Imisebenti yebaPhostoli 8 - Siswati 1996 Bible

Sawula utingela libandla

¹ Sawula abevumelene nabo kutsi abulawe loStefano. Ngalo lelo langa libandla laseJerusalema lacala lahlupheka ngekutingelwa kabuhlungu. Onkhe emakholwa, ngaphandle kwebaphostoli, asakateka netigodzi tonkhe taseJudiya naseSamariya.

² Lamanye emadvodza lakholwako asingcwaba sidvumbu saStefano; akhala kakhulu amlilela.

³ Kodvwa Sawula wetama kulibhubhisa libandla, aphuma angena tindlu ngetindlu, awahudvula emakholwa, labadvuna nalabasikati, abafaka ejele.

LiVangeli lishunyayelwa eSamariya

⁴ Lamakholwa lasakateka kuto tonkhe tindzawo, abehamba alishumayela lelivi.

⁵ Filiphu waya edolobheni laseSamariya ayawushumayela ngaloKhristu kubantfu bakhona.

⁶ Sicumbi sebantfu salalela nganhlitiyo yinye loko kwakukhulunywa nguFiliphu, sabona netimangaliso labetenta.

⁷ Bomoya lababi babephuma kubantfu bakhala kakhulu; bonkhe lababefe tinhlangotsi nalababechuta nabo baphiliswa.

⁸ Kwaba nekutfokota lokukhulu kulelo dolobha.

⁹ Kulelo dolobha kwakukhona indvodza leyayinguSimoni, lobesanesikhatsi lesidze amangalisa emaSamariya ngemilingo yakhe. Abetigabatisa ngekutsi ungumuntfu lomkhulu kabi.

¹⁰ Bonkhe bantfu, betinhlobo tonkhe, babembukisisa bese batsi: “Ungemandla ankulunkulu latiwa ngekutsi: ‘Ngemandla Lamakhulu.’ ”

¹¹ Abesabamangalise ngemilingo yakhe sikhatsi lesidze kangangekutsi base bambukisisa.

¹² Kodvwa kwatsi nase bakholwa yinshumayelo yaFiliphu ngeliVangeli lembuso waNkulunkulu nangelibito laJesu Khristu, babhajatiswa, labadvuna nalabasikati.

¹³ NaSimoni matfupha wakholwa; emvakwekubhajatiswa kwakhe wahlala njalo asedvute kwaFiliphu, wamangala nakabona letimanga letinkhulu kanye netibonakaliso labetenta.

¹⁴ Baphostoli eJerusalema beva kutsi bantfu baseSamariya balemukele livi laNkulunkulu; ngako batfumela boPhetro naJohane kubo.

¹⁵ Nase befikile, bawathandazela emakholwa kutsi emukele Moya Longcwele.

¹⁶ Phela Moya Longcwele abesengakehleli nome kumunye nje wabo; bebabhajatiselwe egameni leNkhosi Jesu kuphela.

¹⁷ Ngako boPhetro naJohane babeka tandla etikwabo, base bemukela Moya Longcwele.

¹⁸ Watsi Simoni nakabona kutsi Moya bamemukele ngekubekwa tandla baphostoli, wakhipha imali afuna kuyinika boPhetro naJohane,

¹⁹ watsi: “Nami nginikeni lamandla, kuze kutsi nami lowo lengibeka tandla etikwakhe emukele Moya Longcwele.”

²⁰ Kodvwa Phetro waphendvula watsi: “Wena nemali yakho hamba uyekufa; ucabanga kutsi ungatsenga sipho saNkulunkulu ngemali?

²¹ Awunasabelo nalifa kulomsebenti, ngobe inhlitiyo yakho ayikalungi emehlweni aNkulunkulu.

²² Ngako, phendvuka kulelichinga lakho lelibi, uthandaze eNkhosini kutsi ikutsetselele ngekucabanga intfo lembi kangaka.

²³ Ingani ngiyabona kutsi ugcwele umona, kantsi usiboshwa sesono.”

²⁴ Simoni watsi kuPhetro naJohane: “Ngiyacela kutsi ningithandazele eNkhosini, khona tingetikwenteka kimi letintfo lenitishoko.”

²⁵ Emvakwekufakaza nekushumayela livi leNkhosi boPhetro naJohane babuyela eJerusalema, bahamba bashumayela liVangeli emitini leminyenti yaseSamariya.

Kuphendvuka kwesiphatsimandla saseTopiya

²⁶ Ingilosi yeNkhosi yakhuluma kuFiliphu yatsi: “Tilungiselele kuya endleleni leseNingizimu lesuka eJerusalema yehlele eGaza.” (Lendlela ilihlane).

²⁷ Wasukuma, wahamba. Bheka, wabona umTopiya labengumtsenwa, asiphatsimandla saKhandase, indlovukazi yaseTopiya, abebalulekile futsi angumgcinisikhwama sendlovukazi; abephuma eJerusalema kuyawudvumisa Nkulunkulu,

²⁸ asabuyela ekhaya agibele inkalishi abefundza encwadzini yemphrofethi Isaya.

²⁹ Moya Longcwele watsi kuFiliphu: “Sondzela kulenkalishi uhambe eceleni kwayo!”

³⁰ Nangempela Filiphu wagijima wasondzela, weva umTopiya afundza incwadzi yemphrofethi Isaya, wase uyabuta Filiphu utsi: “Uyakuva yini loku lokufundzako?”

³¹ Waphendvula watsi: “Ngingeva kanjani kute longichazelako nje?” Wase ucela yena Filiphu kutsi agibele ahlale eceleni kwakhe.

³² Abefundza indzawana emBhalweni lapho kutsi: “Njengemvu ilandzelwe kuyawuhlatjwa, nome lizinyane lemvu embikwemhhuli walo lithulile, akazange awuvule umlomo wakhe.

³³ Wedzelelwa, wehlulelwa ngalokungemtsetfo. Ngubani longachaza imphandze yakhe? Akashiyanga namliba, ngobe imphilo yakhe yesuswa emhlabeni.”

³⁴ Siphatsimandla satsi kuFiliphu: “Ngiyakubuta ngitsi: Abekhuluma ngabani lomphrofethi la, abetisho yena yini, nome abekhuluma ngalomunye umuntfu?”

³⁵ Filiphu wakhuluma nalesiphatsimandla, wacala ngalendzawana emBhalweni asitjela liVangeli ngaJesu.

³⁶ Basachubeka nendlela yabo befika lapho kunemanti khona siphatsimandla satsi: “Ingani nankha emanti, kwalani kutsi ngibhajatiswe?” [

³⁷ Filiphu watsi kuso: “Nawukholwa ngenhlitiyo yakho yonkhe, kungentiwa.” Saphendvula satsi: “Ngiyakholwa kutsi Jesu Khristu yiNdvodzana yaNkulunkulu.”]

³⁸ Wase utsi akumiswe inkalishi yakhe, behla bobabili, baya emantini, siphatsimandla naFiliphu, wase uyasibhabhatisa.

³⁹ Batsi kube baphume emantini, Moya weNkhosi watsatsa Filiphu, siphatsimandla asizange siphindze simbone, noko sachubeka neluhambo lwaso sesihamba sijabula.

⁴⁰ Kodvwa Filiphu wabonakala asase-Azothosi ahamba ashumayela liVangeli kuwo onkhe emadolobha, waze wefika naseKhesariya.