Ingoma Yetingoma 2 - Siswati 1996 Bible

Makoti:

¹ Ngiyimbali yaseSharoni, umnduze wetigodzi.

Umyeni:

² Njengemnduze emkhatsini wemanyeva, unjalo lotsandzekako wami emkhatsini wetintfombi.

Makoti:

³ Njengesihlahla semahhabhula emkhatsini wetihlahla telihlatsi, unjalo lotsandzekako wami emkhatsini wemajaha. Ngiyakujabulela kuhlala emtfuntini wakhe, nesitselo sakhe siyanongotela, nangisinambitsa.

⁴ Ungitsetse wangiyisa endlini yelidzili, luphawu lwakhe kimi bekulutsandvo.

⁵ Ngiciniseni ngemagelebisi lomisiwe, ningihlumelelise ngemahhabhula, ngobe ngiyafa lutsandvo.

⁶ Umkhono wakhe wangesancele ungumcamelo wenhloko yami, nemkhono wakhe wangesekudla uyangigona.

Umyeni:

⁷ Ngiyaniyala, madvodzakati aseJerusalema, ngetimphala nangetinyamatane letinsikati tesiganga, ngitsi: Ningaluvusi lutsandvo, futsi ningalunyakatisi, luze lutivukele lona.

Ingoma yesibili Makoti:

⁸ Lalela, nasi sitsandvwa sami! Bukela, nanguya eta angcabisha engca etintsabeni, agiya etikwemagcuma.

⁹ Longitsandzako unjengemphala nanjengelitfole lemgankla. Bukela! Nango phela aseme emvakwelubondza lwakitsi, uhlola ngemafasitelo, alungute ngetikhala telutsango.

¹⁰ Longitsandzako wakhuluma kimi, watsi: “Sukuma, sitsandvwa sami, lotsandzekako wami, wota sambe.

¹¹ Buka la, busika sebendlulile, timvula setendlulile, atisekho.

¹² Timbali setiyamila emhlabeni, sekufike sikhatsi sekuhlabela, nekububula kwematuba sekuvakele kulelive letfu.

¹³ Sihlahla semkhiwa sesitsela titselo taso tekucala, nemivini lebhahelako itsela liphunga layo lelimnandzi. Sukuma sambe, sitsandvwa sami, sitsandvwa sami lesihle, asambe nawe.”

Umyeni:

¹⁴ Tuba lami lelisemifantfwini yemadvwala, etindzaweni tekubhaca emaceleni etintsaba, ngikhombise buso bakho, ungivise neliphimbo lakho; ngobe liphimbo lakho liyanongotela, nebuso bakho buyatsandzeka.

Bangani:

¹⁵ Sibambeleni timphungutja, timphungutja letincane, ngobe ngito letibhubhisa tivini, yebo, tivini tetfu letibhahelako.

Makoti:

¹⁶ Longitsandzako wami ngedvwa; nami ngiwakhe yedvwa, udlisa umhlambi wakhe emkhatsini weminduze.

¹⁷ Kuze kudzabuke kusa, kubaleke titfunti, buya, wena longitsandzako, bani njengemphala nanjengemgankla losemncane nawusemagcumeni langemahhelekehle.