Ingoma Yetingoma 1 - Siswati 1996 Bible

¹ Ingoma yetingoma yaSolomoni.

Ingoma yekucala Makoti:

² Akangicabuze ngekwanga kwemlomo wakhe, ngobe lutsandvo lwakho lumnandzi, kwendlula liwayini.

³ Liyajabulisa liphunga lemakha akho; libito lakho linjengemakha latfululwako. Nguko nje tintfombi tikutsandza kangaka!

⁴ Ngitsatse ngihambe nawe, asisheshise! Inkhosi ayingingenise esigodlweni sayo. Siyajabula sikutsakasele; sitaludvumisa lutsandvo lwakho, siludvumise kwendlula liwayini. Kufanele kutsi bakutsandze.

Bangani: Makoti:

⁵ Ngiluhlata, kodvwa ngiyatsandzeka, awu, madvodzakati aseJerusalema, ngiluhlata njengemathende aseKhedari; yebo, njengetindvwangu temathende aSolomoni.

⁶ Ningangibukisisi ngobe ngiluhlata, ngobe ngifuswe lilanga. Emadvodzana amake angitfukutselela, angenta ngalindza tivini, sakami sivini ngasiyekelela.

⁷ Ngitjele-ke, wena lengikutsandzako, ngukuphi lapho udlisa khona umhlambi wakho, nalapho tihlabulela khona timvu takho emini. Kudzingeke ngani kutsi ngifanane nemfati longaphansi kweveyili, ngehle ngenyuka ngasemihlambini yebangani bakho?

Umyeni:

⁸ Nangabe awati, wena mfati lomuhle kakhulu, landzela etinyatselweni temhlambi wetimvu, uyewudlisa khona emazinyane etimbuti ngasemathendeni ebelusi.

⁹ Sitsandvwa sami, ngitakufananisa nelihhashi lelisikati leliboshelwe kulenye yetincola taFaro.

¹⁰ Tihlatsi takho timomondziya nje nase tinemacici, nentsamo yakho nase yegatjiswe ingcibo.

¹¹ Sitakwentela emacici egolide lahlotjiswe ngesiliva.

Makoti:

¹² Kwatsi inkhosi isesetafuleni layo, emakha ami ayitsela ngeliphunga lelimnandzi.

¹³ Longitsandzako unjengemgodla wemakha emure kimi, lolele emkhatsini wemabele ami.

¹⁴ Lotsandzekako wami, usicheke setimbali tehena kimi, letivela etivinini tase-Eni Gedi.

Umyeni:

¹⁵ Maye, umuhle, sitsandvwa sami bo! Awu, maye, mahle emehlo akho! Kimi angematuba.

Makoti:

¹⁶ Maye, umuhle, sitsandvwa sami bo! Awu, maye, kona uyakhanga! Yebo, nembhedze wetfu utsite klaba!

Umyeni:

¹⁷ Emakabha endlu yetfu angimisedari; imishayo yetfu ingimisayiphuresi.