Ingoma Yetingoma 8 - Siswati 1996 Bible

¹ Kube mane bewungumnaketfu lowamunya bele linye nami kumake! Lapho-ke kube bengingakukhandza ungaphandle, bengitawuvele ngikucabuze, bekuyawubate ngisho namunye labeyakungedzelela.

² Bengitakuhola ngikumikise endlini ketfu, lapho bewutangifundzisa khona. Bengiyakukunika liwayini lelivangiwe kutsi ulinatse, emanti lamnandzi emahananandza ami.

³ Umkhono wakhe wangesancele ungumcamelo wenhloko yami, nemkhono wakhe wangesekudla uyangigona.

Umyeni:

⁴ Ngiyaniyala, madvodzakati aseJerusalema, ngitsi: Ningaluvusi lutsandvo, futsi ningalunyakatisi, luze lutivukele lona.

Ingoma yesitfupha Bangani:

⁵ Ngubani lona lochamuka ehlane eyeme kulamtsandzako? Ngakuvusa ngaphansi kwesihlahla semahhabhula; ngulapho-ke lapho unyoko akwemitsela khona, ngulapho-ke lona labephetfwe ngumhelo, akubelekela khona.

Umyeni:

⁶ Ngibeke njengeluphawu etikwenhlitiyo yakho, yebo, njengeluphawu emkhonweni wakho; ngobe lutsandvo lunemandla njengekufa, sikhwele salo asitfobiseki, sinjengelithuna. Lushisa njengemlilo lovutsako, yebo, njengelilangabi lelinemandla.

⁷ Emanti lamanyenti ngeke alucime lutsandvo, nemifula ingeke ilukhukhule. Nome ngabe umuntfu abenganikela ngawo wonkhe umcebo wasekhaya lakhe kuze atewutsenga lutsandvo, loko bekuyawuba yinhlekisa yodvwa nje.

Bangani:

⁸ Sinadzadzewetfu lomncane, usengakaphumi ngisho nemabele. Siyakwenta njani ngalodzadzewetfu, nangabe kukhona lofuna kumenta umkakhe?

⁹ Nangabe yena alubondza, etikwakhe sitakwakha imibhoshongo yesiliva; nangabe yena asivalo, sitamvalela ngemicabo yemisedari.

Makoti:

¹⁰ Ngilubondza, emabele ami anjengemibhoshongo. Ngako-ke emehlweni akhe sengibe ngumuntfu loletsa kweneliseka.

¹¹ Solomoni abenensimi yemivini eBhali Hamoni; wase ucashisa lesivini sakhe kubacashi. Kwakufanele kube ngulowo nalowo aletse loko lokusitselo saso, kube tinhlavu tesiliva letiyinkhulungwane.

¹² Kodvwa lesi sivini sami, ngimi lengingephana ngaso; awu, Solomoni, letinhlavu takho letiyinkhulungwane, kantsi tinhlavu letingema-200 talabo labanakekela titselo taso.

Umyeni:

¹³ Wena lohlala etingadzeni uhlale nebangani labakusingatsile, ngivise liphimbo lakho!

Makoti:

¹⁴ Phumela ebaleni, wena longitsandzako, bani njengemgankla, nome-ke njengelizinyane lenyamatane, etintsabeni letigcwele emakha.