Isaya 10 - Siswati 1996 Bible

¹ Maye kulabo labashaya imitsetfo lengakalungi, kulabo labashaya imitsetfo yekucindzetela,

² bentele kwemuka labamphofu emalungelo abo, badlelele bantfu bami labacindzetelekile emalungelo abo emtsetfocotfo, batsatse imphango kubafelokati, badlelele labangenaboyise.

³ Niyakwenta njani ngelilanga lekwehlulelwa, ngesikhatsi sehlakalo sichamuka khashane? Niyawubalekela kubani nicele lusito? Niyakuwushiya nabani lomcebo wenu?

⁴ Kute leningakwenta ngaphandle kwekushosha phansi kanye nalabatfunjwako, nome niwele phansi emkhatsini walababulewe. Noko ngako konkhe loku, lulaka lwakhe alukagucuki, nesandla sakhe sisephakeme.

Kwehlulela kwaNkulunkulu i-Asiriya

⁵ “Maye kulo lase-Asiriya, indvuku yelulaka lwami, lelisandla salo sifumbetse sagila selulaka lwami.

⁶ Ngilitfumela esiveni lesingenaNkulunkulu, ngilikhiphele kubantfu labangitfukutselisako, kutsi lihlutfule imphango, litsatse lokuphangiwe, nekutsi libagcobagcobe phansi njengeludzaka lwendlela.

⁷ Kodvwa loko akusiko lebekuhloswe yinkhosi yase-Asiriya, akusiko lebekusengcondvweni yayo. Inhloso yayo kubhubhisa, nekucedza tive letinyenti.

⁸ Itsi: ‘Akusito tonkhe yini tindvuna tami lesetingemakhosi?

⁹ IKhalno ayikafanani yini neKhakhemishi? IHamathi ayifanani yini ne-Aphadi? ISamariya yona ayifanani yini neDamaseko?

¹⁰ Njengobe sandla sami sayibamba imibuso yetithico, imibuso leyayimifanekiso yayo yayendlula leya yaseJerusalema neyaseSamariya,

¹¹ ngingeke yini ngimelane nayo iJerusalema kanye netithico tayo, njengaloku ngemelana nayo iSamariya netithico tayo?’ ”

¹² Simakadze nase acedzile yonkhe imisebenti yakhe lemelene nentsaba iSiyoni neJerusalema, uyakutsi: “Ngiyakuyijezisa inkhosi yase-Asiriya ngenca yeligcabho layo langemabomu lelisenhlitiyweni yayo nangenca yekutiphakamisa kwayo lokusemehlweni ayo.

¹³ Ngobe itsi: “ ‘Ngemandla esandla sami ngikwentile loku, nangekuhlakanipha kwami, ngobe nginako kucondza. Ngayisusa iminyele yetive, ngayiphanga imicebo yato. Njengalonemandla ngabawisa labakhe khona.

¹⁴ Njengalofinyelela esidlekeni senyoni, kanjalo sandla sami safinyelela kuyo imicebo yetive; njengobe bantfu babutsa emacandza lashiyiwe, kanjalo nami ngawabutsa onkhe emave, kute nalinye lelake labhengutisa luphiko nome lavula umlomo lantjilota.’ ”

¹⁵ Lizembe liyatiphakamisa yini lona, libe ngetulu kwalowo lolijikitisako? Lona lisaha liyamhhongela yini lolisebentisako? Kube shangatsi umzaca bewungamjikitisa lowo lowuphetse nome sagila singamjikitisa lowo longesiso sigodvo!

¹⁶ Ngako-ke, iNkhosi Simakadze lenguSomandla iyawutfumela sifo lesondzisanako kulabo labanemandla base-Asiriya; ngephansi kwalokutikhukhumeta kwabo kuyakokheleka umlilo, yebo, umlilo lofanana nemalangabi lavutsako.

¹⁷ Kukhanya kwa-Israyeli kuyawuba ngumlilo, Longcwele wakhe abe lilangabi. Ngelilanga linye uyawuvutsa, udle emanyeva akhe netitfwetfwe takhe.

¹⁸ Uyawucedza buhle bemahlatsi akhe, nemasimi akhe lavundzile, kuphele umtimba nemphefumulo, kube njengekuphela kwemuntfu logulako.

¹⁹ Nemisalela yetihlahla telihlatsi lakhe iyawuba mbalwa kangangekutsi ngisho nemntfwana angatibhala phansi.

Imisalela yaka-Israyeli

²⁰ Ngalelo langa insali yaka-Israyeli, ngisho labo labasasele bendlu yakaJakobe, bangeke basetsembela kuye lowo lowabashaya balahleka phansi; kodvwa bayakwetsembela ngeliciniso kuSimakadze, Longcwele waka-Israyeli.

²¹ Insali iyawubuyela emuva, insali yakaJakobe iyawubuyela kuSomandla longuNkulunkulu.

²² Nome sive sakho, wena Israyeli, singaba sinyenti ngangesihlabatsi saselugwini lwelwandle, kuyawubuyela insali kuphela. Imbhubhiso ikhishwe, iphuphume ngekulunga.

²³ INkhosi Simakadze lenguSomandla nguye loyawuchuba lembhubhiso lekhishiwe kulo lonkhe live.

²⁴ Ngako-ke naku lokushiwo yiNkhosi, Simakadze lenguSomandla, itsi: “Awu, sive sami lesihlala eSiyoni, ningawesabi ema-Asiriya wona lanishaya ngendvuku aniphakamisele sagila, njengobe kwakwenta baseGibhithe.

²⁵ Masinyane intfukutselo yami kini itawuncamuka. Intfukutselo yami seyiyawumelana nema-Asiriya, iwabhubhise.”

²⁶ Simakadze longuSomandla uyakuwashaya ngesiswebhu, njengamzukwana ashaya emaMidiyani edvwaleni lase-Orebi, uyawuphakamisa indvuku yakhe ngetulu kwemanti, njengobe enta eGibhithe.

²⁷ Ngalelo langa umtfwalo wema-Asiriya uyawususwa emahlombe enu, nelijoko lawo lisuswe entsanyeni yenu; lijoko litakwephulwa njengobe senikhuluphele kangaka nje.

²⁸ Ema-Asiriya angena e-Aya, adzabula eMigroni, alondvolota imphahla yawo eMikmashi.

²⁹ Angena emsahweni atsi: “Sitawumisa busuku bunye eGeba.” IRama iyatfutfumela, iGibeya yakaSawula iyabaleka.

³⁰ Khala, Ndvodzakati yaseGalimu! Lalela, nawe Layisha! Nine base-Anathothi labahluphekile.

³¹ IMadmena iyabaleka; baseGebimu bagijimela kubhaca.

³² Lamuhla nje ema-Asiriya ayawumisa eNobi; ayawujikitisa tibhakela tawo entsabeni yeNdvodzakati yaseSiyoni, egcumeni laseJerusalema.

³³ Bukani la, iNkhosi Simakadze lenguSomandla iyawujuba emagala ngemandla lamakhulu. Tihlahla letiphakeme tiyawugawulwa, leto letidze tiyawuwiswa phansi.

³⁴ Uyawugawula tihlahla telihlatsi ngelizembe; iLebanoni iyakuwa embikwakhe Lonemandla Onkhe.