naseHamathi, nasemaveni langaselwandle.

¹² Uyakuphakamisela tive siboniso, abutse batfunjwa baka-Israyeli; uyawuhlanganisa bantfu bakaJuda labasakatekele emagumbini omane emhlaba.

¹³ Umona wa-Efrayimu uyawunyamalala, titsa takaJuda ticedvwe nya; Efrayimu angeke aphindze abe nemona ngaJuda, naJuda angeke aphindze abe nebutsa ku-Efrayimu.

¹⁴ Bayawukwehla emaceleni aseFilistiya bawahlasele enshonalanga, bobabili bayawuphanga bantfu labahlala emphumalanga. Bayawulidla live laka-Edomu nelakaMowabi, babuse etikwema-Amoni.

¹⁵ Simakadze uyakomisa sihlenge selwandle lwaseGibhithe; uyakwelula sandla sakhe lesinemandla etikweYufrathe, ayihamule ngemoya loshisako. Lomfula uyakuwehlukanisa ekhatsi, ube ngimifula lesikhombisa, khona bantfu batekwewela bafake tincabule.

¹⁶ Kuyawuba nemgwaco lomkhulu wemisalela yesive sakhe leyawube isele e-Asiriya, njengobe wawukhona nakubaka-Israyeli ngesikhatsi baphuma eGibhithe.