Ingoma Yetingoma 4 - Siswati 1996 Bible

Umyeni:

¹ Maye, umuhle, sitsandvwa sami! Maye, umuhle bo! Emehlo akho ngaphansi kweveyili yakho afanana nematuba. Tinwele takho tifanana nemhlambi wetimbuti, yebo, wetimbuti natehla eNtsabeni iGileyadi.

² Ematinyo akho afanana nemhlambi wetimvu letisandza kuhhulwa, natikhuphuka ekugezweni. Nguleyo ihamba naleyo leliphahla kanye nayo, kute nayinye lehamba ngayodvwa.

³ Tindzebe temlomo wakho tinjengetincotfo letiboshiwe letibovu, umlomo wakho uyatsandzeka. Tinhlafuno takho ngaphansi kweveyili yakho tinjengetincetu temahananandza.

⁴ Intsamo yakho injengembhoshongo waDavide, lowakhiwe ngemihlobiso, uyindingilizi, kuwo kulenga emahawu layinkhulungwane, onkhe angemahawu etingwazi tasemphini.

⁵ Emabele akho lamabili anjengemazinyane lamabili, yebo, njengemazinyane langemaphahla emphala, ladla emkhatsini weminduze.

⁶ Kudzimate kudzabuke kusa, titfunti tibaleka, ngiyawukhuphukela entsabeni yemure nasegcumeni lemphepho.

⁷ Umuhle wonkhe, sitsandvwa sami; kute nalesincane sici kuwe.

⁸ Wota nami sisuke eLebanoni, makoti wami, wota sambe nawe lapha eLebanoni. Yehla esicongweni sase-Amana, esicongweni saseSeniri, ingcongwane yeHemoni, sisuke emhumeni wemabhubesi, nakuso sidleke sekudlalela tingwe.

⁹ Uyitfumbile inhlitiyo yami, dzadzewetfu, makoti wami. Uyitfumbile inhlitiyo yami ngekungikha kanye nje ngemehlo akho, ngelucu lunye nje lwengcibe yentsamo yakho.

¹⁰ Maye, lumnandzi bo lutsandvo lwakho, dzadzewetfu, makoti wami. Lujabulisa kangakanani-ke lutsandvo lwakho kuneliwayini, neliphunga lemakha akho limnandzi kunelesinongo!

¹¹ Tindzebe temlomo wakho tintfontsa kunongotela lokunjengekweluju lwetinyosi, makoti wami. Lubisi neluju kungaphansi kwelulwimi lwakho. Kutsaphuka kwemakha etingubo takho kunjengalokwa kwaseLebanoni.

¹² Utungeletwe ngelutsango njengengadze, dzadzewetfu, makoti wami. Usiyalu lesakhelwe lutsango, umtfombo lobekwe luphawu.

¹³ Tilimo takho tilihlatsi lemahananandza lanetitselo telikhetselo, nehena, nenadi,

¹⁴ inadi nesafroni, ikalamu nesinamoni, nayo yonkhe inhlobo yesihlahla semphepho, nesemure, nesenhlaba, nato tonkhe tinandzisi leticolisakele.

Makoti:

¹⁵ Ngingumtfombo wasengadzeni, siyalu semanti lagobhotako, lageleta ehla esuka eLebanoni.

¹⁶ Vuka, moya wasenyakatfo, ute nawe, moya waseningizimu! Hhusha etikwengadze yami, kuze kutsaphuka kwemakha ayo kwandze kabanti. Longitsandzako akete engadzeni yakhe atewunambitsa titselo tayo telikhetselo.