Ingoma Yetingoma 7 - Siswati 1996 Bible

¹ Maye, tinhle tinyawo takho kuleto tincabule tato, awu, ndvodzakati yemntfwanenkhosi! Ematsanga akho atindingilizi njengemachuzu, umsebenti wesandla sachwephesha.

² Inkhaba yakho isiyingiliti injengenkomishi lengenasibambo lengahlali ingenalo liwayini leliphiswe kahle. Sisu sakho siyindvundvuma yakolo letungeletwe ngiminduze.

³ Emabele akho anjengemazinyane lamabili, yebo, emaphahla emphala.

⁴ Intsamo yakho injengembhoshongo lowakhiwe ngematinyo endlovu. Emehlo akho angemachibi aseHeshboni ngasesangweni laseBhathi Rabhimu. Likhala lakho linjengembhoshongo waseLebanoni lobuke ngaseDamaseko.

⁵ Inhloko yakho iyakuchelisa njengeNtsaba iKhameli. Tinwele takho tinjengendvwangu lebukhwebeletane yebukhosi, inkhosi ibanjwe njengesigcili, ikhangwa ngimichino yato.

⁶ Maye, umuhle, kantsi futsi uyajabulisa, awu, sitsandvwa, ngebuhle bakho!

⁷ Lutsi lwemtimba wakho lunjengesihlahla selisundvu, nemabele akho anjengetitfungo tetitselo.

⁸ Ngatsi: “Ngitasekhwela lesihlahla selisundvu, ngitatikha titselo taso.” Shangatsi emabele akho angaba njengetikhehle temavini, kutsaphuka kwemakha ekuphefumula kwakho kube njengemahhabhula,

⁹ nemlomo wakho ube njengeliwayini lelendlula tonkhe tinhlobo. Shangatsi liwayini lingacondza ngco kulongitsandzako wami, lishelele kamnandzi etindzebeni takhe temlomo nasematinyweni akhe.

Makoti:

¹⁰ Mine ngiwalongitsandzako, naye uyangilangatelela.

¹¹ Wota, wena longitsandzako, sambe siye esigangeni, busuku asibucitsele emitini.

¹² Asivuke ekuseni siye etivinini siyewubona kutsi tihlahla temivini atikadvumbi yini, nekutsi imidvumba yato seyichakazile yini, nekutsi emahananandza asabhahele yini wona, ngulapho-ke ngitakunikela khona lutsandvo lwami.

¹³ Emamandraki asatsaphuka emakha awo, nangasemnyango wetfu kunabo bonkhe bunandzi, lobusha nalobudzala, lengisolo ngabulondvolotela wena, sitsandvwa sami.