Ingoma Yetingoma 3 - Siswati 1996 Bible

¹ Onkhe emalanga ebusuku, nangilele embhedzeni wami, bengimfuna lowo lotsandvwa yinhlitiyo yami; ngamfuna, kodvwa angizange ngimtfole.

² Ngitawuvuka-ke nyalo, ngiyewuyaluka nasedolobheni, etitaladini talo nasetinkhundleni talo. Ngiyawuphenya lowo lotsandvwa yinhlitiyo yami. Ngako ngamfunisisa, kodvwa angimtfolanga.

³ Balindzi basebusuku bangitfola ngesikhatsi bajikeleta ekhatsi edolobheni. Ngatsi kubo: “Nimbonile yini lotsandvwa yinhlitiyo yami?”

⁴ Ngatsi nje ngitsi shelele kubo, ngase ngiyamtfola lotsandvwa yinhlitiyo yami. Ngamgaca ngemikhono ngamnkonkoshela, ngangabe ngisamyekela, ngaze ngayawumngenisa endlini ketfu, endlini yalowo lowangetfwala.

Umyeni:

⁵ Ngiyaniyala, madvodzakati aseJerusalema, ngetimphala nangetinyamatane letinsikati tesiganga, ngitsi: Ningaluvusi lutsandvo, futsi ningalunyakatisi, luze lutivukele lona.

Ingoma yesitsatfu Bangani:

⁶ Ngubani loya lokhuphuka achamuka ehlane, lofanana nensika yentfutfu, lotsaphuka emakha emure newemphepho leyakhiwe ngato tonkhe tinongo temhwebi?

⁷ Bukela! Sihlalo saSolomoni lesetfwalwako, sisingatfwe tingwazi letingema-60, emadvodza lahlonipheke kakhulu ka-Israyeli,

⁸ onkhe ahlome ngetinkemba, onkhe bokadzebona etimphini, nguleyo ifake inkemba yayo engculwini, ilungele kulwa nalokwesabisanako kwasebusuku.

⁹ Inkhosi Solomoni yatakhela leso sihlalo: Yasakha ngetingodvo taseLebanoni.

¹⁰ Tinsika taso watakha ngesiliva, kwatsi liphansi laso walenta ngegolide. Sihlalo sona sentiwa ngalokubukhwebeletane; lonkhe lingekhatsi laso lakhiwa ngebunono, lakhiwa ngetintfombi taseJerusalema.

¹¹ Phumani, nine madvodzakati aseSiyoni, nitewubukela inkhosi Solomoni, nasafake umchele wakhe, umchele lawetfweswa ngunina ngelilanga lagidzisa ngalo umfati, mhlazana inhlitiyo yakhe ijabulile.