Ingoma Yetingoma 5 - Siswati 1996 Bible

Umyeni:

¹ Sengifikile engadzeni yami, dzadzewetfu, mntfwanaketfu, ngibutse imure yami nemakha ami. Ngiludlile luhlanga lwami lwetinyosi neluju; sengilinatsile liwayini lami nelubisi lwami. Dlanini, bomngami, ninatse; natsisisani lutsandvo, nine titsandzani.

Bangani: Ingoma yesine Makoti:

² Ngalala, kodvwa inhlitiyo yami ayizange seyibutsi cutfu butfongo. Lalela! Longitsandzako uyanconcotsa, utsi: “Ngivulele, dzadzewetfu, sitsandvwa sami, tuba lami, wena longenasici wami. Inhloko yami seyinetfwe ngematolo, tinwele tami tinemswakama wasebusuku.”

³ Ngiwukhumulile umjiva wami, ngiphindze ngiwembatse yini? Ngitigezile tinyawo tami, ngiphindze ngitingcolise yini?

⁴ Longitsandzako wami wase ufaka sandla sakhe esikhaleni semnyango, inhlitiyo yami yase icala kumhawukela.

⁵ Ngase ngiyavuka ngayawuvulela longitsandzako wami; sandla sami sasintfontsa imure, tingalo tami tigeleta imure, lapha etibambeni tesivalo.

⁶ Ngamvulela longitsandzako wami, kodvwa longitsandzako wami abesahambile, angasekho. Inhlitiyo yami yayiphumele kuye ngesikhatsi akhuluma. Ngamfuna, kodvwa angizange ngimtfole. Ngambita, kodvwa akazange asabele.

⁷ Balindzi basebusuku bangitfola ngesikhatsi bajikeleta ekhatsi edolobheni. Bangidzindza ngendvuku, bangilimata; bangemuka lijazi lami, labo balindzi betibondza!

⁸ Ngiyaniyala, madvodzakati aseJerusalema, nanimtfola longitsandzako, nitamtjela kutsini? Nibomtjela kutsi ngiyafa lutsandvo.

Bangani:

⁹ Unjani yena lona lotsandzekako wakho, uncono yini kunalabanye, wena lomuhle kunabo bonkhe besifazane? Kantsi lomkhwenyane wakho muhle kwendlula bonkhe yini, lokwekutsi ungaze usitjele kanjalo?

Makoti:

¹⁰ Longitsandzako wami uyakhanga ngelibala; uyabonakala ngisho nome sebahlangene baba tinkhulungwane letilishumi.

¹¹ Inhloko yakhe iyigolide lecengiwe cobo; tinwele takhe tiyakhephuka njengemagagasi, kantsi timnyama njengelihhwabayi.

¹² Emehlo akhe anjengematuba langasemitfonjeni yemanti, agezwe ngelubisi, ahleti ngasemfuleni.

¹³ Tihlatsi takhe tinjengemibhedze yetitfombo tetinandzisi letitsaphukisa liphunga lato. Tindzebe temlomo wakhe tinjengeminduze lentfontsa emakha emure.

¹⁴ Imikhono yakhe injengemigcala yegolide lokufakwe kuyo ematje laligugu. Umtimba wakhe ushelela njengematinyo endlovu, uhlotjiswe ngemasafire.

¹⁵ Imilente yakhe ifanana netinsika letibatwe ngelitje lelimhlophe, letibekwe etisekelweni tegolide lecengekile. Lutsi lwemtimba wakhe lufanana neLebanoni, likhetselo lemisedari yayo.

¹⁶ Umlomo wakhe ukunongotela cobo lwako; yena empeleni muhle ngalokuphelele. Lowo-ke ngulongitsandzako wami, ungumngani wami, nine madvodzakati aseJerusalema.