Imisebenti yebaPhostoli 4 - Siswati 1996 Bible

BoPhetro naJohane embikweLiqoqo letiphatsimandla

¹ Kwatsi boPhetro naJohane basakhuluma kubantfu, kwasondzela kubo baphristi, nemphatsi wabogadzi belithempeli, nebaSadusi.

² Babecansulwe ngulabaphostoli, ngobe bebafundzisa bantfu kutsi Jesu wavuswa ekufeni, lokufakaza kutsi nalabafile bayawuvukela ekuphileni.

³ Ngako bababopha babafaka ejele kwaze kwaba ngakusasa, ngobe lase lishonile lilanga.

⁴ Kodvwa labanyenti labaliva livi bakholwa; emadvodza andza acishe aba ti-5 000.

⁵ Ngakusasa baholi bemaJuda, netibondza tenkholo yemaJuda, netati temtsetfo bahlangana eJerusalema.

⁶ Bahlangana na-Anasi labengumPhristi Lomkhulu, naKhayafase, naJohane, na-Alekzanda, nelusendvo lwemPhristi Lomkhulu.

⁷ Baphostoli babemisa embikwabo bababuta batsi: “Loku nikwente ngamaphi emandla nome ngaliphi ligama?”

⁸ Phetro agcwele Moya Longcwele wabaphendvula watsi: “Baholi, nani tibondza,

⁹ lamuhla nasibutwa ngaloku lokuhle lesikwente kulesishosha nekutsi siphile kanjani,

¹⁰ kufanele nonkhe nati, nabo bonkhe bantfu baka-Israyeli bafanele bati, kutsi lomuntfu ume lapha embikwenu aphile saka ngemandla elibito laJesu Khristu waseNazaretha, lenambetsela, kodvwa Nkulunkulu wamvusa ekufeni.

¹¹ “Jesu nguye umBhalo lokhuluma ngaye kutsi: ‘Litje lenaledzelela, nine bakhi, selijike laba litje lesisekelo.’

¹² “Kute kusindziswa ngalomunye; ngobe kute lelinye libito ngaphansi kwelizulu lelinikwe nguNkulunkulu kubantfu, lesingasindziswa ngalo.”

¹³ Emalunga aleLiqoqo letiphatsimandla amangala kubona sibindzi saboPhetro naJohane, nekubona kutsi babebantfukatana nje labebangakafundzi. Bavele babona kutsi babehamba naJesu.

¹⁴ Kodvwa kwakute lababengahle bakusho, ngobe babeyibona nalendvodza leyayiphilisiwe ime eceleni kwebaphostoli.

¹⁵ Base bacela kutsi bake baphumele ngephandle, basale bakhuluma bodvwana.

¹⁶ Batsi: “Sitakwente njani ngalabantfu? Bonkhe bantfu labahlala lapha eJerusalema sebayati kutsi lesigemegeme sesimangaliso sentiwe ngabo, futsi singeke sikuphike loko.

¹⁷ Kodvwa kuze siyicitse lendzaba, ingandzi la kubantfu, asibafice, sibatjele kutsi bangaphindzi bakhulume nome kukubani ngelibito laJesu.”

¹⁸ Base bayababita kutsi bangene; babadvonsa ngendlebe kutsi bangaphindzi bakhulume nome bafundzise ngelibito laJesu.

¹⁹ Kodvwa boPhetro naJohane babaphendvula batsi: “Nine ngekwenu ake senisho kutsi ngukuphi lokulungile ebusweni baNkulunkulu, kulalela nine yini nome kulalela Nkulunkulu?

²⁰ Ngako singeke tsine siyekele kukhuluma ngaloko lesikubonile nalesikuvile.”

²¹ Liqoqo lelo labaficisisa kakhulu, lase liyabakhulula, ngobe alisitfolanga sizatfu sekubajezisa, ngobe bonkhe bantfu bebadvumisa Nkulunkulu ngaloko lebekwentekile.

²² Lendvodza lebekwentiwe kuyo lesibonakaliso sekuphiliswa yayineminyaka lengetulu kwema-40 budzala.

Emakholwa akhulekela sibindzi

²³ Batsi kube bakhululwe, boPhetro naJohane babuyela kubazalwane, bafike babatjela lokwakushiwo baphristi labakhulu netibondza takhona.

²⁴ Kwatsi kube bakuve loko, bahlangana ndzawonye bathandaza kuNkulunkulu batsi: “Somandla, Mdali welizulu, nemhlaba, nelwandle, nako konkhe lokukuwo!

²⁵ NgaMoya Longcwele wakhuluma ngakhokho wetfu Davide, inceku yakho, mhlazana utsi: “ ‘Kuya ngani betive batfukutsele basongele lite?

²⁶ Emakhosi emhlaba atilungiselela, nebabusi bahlangana ndzawonye baphambene neNkhosi naKhristu wakhe.’

²⁷ “Nembala kulelidolobha Herodi naPhontiyuse Philatu bahlangana ndzawonye nebetive, nebaka-Israyeli baphambana naJesu, Sisebenti sakho lesiNgcwele, lowasenta kutsi sibe nguKhristu.

²⁸ Bahlangana benta konkhe loko, wena ngemandla nentsandvo yakho, wawuvele ukumisenchanti kutsi kwenteke.

²⁹ “Manje-ke, Nkhosi, ake ubukisise lokusesabisa kwabo bese uyasivumela, tsine tinceku takho, kutsi sikhulume livi lakho ngaso sonkhe sibindzi.

³⁰ Yelula sandla sakho uphilise, uvume kutsi tibonakaliso netimangaliso tentiwe ngelibito leSisebenti sakho lesiNgcwele lesinguJesu.”

³¹ Nabacedza kuthandaza, lendzawo babehlangene kuyo yatanyatanyiswa. Bonkhe bagcwaliswa ngaMoya Longcwele, bacala bakhuluma livi laNkulunkulu ngesibindzi.

Kuhlanganyela ndzawonye

³² Lesicumbi semakholwa sasimcondvo munye nanhlitiyo yinye. Akekho labetsi kwakhe ngekwakhe yedvwa, kodvwa bonkhe benetisana ngako konkhe labebanako.

³³ Ngemandla lamakhulu baphostoli banika bufakazi ngekuvuka kweNkhosi Jesu, naNkulunkulu wehlisela imvula yetibusiso etikwabo bonkhe.

³⁴ Akekho namunye emkhatsini wabo labeswele. Lababenemapulazi nome tindlu bakutsengisa, base baletsa lemali lebabeyitfolile,

³⁵ bayinika baphostoli kutsi babehlukanisele bonkhe, kuye ngekweswela kwabo.

³⁶ Kwadzimate kwatsi Josefa, labengumLevi lowatalelwa eSiphrosi, baphostoli labametsa batsi nguBhanabasi (lokusho kutsi “Lowo Lokhutsatanako”),

³⁷ watsengisa ngensimi yakhe waletsa imali, wayetfula kubaphostoli.